সূক্ত 43

43.1

১৭ ভৌমোঽত্রিঃ। বিশ্বে দেবাঃ । ত্রিষ্টুপ্, ১৬ একপদা বিরাট্ ।

আ ধেনবঃ পয়সা তূর্ণ্যর্থা অমর্ধন্তীরুপ নো যন্তু মধ্বা ।
মহো রায়ে বৃহতীঃ সপ্ত বিপ্রো ময়োভুবো জরিতা জোহবীতি ॥১॥

আ সুষ্টুতী নমসা বর্তয়ধ্যৈ দ্যাবা বাজায় পৃথিবী অমৃধ্রে ।
পিতা মাতা মধুবচাঃ সুহস্তা ভরেভরে নো যশসাববিষ্টাম্ ॥২॥

অধ্বর্যবশ্চকৃবাংসো মধূনি প্র বায়বে ভরত চারু শুক্রম্ ।
হোতেব নঃ প্রথমঃ পাহ্যস্য দেব মধ্বো ররিমা তে মদায় ॥৩॥

দশ ক্ষিপো যুঞ্জতে বাহূ অদ্রিং সোমস্য যা শমিতারা সুহস্তা ।
মধ্বো রসং সুগভস্তির্গিরিষ্ঠাং চনিশ্চদদ্ দুদুহে শুক্রমংশুঃ ॥৪॥

অসাবি তে জুজুষাণায় সোমঃ ক্রত্বে দক্ষায় বৃহতে মদায় ।
হরী রথে সুধুরা যোগে অর্বাগিন্দ্র প্রিয়া কৃণুহি হূয়মানঃ ॥৫॥

আ নো মহীমরমতিং সজোষা গ্নাং দেবীং নমসা রাতহব্যাম্ ।
মধোর্মদায় বৃহতীমৃতজ্ঞামাগ্নে বহ পথিভির্দেবয়ানৈঃ ॥৬॥

অঞ্জন্তি যং প্রথয়ন্তো ন বিপ্রা বপাবন্তং নাগ্নিনা তপন্তঃ ।
পিতুর্ন পুত্র উপসি প্রেষ্ঠ আ ঘর্মো অগ্নিমৃতয়ন্নসাদি ॥৭॥

অচ্ছা মহী বৃহতী শংতমা গীর্দূতো ন গন্ত্বশ্বিনা হুবধ্যৈ ।
ময়োভুবা সরথা যাতমর্বাগ্গন্তং নিধিং ধুরমাণির্ন নাভিম্ ॥৮॥

প্র তব্যসো নমউক্তিং তুরস্যাঽহং পূষ্ণ উত বায়োরদিক্ষি ।
যা রাধসা চোদিতারা মতীনাং যা বাজস্য দ্রবিণোদা উত ত্মন্ ॥৯॥

আ নামভির্মরুতো বক্ষি বিশ্বানা রূপেভির্জাতবেদো হুবানঃ ।
যজ্ঞং গিরো জরিতুঃ সুষ্টুতিং চ বিশ্বে গন্ত মরুতো বিশ্ব ঊতী ॥১০॥

আ নো দিবো বৃহতঃ পর্বতাদা সরস্বতী যজতা গন্তু যজ্ঞম্ ।
হবং দেবী জুজুষাণা ঘৃতাচী শগ্মাং নো বাচমুশতী শৃণোতু ॥১১॥

আ বেধসং নীলপৃষ্ঠং বৃহন্তং বৃহস্পতিং সদনে সাদয়ধ্বম্ ।
সাদদ্যোনিং দম আ দীদিবাংসং হিরণ্যবর্ণমরুষং সপেম ॥১২॥

আ ধর্ণসির্বৃহদ্দিবো ররাণো বিশ্বেভির্গন্ত্বোমভির্হুবানঃ ।
গ্না বসান ওষধীরমৃধ্রস্ত্রিধাতুশৃঙ্গো বৃষভো বয়োধাঃ ॥১৩॥

মাতুষ্পদে পরমে শুক্র আয়োর্বিপন্যবো রাস্পিরাসো অগ্মন্ ।
সুশেব্যং নমসা রাতহব্যাঃ শিশুং মৃজন্ত্যায়বো ন বাসে ॥১৪॥

বৃহদ্ বয়ো বৃহতে তুভ্যমগ্নে ধিয়াজুরো মিথুনাসঃ সচন্ত ।
দেবোদেবঃ সুহবো ভূতু মহ্যং মা নো মাতা পৃথিবী দুর্মতৌ ধাৎ ॥১৫॥

উরৌ দেবা অনিবাধে স্যাম ॥১৬॥

সমশ্বিনোরবসা নূতনেন ময়োভুবা সুপ্রণীতী গমেম ।
আ নো রয়িং বহতমোত বীরানা বিশ্বান্যমৃতা সৌভগানি ॥১৭॥