Sukta 40

40.1

9 bhaumotrih, indrah, 5 suryah, 6-9 atrih, 1-3 ushnik, 5-9 anushtup, 4, 6-8 trishtup

आ या॒ह्यद्रि॑भिः सु॒तं सोमं॑ सोमपते पिब । वृष॑न्निन्द्र॒ वृष॑भिर्वृत्रहन्तम ॥१॥

A yahyadribhih sutam somam somapate piba, vrishannindra vrishabhirvritrahantama

वृषा॒ ग्रावा॒ वृषा॒ मदो॒ वृषा॒ सोमो॑ अ॒यं सु॒तः । वृष॑न्निन्द्र॒ वृष॑भिर्वृत्रहन्तम ॥२॥

Vrisha grava vrisha mado vrisha somo ayam sutah, vrishannindra vrishabhirvritrahantama

वृषा॑ त्वा॒ वृष॑णं हुवे॒ वज्रि॑ञ्चि॒त्राभि॑रू॒तिभि॑ः । वृष॑न्निन्द्र॒ वृष॑भिर्वृत्रहन्तम ॥३॥

Vrisha tva vrishanam huve vajrinchitrabhirutibhih, vrishannindra vrishabhirvritrahantama

ऋ॒जी॒षी व॒ज्री वृ॑ष॒भस्तु॑रा॒षाट् छु॒ष्मी राजा॑ वृत्र॒हा सो॑म॒पावा॑ ।
यु॒क्त्वा हरि॑भ्या॒मुप॑ यासद॒र्वाङ् माध्यं॑दिने॒ सव॑ने मत्स॒दिन्द्र॑ः ॥४॥

Rijishi vajri vrishabhasturashat chhushmi raja vritraha somapava
Yuktva haribhyamupa yasadarvang madhyandine savane matsadindrah

यत् त्वा॑ सूर्य॒ स्व॑र्भानु॒स्तम॒सावि॑ध्यदासु॒रः ।
अक्षे॑त्रवि॒द् यथा॑ मु॒ग्धो भुव॑नान्यदीधयुः ॥५॥

Yat tva surya svarbhanustamasavidhyadasurah
Akshetravid yatha mugdho bhuvananyadidhayuh

स्व॑र्भानो॒रध॒ यदि॑न्द्र मा॒या अ॒वो दि॒वो वर्त॑माना अ॒वाह॑न् ।
गू॒ळहं सूर्यं॒ तम॒साप॑व्रतेन तु॒रीये॑ण॒ ब्रह्म॑णाविन्द॒दत्रि॑ः ॥६॥

Svarbhanoradha yadindra maya avo divo vartamana avahan
Gulaham suryam tamasapavratena turiyena brahmanavindadatrih

मा मामि॒मं तव॒ सन्त॑मत्र इर॒स्या द्रु॒ग्धो भि॒यसा॒ नि गा॑रीत् ।
त्वं मि॒त्रो अ॑सि स॒त्यरा॑धा॒स्तौ मे॒हाव॑तं॒ वरु॑णश्च॒ राजा॑ ॥७॥

Ma mamimam tava santamatra irasya drugdho bhiyasa ni garit
Tvam mitro asi satyaradhastau mehavatam varunashcha raja

ग्राव्णो॑ ब्र॒ह्मा यु॑युजा॒नः स॑प॒र्यन् की॒रिणा॑ दे॒वान् नम॑सोप॒शिक्ष॑न् ।
अत्रि॒ः सूर्य॑स्य दि॒वि चक्षु॒राधा॒त् स्व॑र्भानो॒रप॑ मा॒या अ॑घुक्षत् ॥८॥

Gravno brahma yuyujanah saparyan kirina devan namasopashikshan
Atrih suryasya divi chakshuradhat svarbhanorapa maya aghukshat

यं वै सूर्यं॒ स्व॑र्भानु॒स्तम॒सावि॑ध्यदासु॒रः ।
अत्र॑य॒स्तमन्व॑विन्दन् न॒ह्य१न्ये अश॑क्नुवन् ॥९॥

Yam vai suryam svarbhanustamasavidhyadasurah
Atrayastamanvavindan nahya1nye ashaknuvan