সূক্ত 33

33.1

১০ প্রাজাপত্যঃ সংবরণঃ। ইন্দ্রঃ। ত্রিষ্টুপ্।

মহি মহে তবসে দীধ্যে নৄনিন্দ্রায়েত্থা তবসে অতব্যান্ ।
যো অস্মৈ সুমতিং বাজসাতৌ স্তুতো জনে সমর্যশ্চিকেত ॥১॥

33.2

স ত্বং ন ইন্দ্র ধিয়সানো অর্কৈর্হরীণাং বৃষন্ যোক্ত্রমশ্রেঃ ।
যা ইত্থা মঘবন্ননু জোষং বক্ষো অভি প্রার্যঃ সক্ষি জনান্ ॥২॥

33.3

ন তে ত ইন্দ্রাভ্য১স্মদৃষ্বাঽয়ুক্তাসো অব্রহ্মতা যদসন্ ।
তিষ্ঠা রথমধি তং বজ্রহস্তাঽঽ রশ্মিং দেব যমসে স্বশ্বঃ ॥৩॥

33.4

পুরূ যৎ ত ইন্দ্র সন্ত্যুক্থা গবে চকর্থোর্বরাসু যুধ্যন্ ।
ততক্ষে সূর্যায় চিদোকসি স্বে বৃষা সমত্সু দাসস্য নাম চিৎ ॥৪॥

33.5

বয়ং তে ত ইন্দ্র যে চ নরঃ শর্ধো জজ্ঞানা যাতাশ্চ রথাঃ ।
আস্মাঞ্জগম্যাদহিশুষ্ম সত্বা ভগো ন হব্যঃ প্রভৃথেষু চারুঃ ॥৫॥

33.6

পপৃক্ষেণ্যমিন্দ্র ত্বে হ্যোজো নৃম্ণানি চ নৃতমানো অমর্তঃ ।
স ন এনীং বসবানো রয়িং দাঃ প্রার্যঃ স্তুষে তুবিমঘস্য দানম্ ॥৬॥

33.7

এবা ন ইন্দ্রোতিভিরব পাহি গৃণতঃ শূর কারূন্ ।
উত ত্বচং দদতো বাজসাতৌ পিপ্রীহি মধ্বঃ সুষুতস্য চারোঃ ॥৭॥

33.8

উত ত্যে মা পৌরুকুত্স্যস্য সূরেস্ত্রসদস্যোর্হিরণিনো ররাণাঃ ।
বহন্তু মা দশ শ্যেতাসো অস্য গৈরিক্ষিতস্য ক্রতুভির্নু সশ্চে ॥৮॥

33.9

উত ত্যে মা মারুতাশ্বস্য শোণাঃ ক্রত্বামঘাসো বিদথস্য রাতৌ ।
সহস্রা মে চ্যবতানো দদান আনূকমর্যো বপুষে নার্চৎ ॥৯॥

33.10

উত ত্যে মা ধ্বন্যস্য জুষ্টা লক্ষ্মণ্যস্য সুরুচো যতানাঃ ।
মহ্না রায়ঃ সংবরণস্য ঋষের্ব্রজং ন গাবঃ প্রয়তা অপি গ্মন্ ॥১০॥