Sukta 41

41.1

20 bhaumotrih, vishve devah, trishtup, 16-17 atijagati, 20 ekapada virat

को नु वां॑ मित्रावरुणावृता॒यन् दि॒वो वा॑ म॒हः पार्थि॑वस्य वा॒ दे ।
ऋ॒तस्य॑ वा॒ सद॑सि॒ त्रासी॑थां नो यज्ञाय॒ते वा॑ पशु॒षो न वाजा॑न् ॥१॥

Ko nu vam mitravarunavritayan divo va mahah parthivasya va de
Ritasya va sadasi trasitham no yagyayate va pashusho na vajan

41.2

ते नो॑ मि॒त्रो वरु॑णो अर्य॒मायुरिन्द्र॑ ऋभु॒क्षा म॒रुतो॑ जुषन्त ।
नमो॑भिर्वा॒ ये दध॑ते सुवृ॒क्तिं स्तोमं॑ रु॒द्राय॑ मी॒ळहुषे॑ स॒जोषा॑ः ॥२॥

Te no mitro varuno aryamayurindra ribhuksha maruto jushanta
Namobhirva ye dadhate suvriktim stomam rudraya milahushe sajoshah

41.3

आ वां॒ येष्ठा॑श्विना हु॒वध्यै॒ वात॑स्य॒ पत्म॒न् रथ्य॑स्य पु॒ष्टौ ।
उ॒त वा॑ दि॒वो असु॑राय॒ मन्म॒ प्रान्धां॑सीव॒ यज्य॑वे भरध्वम् ॥३॥

A vam yeshthashvina huvadhyai vatasya patman rathyasya pushtau
Uta va divo asuraya manma prandhansiva yajyave bharadhvam

41.4

प्र स॒क्षणो॑ दि॒व्यः कण्व॑होता त्रि॒तो दि॒वः स॒जोषा॒ वातो॑ अ॒ग्निः ।
पू॒षा भग॑ः प्रभृ॒थे वि॒श्वभो॑जा आ॒जिं न ज॑ग्मुरा॒श्व॑श्वतमाः ॥४॥

Pra sakshano divyah kanvahota trito divah sajosha vato agnih
Pusha bhagah prabhrithe vishvabhoja ajim na jagmurashvashvatamah

41.5

प्र वो॑ र॒यिं यु॒क्ताश्वं॑ भरध्वं रा॒य एषेऽव॑से दधीत॒ धीः ।
सु॒शेव॒ एवै॑रौशि॒जस्य॒ होता॒ ये व॒ एवा॑ मरुतस्तु॒राणा॑म् ॥५॥

Pra vo rayim yuktashvam bharadhvam raya eshevase dadhita dhih
Susheva evairaushijasya hota ye va eva marutasturanam

41.6

प्र वो॑ वा॒युं र॑थ॒युजं॑ कृणुध्वं॒ प्र दे॒वं विप्रं॑ पनि॒तार॑म॒र्कैः ।
इ॒षु॒ध्यव॑ ऋत॒साप॒ः पुरं॑धी॒र्वस्वी॑र्नो॒ अत्र॒ पत्नी॒रा धि॒ये धु॑ः ॥६॥

Pra vo vayum rathayujam krinudhvam pra devam vipram panitaramarkaih
Ishudhyava ritasapah purandhirvasvirno atra patnira dhiye dhuh

41.7

उप॑ व॒ एषे॒ वन्द्ये॑भिः शू॒षैः प्र य॒ह्वी दि॒वश्चि॒तय॑द्भिर॒र्कैः ।
उ॒षासा॒नक्ता॑ वि॒दुषी॑व॒ विश्व॒मा हा॑ वहतो॒ मर्त्या॑य य॒ज्ञम् ॥७॥

Upa va eshe vandyebhih shushaih pra yahvi divashchitayadbhirarkaih
Ushasanakta vidushiva vishvama ha vahato martyaya yagyam

41.8

अ॒भि वो॑ अर्चे पो॒ष्याव॑तो॒ नॄन् वास्तो॒ष्पतिं॒ त्वष्टा॑रं॒ ररा॑णः ।
धन्या॑ स॒जोषा॑ धि॒षणा॒ नमो॑भि॒र्वन॒स्पतीँ॒रोष॑धी रा॒य एषे॑ ॥८॥

Abhi vo arche poshyavato nrin vastoshpatim tvashtaram raranah
Dhanya sajosha dhishana namobhirvanaspatinroshadhi raya eshe

41.9

तु॒जे न॒स्तने॒ पर्व॑ताः सन्तु॒ स्वैत॑वो॒ ये वस॑वो॒ न वी॒राः ।
प॒नि॒त आ॒प्त्यो य॑ज॒तः सदा॑ नो॒ वर्धा॑न्न॒ः शंसं॒ नर्यो॑ अ॒भिष्टौ॑ ॥९॥

Tuje nastane parvatah santu svaitavo ye vasavo na virah
Panita aptyo yajatah sada no vardhannah shansam naryo abhishtau

41.10

वृष्णो॑ अस्तोषि भू॒म्यस्य॒ गर्भं॑ त्रि॒तो नपा॑तम॒पां सु॑वृ॒क्ति ।
गृ॒णी॒ते अ॒ग्निरे॒तरी॒ न शू॒षैः शो॒चिष्के॑शो॒ नि रि॑णाति॒ वना॑ ॥१०॥

Vrishno astoshi bhumyasya garbham trito napatamapam suvrikti
Grinite agniretari na shushaih shochishkesho ni rinati vana

41.11

क॒था म॒हे रु॒द्रिया॑य ब्रवाम॒ कद्रा॒ये चि॑कि॒तुषे॒ भगा॑य ।
आप॒ ओष॑धीरु॒त नो॑ऽवन्तु॒ द्यौर्वना॑ गि॒रयो॑ वृ॒क्षके॑शाः ॥११॥

Katha mahe rudriyaya bravama kadraye chikitushe bhagaya
Apa oshadhiruta novantu dyaurvana girayo vrikshakeshah

41.12

शृ॒णोतु॑ न ऊ॒र्जां पति॒र्गिर॒ः स नभ॒स्तरी॑याँ इषि॒रः परि॑ज्मा ।
शृ॒ण्वन्त्वाप॒ः पुरो॒ न शु॒भ्राः परि॒ स्रुचो॑ बबृहा॒णस्याद्रे॑ः ॥१२॥

Shrinotu na urjam patirgirah sa nabhastariyam ishirah parijma
Shrinvantvapah puro na shubhrah pari srucho babrihanasyadreh

41.13

वि॒दा चि॒न्नु म॑हान्तो॒ ये व॒ एवा॒ ब्रवा॑म दस्मा॒ वार्यं॒ दधा॑नाः ।
वय॑श्च॒न सु॒भ्व१ आव॑ यन्ति क्षु॒भा मर्त॒मनु॑यतं वध॒स्नैः ॥१३॥

Vida chinnu mahanto ye va eva bravama dasma varyam dadhanah
Vayashchana subhva1 ava yanti kshubha martamanuyatam vadhasnaih

41.14

आ दैव्या॑नि॒ पार्थि॑वानि॒ जन्मा॒पश्चाच्छा॒ सुम॑खाय वोचम् ।
वर्ध॑न्तां॒ द्यावो॒ गिर॑श्च॒न्द्राग्रा॑ उ॒दा व॑र्धन्ताम॒भिषा॑ता॒ अर्णा॑ः ॥१४॥

A daivyani parthivani janmapashchachchha sumakhaya vocham
Vardhantam dyavo girashchandragra uda vardhantamabhishata arnah

41.15

प॒देप॑दे मे जरि॒मा नि धा॑यि॒ वरू॑त्री वा श॒क्रा या पा॒युभि॑श्च ।
सिष॑क्तु मा॒ता म॒ही र॒सा न॒ः स्मत् सू॒रिभि॑र्ऋजु॒हस्त॑ ऋजु॒वनि॑ः ॥१५॥

Padepade me jarima ni dhayi varutri va shakra ya payubhishcha
Sishaktu mata mahi rasa nah smat suribhirrijuhasta rijuvanih

41.16

क॒था दा॑शेम॒ नम॑सा सु॒दानू॑नेव॒या म॒रुतो॒ अच्छो॑क्तौ॒ प्रश्र॑वसो म॒रुतो॒ अच्छो॑क्तौ ।
मा नोऽहि॑र्बु॒ध्न्यो॑ रि॒षे धा॑द॒स्माकं॑ भूदुपमाति॒वनि॑ः ॥१६॥

Katha dashema namasa sudanunevaya maruto achchhoktau prashravaso maruto achchhoktau
Ma nohirbudhnyo rishe dhadasmakam bhudupamativanih

41.17

इति॑ चि॒न्नु प्र॒जायै॑ पशु॒मत्यै॒ देवा॑सो॒ वन॑ते॒ मर्त्यो॑ व॒ आ दे॑वासो वनते॒ मर्त्यो॑ वः ।
अत्रा॑ शि॒वां त॒न्वो॑ धा॒सिम॒स्या ज॒रां चि॑न्मे॒ निर्ऋ॑तिर्जग्रसीत ॥१७॥

Iti chinnu prajayai pashumatyai devaso vanate martyo va a devaso vanate martyo vah
Atra shivam tanvo dhasimasya jaram chinme nirritirjagrasita

41.18

तां वो॑ देवाः सुम॒तिमू॒र्जय॑न्ती॒मिष॑मश्याम वसव॒ः शसा॒ गोः ।
सा न॑ः सु॒दानु॑र्मृ॒ळय॑न्ती दे॒वी प्रति॒ द्रव॑न्ती सुवि॒ताय॑ गम्याः ॥१८॥

Tam vo devah sumatimurjayantimishamashyama vasavah shasa goh
Sa nah sudanurmrilayanti devi prati dravanti suvitaya gamyah

41.19

अ॒भि न॒ इळा॑ यू॒थस्य॑ मा॒ता स्मन्न॒दीभि॑रु॒र्वशी॑ वा गृणातु ।
उ॒र्वशी॑ वा बृहद्दि॒वा गृ॑णा॒नाऽभ्यू॑र्ण्वा॒ना प्र॑भृ॒थस्या॒योः ॥१९॥

Abhi na ila yuthasya mata smannadibhirurvashi va grinatu
Urvashi va brihaddiva grinanabhyurnvana prabhrithasyayoh

41.20

सिष॑क्तु न ऊर्ज॒व्य॑स्य पु॒ष्टेः ॥२०॥

Sishaktu na urjavyasya pushteh