Sukta 32

32.1

12 gaturatreyah, indrah, trishtup

अद॑र्द॒रुत्स॒मसृ॑जो॒ वि खानि॒ त्वम॑र्ण॒वान् ब॑द्बधा॒नाँ अ॑रम्णाः ।
म॒हान्त॑मिन्द्र॒ पर्व॑तं॒ वि यद् वः सृ॒जो वि धारा॒ अव॑ दान॒वं ह॑न् ॥१॥

Adardarutsamasrijo vi khani tvamarnavan badbadhanam aramnah
Mahantamindra parvatam vi yad vah srijo vi dhara ava danavam han

त्वमुत्साँ॑ ऋ॒तुभि॑र्बद्बधा॒नाँ अरं॑ह॒ ऊध॒ः पर्व॑तस्य वज्रिन् ।
अहिं॑ चिदुग्र॒ प्रयु॑तं॒ शया॑नं जघ॒न्वाँ इ॑न्द्र॒ तवि॑षीमधत्थाः ॥२॥

Tvamutsam ritubhirbadbadhanam aranha udhah parvatasya vajrin
Ahim chidugra prayutam shayanam jaghanvam indra tavishimadhatthah

त्यस्य॑ चिन्मह॒तो निर्मृ॒गस्य॒ वध॑र्जघान॒ तवि॑षीभि॒रिन्द्र॑ः ।
य एक॒ इद॑प्र॒तिर्मन्य॑मान॒ आद॑स्माद॒न्यो अ॑जनिष्ट॒ तव्या॑न् ॥३॥

Tyasya chinmahato nirmrigasya vadharjaghana tavishibhirindrah
Ya eka idapratirmanyamana adasmadanyo ajanishta tavyan

त्यं चि॑देषां स्व॒धया॒ मद॑न्तं मि॒हो नपा॑तं सु॒वृधं॑ तमो॒गाम् ।
वृष॑प्रभर्मा दान॒वस्य॒ भामं॒ वज्रे॑ण व॒ज्री नि ज॑घान॒ शुष्ण॑म् ॥४॥

Tyam chidesham svadhaya madantam miho napatam suvridham tamogam
Vrishaprabharma danavasya bhamam vajrena vajri ni jaghana shushnam

त्यं चि॑दस्य॒ क्रतु॑भि॒र्निष॑त्तमम॒र्मणो॑ वि॒ददिद॑स्य॒ मर्म॑ ।
यदीं॑ सुक्षत्र॒ प्रभृ॑ता॒ मद॑स्य॒ युयु॑त्सन्तं॒ तम॑सि ह॒र्म्ये धाः ॥५॥

Tyam chidasya kratubhirnishattamamarmano vidadidasya marma
Yadim sukshatra prabhrita madasya yuyutsantam tamasi harmye dhah

त्यं चि॑दि॒त्था क॑त्प॒यं शया॑नमसू॒र्ये तम॑सि वावृधा॒नम् ।
तं चि॑न्मन्दा॒नो वृ॑ष॒भः सु॒तस्यो॒च्चैरिन्द्रो॑ अप॒गूर्या॑ जघान ॥६॥

Tyam chidittha katpayam shayanamasurye tamasi vavridhanam
Tam chinmandano vrishabhah sutasyochchairindro apagurya jaghana

उद् यदिन्द्रो॑ मह॒ते दा॑न॒वाय॒ वध॒र्यमि॑ष्ट॒ सहो॒ अप्र॑तीतम् ।
यदीं॒ वज्र॑स्य॒ प्रभृ॑तौ द॒दाभ॒ विश्व॑स्य ज॒न्तोर॑ध॒मं च॑कार ॥७॥

Ud yadindro mahate danavaya vadharyamishta saho apratitam
Yadim vajrasya prabhritau dadabha vishvasya jantoradhamam chakara

त्यं चि॒दर्णं॑ मधु॒पं शया॑नमसि॒न्वं व॒व्रं मह्याद॑दु॒ग्रः ।
अ॒पाद॑म॒त्रं म॑ह॒ता व॒धेन॒ नि दु॑र्यो॒ण आ॑वृणङ् मृ॒ध्रवा॑चम् ॥८॥

Tyam chidarnam madhupam shayanamasinvam vavram mahyadadugrah
Apadamatram mahata vadhena ni duryona avrinang mridhravacham

को अ॑स्य॒ शुष्मं॒ तवि॑षीं वरात॒ एको॒ धना॑ भरते॒ अप्र॑तीतः ।
इ॒मे चि॑दस्य॒ ज्रय॑सो॒ नु दे॒वी इन्द्र॒स्यौज॑सो भि॒यसा॑ जिहाते ॥९॥

Ko asya shushmam tavishim varata eko dhana bharate apratitah
Ime chidasya jrayaso nu devi indrasyaujaso bhiyasa jihate

न्य॑स्मै दे॒वी स्वधि॑तिर्जिहीत॒ इन्द्रा॑य गा॒तुरु॑श॒तीव॑ येमे ।
सं यदोजो॑ यु॒वते॒ विश्व॑माभि॒रनु॑ स्व॒धाव्ने॑ क्षि॒तयो॑ नमन्त ॥१०॥

Nyasmai devi svadhitirjihita indraya gaturushativa yeme
Sam yadojo yuvate vishvamabhiranu svadhavne kshitayo namanta

एकं॒ नु त्वा॒ सत्प॑तिं॒ पाञ्च॑जन्यं जा॒तं शृ॑णोमि य॒शसं॒ जने॑षु ।
तं मे॑ जगृभ्र आ॒शसो॒ नवि॑ष्ठं दो॒षा वस्तो॒र्हव॑मानास॒ इन्द्र॑म् ॥११॥

Ekam nu tva satpatim panchajanyam jatam shrinomi yashasam janeshu
Tam me jagribhra ashaso navishtham dosha vastorhavamanasa indram

ए॒वा हि त्वामृ॑तु॒था या॒तय॑न्तं म॒घा विप्रे॑भ्यो॒ दद॑तं शृ॒णोमि॑ ।
किं ते॑ ब्र॒ह्माणो॑ गृहते॒ सखा॑यो॒ ये त्वा॒या नि॑द॒धुः काम॑मिन्द्र ॥१२॥

Eva hi tvamritutha yatayantam magha viprebhyo dadatam shrinomi
Kim te brahmano grihate sakhayo ye tvaya nidadhuh kamamindra