Sukta 39

39.1

5 bhaumotrih, indrah, anushtup, 5panktih

यदि॑न्द्र चित्र मे॒हनास्ति॒ त्वादा॑तमद्रिवः ।
राध॒स्तन्नो॑ विदद्वस उभयाह॒स्त्या भ॑र ॥१॥

Yadindra chitra mehanasti tvadatamadrivah
Radhastanno vidadvasa ubhayahastya bhara

39.2

यन्मन्य॑से॒ वरे॑ण्य॒मिन्द्र॑ द्यु॒क्षं तदा भ॑र ।
वि॒द्याम॒ तस्य॑ ते व॒यमकू॑पारस्य दा॒वने॑ ॥२॥

Yanmanyase varenyamindra dyuksham tada bhara
Vidyama tasya te vayamakuparasya davane

39.3

यत् ते॑ दि॒त्सु प्र॒राध्यं॒ मनो॒ अस्ति॑ श्रु॒तं बृ॒हत् ।
तेन॑ दृ॒ळहा चि॑दद्रिव॒ आ वाजं॑ दर्षि सा॒तये॑ ॥३॥

Yat te ditsu praradhyam mano asti shrutam brihat
Tena drilaha chidadriva a vajam darshi sataye

39.4

मंहि॑ष्ठं वो म॒घोनां॒ राजा॑नं चर्षणी॒नाम् ।
इन्द्र॒मुप॒ प्रश॑स्तये पू॒र्वीभि॑र्जुजुषे॒ गिर॑ः ॥४॥

Manhishtham vo maghonam rajanam charshaninam
Indramupa prashastaye purvibhirjujushe girah

39.5

अस्मा॒ इत् काव्यं॒ वच॑ उ॒क्थमिन्द्रा॑य॒ शंस्य॑म् ।
तस्मा॑ उ॒ ब्रह्म॑वाहसे॒ गिरो॑ वर्ध॒न्त्यत्र॑यो॒ गिर॑ः शुम्भ॒न्त्यत्र॑यः ॥५॥

Asma it kavyam vacha ukthamindraya shansyam
Tasma u brahmavahase giro vardhantyatrayo girah shumbhantyatrayah