সূক্ত 41

41.1

২০ ভৌমোঽত্রিঃ। বিশ্বে দেবাঃ । ত্রিষ্টুপ্, ১৬-১৭ অতিজগতী, ২০ একপদা বিরাট্।

কো নু বাং মিত্রাবরুণাবৃতায়ন্ দিবো বা মহঃ পার্থিবস্য বা দে ।
ঋতস্য বা সদসি ত্রাসীথাং নো যজ্ঞায়তে বা পশুষো ন বাজান্ ॥১॥

তে নো মিত্রো বরুণো অর্যমায়ুরিন্দ্র ঋভুক্ষা মরুতো জুষন্ত ।
নমোভির্বা যে দধতে সুবৃক্তিং স্তোমং রুদ্রায় মীলহুষে সজোষাঃ ॥২॥

আ বাং যেষ্ঠাশ্বিনা হুবধ্যৈ বাতস্য পত্মন্ রথ্যস্য পুষ্টৌ ।
উত বা দিবো অসুরায় মন্ম প্রান্ধাংসীব যজ্যবে ভরধ্বম্ ॥৩॥

প্র সক্ষণো দিব্যঃ কণ্বহোতা ত্রিতো দিবঃ সজোষা বাতো অগ্নিঃ ।
পূষা ভগঃ প্রভৃথে বিশ্বভোজা আজিং ন জগ্মুরাশ্বশ্বতমাঃ ॥৪॥

প্র বো রয়িং যুক্তাশ্বং ভরধ্বং রায় এষেঽবসে দধীত ধীঃ ।
সুশেব এবৈরৌশিজস্য হোতা যে ব এবা মরুতস্তুরাণাম্ ॥৫॥

প্র বো বায়ুং রথয়ুজং কৃণুধ্বং প্র দেবং বিপ্রং পনিতারমর্কৈঃ ।
ইষুধ্যব ঋতসাপঃ পুরংধীর্বস্বীর্নো অত্র পত্নীরা ধিয়ে ধুঃ ॥৬॥

উপ ব এষে বন্দ্যেভিঃ শূষৈঃ প্র যহ্বী দিবশ্চিতয়দ্ভিরর্কৈঃ ।
উষাসানক্তা বিদুষীব বিশ্বমা হা বহতো মর্ত্যায় যজ্ঞম্ ॥৭॥

অভি বো অর্চে পোষ্যাবতো নৄন্ বাস্তোষ্পতিং ত্বষ্টারং ররাণঃ ।
ধন্যা সজোষা ধিষণা নমোভির্বনস্পতীঁরোষধী রায় এষে ॥৮॥

তুজে নস্তনে পর্বতাঃ সন্তু স্বৈতবো যে বসবো ন বীরাঃ ।
পনিত আপ্ত্যো যজতঃ সদা নো বর্ধান্নঃ শংসং নর্যো অভিষ্টৌ ॥৯॥

বৃষ্ণো অস্তোষি ভূম্যস্য গর্ভং ত্রিতো নপাতমপাং সুবৃক্তি ।
গৃণীতে অগ্নিরেতরী ন শূষৈঃ শোচিষ্কেশো নি রিণাতি বনা ॥১০॥

কথা মহে রুদ্রিয়ায় ব্রবাম কদ্রায়ে চিকিতুষে ভগায় ।
আপ ওষধীরুত নোঽবন্তু দ্যৌর্বনা গিরয়ো বৃক্ষকেশাঃ ॥১১॥

শৃণোতু ন ঊর্জাং পতির্গিরঃ স নভস্তরীয়াঁ ইষিরঃ পরিজ্মা ।
শৃণ্বন্ত্বাপঃ পুরো ন শুভ্রাঃ পরি স্রুচো ববৃহাণস্যাদ্রেঃ ॥১২॥

বিদা চিন্নু মহান্তো যে ব এবা ব্রবাম দস্মা বার্যং দধানাঃ ।
বয়শ্চন সুভ্ব১ আব যন্তি ক্ষুভা মর্তমনুয়তং বধস্নৈঃ ॥১৩॥

আ দৈব্যানি পার্থিবানি জন্মাপশ্চাচ্ছা সুমখায় বোচম্ ।
বর্ধন্তাং দ্যাবো গিরশ্চন্দ্রাগ্রা উদা বর্ধন্তামভিষাতা অর্ণাঃ ॥১৪॥

পদেপদে মে জরিমা নি ধায়ি বরূত্রী বা শক্রা যা পায়ুভিশ্চ ।
সিষক্তু মাতা মহী রসা নঃ স্মৎ সূরিভির্ঋজুহস্ত ঋজুবনিঃ ॥১৫॥

কথা দাশেম নমসা সুদানূনেবয়া মরুতো অচ্ছোক্তৌ প্রশ্রবসো মরুতো অচ্ছোক্তৌ ।
মা নোঽহির্বুধ্ন্যো রিষে ধাদস্মাকং ভূদুপমাতিবনিঃ ॥১৬॥

ইতি চিন্নু প্রজায়ৈ পশুমত্যৈ দেবাসো বনতে মর্ত্যো ব আ দেবাসো বনতে মর্ত্যো বঃ ।
অত্রা শিবাং তন্বো ধাসিমস্যা জরাং চিন্মে নির্ঋতির্জগ্রসীত ॥১৭॥

তাং বো দেবাঃ সুমতিমূর্জয়ন্তীমিষমশ্যাম বসবঃ শসা গোঃ ।
সা নঃ সুদানুর্মৃলয়ন্তী দেবী প্রতি দ্রবন্তী সুবিতায় গম্যাঃ ॥১৮॥

অভি ন ইলা যূথস্য মাতা স্মন্নদীভিরুর্বশী বা গৃণাতু ।
উর্বশী বা বৃহদ্দিবা গৃণানাঽভ্যূর্ণ্বানা প্রভৃথস্যায়োঃ ॥১৯॥

সিষক্তু ন ঊর্জব্যস্য পুষ্টেঃ ॥২০॥