সূক্ত 31

31.1

১৩ অবস্যুরাত্রেয়ঃ। ইন্দ্রঃ, ৮ তৃতীয়পাদস্য কুত্সো বা, চতুর্থপাদস্য উশনা বা, ৯ ইন্দ্রাকুত্সৌ। ত্রিষ্টুপ্।

ইন্দ্রো রথায় প্রবতং কৃণোতি যমধ্যস্থান্মঘবা বাজয়ন্তম্ ।
যূথেব পশ্বো ব্যুনোতি গোপা অরিষ্টো যাতি প্রথমঃ সিষাসন্ ॥১॥

আ প্র দ্রব হরিবো মা বি বেনঃ পিশঙ্গরাতে অভি নঃ সচস্ব ।
নহি ত্বদিন্দ্র বস্যো অন্যদস্ত্যমেনাঁশ্চিজ্জনিবতশ্চকর্থ ॥২॥

উদ্যৎ সহঃ সহস আজনিষ্ট দেদিষ্ট ইন্দ্র ইন্দ্রিয়াণি বিশ্বা ।
প্রাচোদয়ৎ সুদুঘা বব্রে অন্তর্বি জ্যোতিষা সংববৃত্বৎ তমোঽবঃ ॥৩॥

অনবস্তে রথমশ্বায় তক্ষন্ ত্বষ্টা বজ্রং পুরুহূত দ্যুমন্তম্ ।
ব্রহ্মাণ ইন্দ্রং মহয়ন্তো অর্কৈরবর্ধয়ন্নহয়ে হন্তবা উ ॥৪॥

বৃষ্ণে যৎ তে বৃষণো অর্কমর্চানিন্দ্র গ্রাবাণো অদিতিঃ সজোষাঃ ।
অনশ্বাসো যে পবয়োঽরথা ইন্দ্রেষিতা অভ্যবর্তন্ত দস্যূন্ ॥৫॥

প্র তে পূর্বাণি করণানি বোচং প্র নূতনা মঘবন্ যা চকর্থ ।
শক্তীবো যদ্ বিভরা রোদসী উভে জয়ন্নপো মনবে দানুচিত্রাঃ ॥৬॥

তদিন্নু তে করণং দস্ম বিপ্রাঽহিং যদ্ ঘ্নন্নোজো অত্রামিমীথাঃ ।
শুষ্ণস্য চিৎ পরি মায়া অগৃভ্ণাঃ প্রপিত্বং যন্নপ দস্যূঁরসেধঃ ॥৭॥

ত্বমপো যদবে তুর্বশায়াঽরময়ঃ সুদুঘাঃ পার ইন্দ্র ।
উগ্রময়াতমবহো হ কুত্সং সং হ যদ্ বামুশনারন্ত দেবাঃ ॥৮॥

ইন্দ্রাকুত্সা বহমানা রথেনাঽঽ বামত্যা অপি কর্ণে বহন্তু ।
নিঃ ষীমদ্ভ্যো ধমথো নিঃ ষধস্থান্ মঘোনো হৃদো বরথস্তমাংসি ॥৯॥

বাতস্য যুক্তান্ ত্সুয়ুজশ্চিদশ্বান্ কবিশ্চিদেষো অজগন্নবস্যুঃ ।
বিশ্বে তে অত্র মরুতঃ সখায় ইন্দ্র ব্রহ্মাণি তবিষীমবর্ধন্ ॥১০॥

সূরশ্চিদ্ রথং পরিতক্ম্যায়াং পূর্বং করদুপরং জূজুবাংসম্ ।
ভরচ্চক্রমেতশঃ সং রিণাতি পুরো দধৎ সনিষ্যতি ক্রতুং নঃ ॥১১॥

আয়ং জনা অভিচক্ষে জগামেন্দ্রঃ সখায়ং সুতসোমমিচ্ছন্ ।
বদন্ গ্রাবাব বেদিং ভ্রিয়াতে যস্য জীরমধ্বর্যবশ্চরন্তি ॥১২॥

যে চাকনন্ত চাকনন্ত নূ তে মর্তা অমৃত মো তে অংহ আরন্ ।
বাবন্ধি যজ্যূঁরুত তেষু ধেহ্যোজো জনেষু যেষু তে স্যাম ॥১৩॥