সূক্ত 32

32.1

১২ গাতুরাত্রেয়ঃ। ইন্দ্রঃ। ত্রিষ্টুপ্।

অদর্দরুত্সমসৃজো বি খানি ত্বমর্ণবান্ বদ্বধানাঁ অরম্ণাঃ ।
মহান্তমিন্দ্র পর্বতং বি যদ্ বঃ সৃজো বি ধারা অব দানবং হন্ ॥১॥

32.2

ত্বমুত্সাঁ ঋতুভির্বদ্বধানাঁ অরংহ ঊধঃ পর্বতস্য বজ্রিন্ ।
অহিং চিদুগ্র প্রয়ুতং শয়ানং জঘন্বাঁ ইন্দ্র তবিষীমধত্থাঃ ॥২॥

32.3

ত্যস্য চিন্মহতো নির্মৃগস্য বধর্জঘান তবিষীভিরিন্দ্রঃ ।
য এক ইদপ্রতির্মন্যমান আদস্মাদন্যো অজনিষ্ট তব্যান্ ॥৩॥

32.4

ত্যং চিদেষাং স্বধয়া মদন্তং মিহো নপাতং সুবৃধং তমোগাম্ ।
বৃষপ্রভর্মা দানবস্য ভামং বজ্রেণ বজ্রী নি জঘান শুষ্ণম্ ॥৪॥

32.5

ত্যং চিদস্য ক্রতুভির্নিষত্তমমর্মণো বিদদিদস্য মর্ম ।
যদীং সুক্ষত্র প্রভৃতা মদস্য যুয়ুত্সন্তং তমসি হর্ম্যে ধাঃ ॥৫॥

32.6

ত্যং চিদিত্থা কত্পয়ং শয়ানমসূর্যে তমসি বাবৃধানম্ ।
তং চিন্মন্দানো বৃষভঃ সুতস্যোচ্চৈরিন্দ্রো অপগূর্যা জঘান ॥৬॥

32.7

উদ্ যদিন্দ্রো মহতে দানবায় বধর্যমিষ্ট সহো অপ্রতীতম্ ।
যদীং বজ্রস্য প্রভৃতৌ দদাভ বিশ্বস্য জন্তোরধমং চকার ॥৭॥

32.8

ত্যং চিদর্ণং মধুপং শয়ানমসিন্বং বব্রং মহ্যাদদুগ্রঃ ।
অপাদমত্রং মহতা বধেন নি দুর্যোণ আবৃণঙ্ মৃধ্রবাচম্ ॥৮॥

32.9

কো অস্য শুষ্মং তবিষীং বরাত একো ধনা ভরতে অপ্রতীতঃ ।
ইমে চিদস্য জ্রয়সো নু দেবী ইন্দ্রস্যৌজসো ভিয়সা জিহাতে ॥৯॥

32.10

ন্যস্মৈ দেবী স্বধিতির্জিহীত ইন্দ্রায় গাতুরুশতীব যেমে ।
সং যদোজো যুবতে বিশ্বমাভিরনু স্বধাব্নে ক্ষিতয়ো নমন্ত ॥১০॥

32.11

একং নু ত্বা সত্পতিং পাঞ্চজন্যং জাতং শৃণোমি যশসং জনেষু ।
তং মে জগৃভ্র আশসো নবিষ্ঠং দোষা বস্তোর্হবমানাস ইন্দ্রম্ ॥১১॥

32.12

এবা হি ত্বামৃতুথা যাতয়ন্তং মঘা বিপ্রেভ্যো দদতং শৃণোমি ।
কিং তে ব্রহ্মাণো গৃহতে সখায়ো যে ত্বায়া নিদধুঃ কামমিন্দ্র ॥১২॥