Sukta 31

31.1

13 avasyuratreyah, indrah, 8 tritiyapadasya kutso va, chaturthapadasya ushana va, 9 indrakutsau, trishtup

इन्द्रो॒ रथा॑य प्र॒वतं॑ कृणोति॒ यम॒ध्यस्था॑न्म॒घवा॑ वाज॒यन्त॑म् ।
यू॒थेव॑ प॒श्वो व्यु॑नोति गो॒पा अरि॑ष्टो याति प्रथ॒मः सिषा॑सन् ॥१॥

Indro rathaya pravatam krinoti yamadhyasthanmaghava vajayantam
Yutheva pashvo vyunoti gopa arishto yati prathamah sishasan

31.2

आ प्र द्र॑व हरिवो॒ मा वि वे॑न॒ः पिश॑ङ्गराते अ॒भि न॑ः सचस्व ।
न॒हि त्वदि॑न्द्र॒ वस्यो॑ अ॒न्यदस्त्य॑मे॒नाँश्चि॒ज्जनि॑वतश्चकर्थ ॥२॥

A pra drava harivo ma vi venah pishangarate abhi nah sachasva
Nahi tvadindra vasyo anyadastyamenanshchijjanivatashchakartha

31.3

उद्यत् सह॒ः सह॑स॒ आज॑निष्ट॒ देदि॑ष्ट॒ इन्द्र॑ इन्द्रि॒याणि॒ विश्वा॑ ।
प्राचो॑दयत् सु॒दुघा॑ व॒व्रे अ॒न्तर्वि ज्योति॑षा संववृ॒त्वत् तमो॑ऽवः ॥३॥

Udyat sahah sahasa ajanishta dedishta indra indriyani vishva
Prachodayat sudugha vavre antarvi jyotisha sanvavritvat tamovah

31.4

अन॑वस्ते॒ रथ॒मश्वा॑य तक्ष॒न् त्वष्टा॒ वज्रं॑ पुरुहूत द्यु॒मन्त॑म् ।
ब्र॒ह्माण॒ इन्द्रं॑ म॒हय॑न्तो अ॒र्कैरव॑र्धय॒न्नह॑ये॒ हन्त॒वा उ॑ ॥४॥

Anavaste rathamashvaya takshan tvashta vajram puruhuta dyumantam
Brahmana indram mahayanto arkairavardhayannahaye hantava u

31.5

वृष्णे॒ यत् ते॒ वृष॑णो अ॒र्कमर्चा॒निन्द्र॒ ग्रावा॑णो॒ अदि॑तिः स॒जोषा॑ः ।
अ॒न॒श्वासो॒ ये प॒वयो॑ऽर॒था इन्द्रे॑षिता अ॒भ्यव॑र्तन्त॒ दस्यू॑न् ॥५॥

Vrishne yat te vrishano arkamarchanindra gravano aditih sajoshah
Anashvaso ye pavayoratha indreshita abhyavartanta dasyun

31.6

प्र ते॒ पूर्वा॑णि॒ कर॑णानि वोचं॒ प्र नूत॑ना मघव॒न् या च॒कर्थ॑ ।
शक्ती॑वो॒ यद् वि॒भरा॒ रोद॑सी उ॒भे जय॑न्न॒पो मन॑वे॒ दानु॑चित्राः ॥६॥

Pra te purvani karanani vocham pra nutana maghavan ya chakartha
Shaktivo yad vibhara rodasi ubhe jayannapo manave danuchitrah

31.7

तदिन्नु ते॒ कर॑णं दस्म वि॒प्राऽहिं॒ यद् घ्नन्नोजो॒ अत्रामि॑मीथाः ।
शुष्ण॑स्य चि॒त् परि॑ मा॒या अ॑गृभ्णाः प्रपि॒त्वं यन्नप॒ दस्यूँ॑रसेधः ॥७॥

Tadinnu te karanam dasma viprahim yad ghnannojo atramimithah
Shushnasya chit pari maya agribhnah prapitvam yannapa dasyunrasedhah

31.8

त्वम॒पो यद॑वे तु॒र्वशा॒याऽर॑मयः सु॒दुघा॑ः पा॒र इ॑न्द्र ।
उ॒ग्रम॑यात॒मव॑हो ह॒ कुत्सं॒ सं ह॒ यद् वा॑मु॒शनार॑न्त दे॒वाः ॥८॥

Tvamapo yadave turvashayaramayah sudughah para indra
Ugramayatamavaho ha kutsam sam ha yad vamushanaranta devah

31.9

इन्द्रा॑कुत्सा॒ वह॑माना॒ रथे॒नाऽऽ वा॒मत्या॒ अपि॒ कर्णे॑ वहन्तु ।
निः षी॑म॒द्भ्यो धम॑थो॒ निः ष॒धस्था॑न् म॒घोनो॑ हृ॒दो व॑रथ॒स्तमां॑सि ॥९॥

Indrakutsa vahamana rathena vamatya api karne vahantu
Nih shimadbhyo dhamatho nih shadhasthan maghono hrido varathastamansi

31.10

वात॑स्य यु॒क्तान् त्सु॒युज॑श्चि॒दश्वा॑न् क॒विश्चि॑दे॒षो अ॑जगन्नव॒स्युः ।
विश्वे॑ ते॒ अत्र॑ म॒रुत॒ः सखा॑य॒ इन्द्र॒ ब्रह्मा॑णि॒ तवि॑षीमवर्धन् ॥१०॥

Vatasya yuktan tsuyujashchidashvan kavishchidesho ajagannavasyuh
Vishve te atra marutah sakhaya indra brahmani tavishimavardhan

31.11

सूर॑श्चि॒द् रथं॒ परि॑तक्म्यायां॒ पूर्वं॑ कर॒दुप॑रं जूजु॒वांस॑म् ।
भर॑च्च॒क्रमेत॑श॒ः सं रि॑णाति पु॒रो दध॑त् सनिष्यति॒ क्रतुं॑ नः ॥११॥

Surashchid ratham paritakmyayam purvam karaduparam jujuvansam
Bharachchakrametashah sam rinati puro dadhat sanishyati kratum nah

31.12

आयं ज॑ना अभि॒चक्षे॑ जगा॒मेन्द्र॒ः सखा॑यं सु॒तसो॑ममि॒च्छन् ।
वद॒न् ग्रावाव॒ वेदिं॑ भ्रियाते॒ यस्य॑ जी॒रम॑ध्व॒र्यव॒श्चर॑न्ति ॥१२॥

Ayam jana abhichakshe jagamendrah sakhayam sutasomamichchhan
Vadan gravava vedim bhriyate yasya jiramadhvaryavashcharanti

31.13

ये चा॒कन॑न्त चा॒कन॑न्त॒ नू ते मर्ता॑ अमृत॒ मो ते अंह॒ आर॑न् ।
वा॒व॒न्धि यज्यूँ॑रु॒त तेषु॑ धे॒ह्योजो॒ जने॑षु॒ येषु॑ ते॒ स्याम॑ ॥१३॥

Ye chakananta chakananta nu te marta amrita mo te anha aran
Vavandhi yajyunruta teshu dhehyojo janeshu yeshu te syama