Sukta 42

42.1

18 bhaumotrih, vishve devah, 11 rudrah, trishtup, 17 ekapada virat

प्र शंत॑मा॒ वरु॑णं॒ दीधि॑ती॒ गीर्मि॒त्रं भग॒मदि॑तिं नू॒नम॑श्याः ।
पृष॑द्योनि॒ः पञ्च॑होता शृणो॒त्वतू॑र्तपन्था॒ असु॑रो मयो॒भुः ॥१॥

Pra shantama varunam didhiti girmitram bhagamaditim nunamashyah
Prishadyonih panchahota shrinotvaturtapantha asuro mayobhuh

42.2

प्रति॑ मे॒ स्तोम॒मदि॑तिर्जगृभ्यात् सू॒नुं न मा॒ता हृद्यं॑ सु॒शेव॑म् ।
ब्रह्म॑ प्रि॒यं दे॒वहि॑तं॒ यदस्त्य॒हं मि॒त्रे वरु॑णे॒ यन्म॑यो॒भु ॥२॥

Prati me stomamaditirjagribhyat sunum na mata hridyam sushevam
Brahma priyam devahitam yadastyaham mitre varune yanmayobhu

42.3

उदी॑रय क॒वित॑मं कवी॒नामु॒नत्तै॑नम॒भि मध्वा॑ घृ॒तेन॑ ।
स नो॒ वसू॑नि॒ प्रय॑ता हि॒तानि॑ च॒न्द्राणि॑ दे॒वः स॑वि॒ता सु॑वाति ॥३॥

Udiraya kavitamam kavinamunattainamabhi madhva ghritena
Sa no vasuni prayata hitani chandrani devah savita suvati

42.4

समि॑न्द्र णो॒ मन॑सा नेषि॒ गोभि॒ः सं सू॒रिभि॑र्हरिव॒ः सं स्व॒स्ति ।
सं ब्रह्म॑णा दे॒वहि॑तं॒ यदस्ति॒ सं दे॒वानां॑ सुम॒त्या य॒ज्ञिया॑नाम् ॥४॥

Samindra no manasa neshi gobhih sam suribhirharivah sam svasti
Sam brahmana devahitam yadasti sam devanam sumatya yagyiyanam

42.5

दे॒वो भग॑ः सवि॒ता रा॒यो अंश॒ इन्द्रो॑ वृ॒त्रस्य॑ सं॒जितो॒ धना॑नाम् ।
ऋ॒भु॒क्षा वाज॑ उ॒त वा॒ पुरं॑धि॒रव॑न्तु नो अ॒मृता॑सस्तु॒रास॑ः ॥५॥

Devo bhagah savita rayo ansha indro vritrasya sanjito dhananam
Ribhuksha vaja uta va purandhiravantu no amritasasturasah

42.6

म॒रुत्व॑तो॒ अप्र॑तीतस्य जि॒ष्णोरजू॑र्यत॒ः प्र ब्र॑वामा कृ॒तानि॑ ।
न ते॒ पूर्वे॑ मघव॒न् नाप॑रासो॒ न वी॒र्यं१ नूत॑न॒ः कश्च॒नाप॑ ॥६॥

Marutvato apratitasya jishnorajuryatah pra bravama kritani
Na te purve maghavan naparaso na viryan1 nutanah kashchanapa

42.7

उप॑ स्तुहि प्रथ॒मं र॑त्न॒धेयं॒ बृह॒स्पतिं॑ सनि॒तारं॒ धना॑नाम् ।
यः शंस॑ते स्तुव॒ते शम्भ॑विष्ठः पुरू॒वसु॑रा॒गम॒ज्जोहु॑वानम् ॥७॥

Upa stuhi prathamam ratnadheyam brihaspatim sanitaram dhananam
Yah shansate stuvate shambhavishthah puruvasuragamajjohuvanam

42.8

तवो॒तिभि॒ः सच॑माना॒ अरि॑ष्टा॒ बृह॑स्पते म॒घवा॑नः सु॒वीरा॑ः ।
ये अ॑श्व॒दा उ॒त वा॒ सन्ति॑ गो॒दा ये व॑स्त्र॒दाः सु॒भगा॒स्तेषु॒ राय॑ः ॥८॥

Tavotibhih sachamana arishta brihaspate maghavanah suvirah
Ye ashvada uta va santi goda ye vastradah subhagasteshu rayah

42.9

वि॒स॒र्माणं॑ कृणुहि वि॒त्तमे॑षां॒ ये भु॒ञ्जते॒ अपृ॑णन्तो न उ॒क्थैः ।
अप॑व्रतान् प्रस॒वे वा॑वृधा॒नान् ब्र॑ह्म॒द्विष॒ः सूर्या॑द् यावयस्व ॥९॥

Visarmanam krinuhi vittamesham ye bhunjate aprinanto na ukthaih
Apavratan prasave vavridhanan brahmadvishah suryad yavayasva

42.10

य ओह॑ते र॒क्षसो॑ दे॒ववी॑तावच॒क्रेभि॒स्तं म॑रुतो॒ नि या॑त ।
यो व॒ः शमीं॑ शशमा॒नस्य॒ निन्दा॑त्तु॒च्छ्यान् कामा॑न् करते सिष्विदा॒नः ॥१०॥

Ya ohate rakshaso devavitavachakrebhistam maruto ni yata
Yo vah shamim shashamanasya nindattuchchhyan kaman karate sishvidanah

42.11

तमु॑ ष्टुहि॒ यः स्वि॒षुः सु॒धन्वा॒ यो विश्व॑स्य॒ क्षय॑ति भेष॒जस्य॑ ।
यक्ष्वा॑ म॒हे सौ॑मन॒साय॑ रु॒द्रं नमो॑भिर्दे॒वमसु॑रं दुवस्य ॥११॥

Tamu shtuhi yah svishuh sudhanva yo vishvasya kshayati bheshajasya
Yakshva mahe saumanasaya rudram namobhirdevamasuram duvasya

42.12

दमू॑नसो अ॒पसो॒ ये सु॒हस्ता॒ वृष्ण॒ः पत्नी॑र्न॒द्यो॑ विभ्वत॒ष्टाः ।
सर॑स्वती बृहद्दि॒वोत रा॒का द॑श॒स्यन्ती॑र्वरिवस्यन्तु शु॒भ्राः ॥१२॥

Damunaso apaso ye suhasta vrishnah patnirnadyo vibhvatashtah
Sarasvati brihaddivota raka dashasyantirvarivasyantu shubhrah

42.13

प्र सू म॒हे सु॑शर॒णाय॑ मे॒धां गिरं॑ भरे॒ नव्य॑सीं॒ जाय॑मानाम् ।
य आ॑ह॒ना दु॑हि॒तुर्व॒क्षणा॑सु रू॒पा मि॑ना॒नो अकृ॑णोदि॒दं न॑ः ॥१३॥

Pra su mahe susharanaya medham giram bhare navyasim jayamanam
Ya ahana duhiturvakshanasu rupa minano akrinodidam nah

42.14

प्र सु॑ष्टु॒तिः स्त॒नय॑न्तं रु॒वन्त॑मि॒ळस्पतिं॑ जरितर्नू॒नम॑श्याः ।
यो अ॑ब्दि॒माँ उ॑दनि॒माँ इय॑र्ति॒ प्र वि॒द्युता॒ रोद॑सी उ॒क्षमा॑णः ॥१४॥

Pra sushtutih stanayantam ruvantamilaspatim jaritarnunamashyah
Yo abdimam udanimam iyarti pra vidyuta rodasi ukshamanah

42.15

ए॒ष स्तोमो॒ मारु॑तं॒ शर्धो॒ अच्छा॑ रु॒द्रस्य॑ सू॒नूँर्यु॑व॒न्यूँरुद॑श्याः ।
कामो॑ रा॒ये ह॑वते मा स्व॒स्त्युप॑ स्तुहि॒ पृष॑दश्वाँ अ॒यास॑ः ॥१५॥

Esha stomo marutam shardho achchha rudrasya sununryuvanyunrudashyah
Kamo raye havate ma svastyupa stuhi prishadashvam ayasah

42.16

प्रैष स्तोम॑ः पृथि॒वीम॒न्तरि॑क्षं॒ वन॒स्पतीँ॒रोष॑धी रा॒ये अ॑श्याः ।
दे॒वोदे॑वः सु॒हवो॑ भूतु॒ मह्यं॒ मा नो॑ मा॒ता पृ॑थि॒वी दु॑र्म॒तौ धा॑त् ॥१६॥

Praisha stomah prithivimantariksham vanaspatinroshadhi raye ashyah
Devodevah suhavo bhutu mahyam ma no mata prithivi durmatau dhat

42.17

उ॒रौ दे॑वा अनिबा॒धे स्या॑म ॥१७॥

Urau deva anibadhe syama

42.18

सम॒श्विनो॒रव॑सा॒ नूत॑नेन मयो॒भुवा॑ सु॒प्रणी॑ती गमेम ।
आ नो॑ र॒यिं व॑हत॒मोत वी॒राना विश्वा॑न्यमृता॒ सौभ॑गानि ॥१८॥

Samashvinoravasa nutanena mayobhuva supraniti gamema
A no rayim vahatamota virana vishvanyamrita saubhagani