Sukta 30

30.1

15 babhruratreyah, indrah, 12-15 rinanchayendrau, trishtup

क्व१ स्य वी॒रः को अ॑पश्य॒दिन्द्रं॑ सु॒खर॑थ॒मीय॑मानं॒ हरि॑भ्याम् ।
यो रा॒या व॒ज्री सु॒तसो॑ममि॒च्छन् तदोको॒ गन्ता॑ पुरुहू॒त ऊ॒ती ॥१॥

Kva1 sya virah ko apashyadindram sukharathamiyamanam haribhyam
Yo raya vajri sutasomamichchhan tadoko ganta puruhuta uti

अवा॑चचक्षं प॒दम॑स्य स॒स्वरु॒ग्रं नि॑धा॒तुरन्वा॑यमि॒च्छन् ।
अपृ॑च्छम॒न्याँ उ॒त ते म॑ आहु॒रिन्द्रं॒ नरो॑ बुबुधा॒ना अ॑शेम ॥२॥

Avachachaksham padamasya sasvarugram nidhaturanvayamichchhan
Aprichchhamanyam uta te ma ahurindram naro bubudhana ashema

प्र नु व॒यं सु॒ते या ते॑ कृ॒तानीन्द्र॒ ब्रवा॑म॒ यानि॑ नो॒ जुजो॑षः ।
वेद॒दवि॑द्वाञ्छृ॒णव॑च्च वि॒द्वान् वह॑ते॒ऽयं म॒घवा॒ सर्व॑सेनः ॥३॥

Pra nu vayam sute ya te kritanindra bravama yani no jujoshah
Vedadavidvanchhrinavachcha vidvan vahateyam maghava sarvasenah

स्थि॒रं मन॑श्चकृषे जा॒त इ॑न्द्र॒ वेषीदेको॑ यु॒धये॒ भूय॑सश्चित् ।
अश्मा॑नं चि॒च्छव॑सा दिद्युतो॒ वि वि॒दो गवा॑मू॒र्वमु॒स्रिया॑णाम् ॥४॥

Sthiram manashchakrishe jata indra veshideko yudhaye bhuyasashchit
Ashmanam chichchhavasa didyuto vi vido gavamurvamusriyanam

प॒रो यत् त्वं प॑र॒म आ॒जनि॑ष्ठाः परा॒वति॒ श्रुत्यं॒ नाम॒ बिभ्र॑त् ।
अत॑श्चि॒दिन्द्रा॑दभयन्त दे॒वा विश्वा॑ अ॒पो अ॑जयद् दा॒सप॑त्नीः ॥५॥

Paro yat tvam parama ajanishthah paravati shrutyam nama bibhrat
Atashchidindradabhayanta deva vishva apo ajayad dasapatnih

तुभ्येदे॒ते म॒रुत॑ः सु॒शेवा॒ अर्च॑न्त्य॒र्कं सु॒न्वन्त्यन्ध॑ः ।
अहि॑मोहा॒नम॒प आ॒शया॑नं॒ प्र मा॒याभि॑र्मा॒यिनं॑ सक्ष॒दिन्द्र॑ः ॥६॥

Tubhyedete marutah susheva archantyarkam sunvantyandhah
Ahimohanamapa ashayanam pra mayabhirmayinam sakshadindrah

वि षू मृधो॑ ज॒नुषा॒ दान॒मिन्व॒न्नह॒न् गवा॑ मघवन् त्संचका॒नः ।
अत्रा॑ दा॒सस्य॒ नमु॑चे॒ः शिरो॒ यदव॑र्तयो॒ मन॑वे गा॒तुमि॒च्छन् ॥७॥

Vi shu mridho janusha danaminvannahan gava maghavan tsanchakanah
Atra dasasya namucheh shiro yadavartayo manave gatumichchhan

युजं॒ हि मामकृ॑था॒ आदिदि॑न्द्र॒ शिरो॑ दा॒सस्य॒ नमु॑चेर्मथा॒यन् ।
अश्मा॑नं चित् स्व॒र्यं१ वर्त॑मानं॒ प्र च॒क्रिये॑व॒ रोद॑सी म॒रुद्भ्य॑ः ॥८॥

Yujam hi mamakritha adidindra shiro dasasya namuchermathayan
Ashmanam chit svaryan1 vartamanam pra chakriyeva rodasi marudbhyah

स्त्रियो॒ हि दा॒स आयु॑धानि च॒क्रे किं मा॑ करन्नब॒ला अ॑स्य॒ सेना॑ः ।
अ॒न्तर्ह्यख्य॑दु॒भे अ॑स्य॒ धेने॒ अथोप॒ प्रैद्यु॒ यु॒धये॒ दस्यु॒मिन्द्र॑ः ॥९॥

Striyo hi dasa ayudhani chakre kim ma karannabala asya senah
Antarhyakhyadubhe asya dhene athopa praidyu yudhaye dasyumindrah

समत्र॒ गावो॒ऽभितो॑ऽनवन्ते॒हेह॑ व॒त्सैर्वियु॑ता॒ यदास॑न् ।
सं ता इन्द्रो॑ असृजदस्य शा॒कैर्यदीं॒ सोमा॑स॒ः सुषु॑ता॒ अम॑न्दन् ॥१०॥

Samatra gavobhitonavanteheha vatsairviyuta yadasan
Sam ta indro asrijadasya shakairyadim somasah sushuta amandan

यदीं॒ सोमा॑ ब॒भ्रुधू॑ता॒ अम॑न्द॒न्नरो॑रवीद् वृष॒भः साद॑नेषु ।
पु॒रं॒द॒रः प॑पि॒वाँ इन्द्रो॑ अस्य॒ पुन॒र्गवा॑मददादु॒स्रिया॑णाम् ॥११॥

Yadim soma babhrudhuta amandannaroravid vrishabhah sadaneshu
Purandarah papivam indro asya punargavamadadadusriyanam

भ॒द्रमि॒दं रु॒शमा॑ अग्ने अक्र॒न् गवां॑ च॒त्वारि॒ दद॑तः स॒हस्रा॑ ।
ऋ॒णं॒च॒यस्य॒ प्रय॑ता म॒घानि॒ प्रत्य॑ग्रभीष्म॒ नृत॑मस्य नृ॒णाम् ॥१२॥

Bhadramidam rushama agne akran gavam chatvari dadatah sahasra
Rinanchayasya prayata maghani pratyagrabhishma nritamasya nrinam

सु॒पेश॑सं॒ माव॑ सृज॒न्त्यस्तं॒ गवां॑ स॒हस्रै॑ रु॒शमा॑सो अग्ने ।
ती॒व्रा इन्द्र॑मममन्दुः सु॒तासो॒ऽक्तोर्व्यु॑ष्टौ॒ परि॑तक्म्यायाः ॥१३॥

Supeshasam mava srijantyastam gavam sahasrai rushamaso agne
Tivra indramamamanduh sutasoktorvyushtau paritakmyayah

औच्छ॒त् सा रात्री॒ परि॑तक्म्या॒ याँ ऋ॑णंच॒ये राज॑नि रु॒शमा॑नाम् ।
अत्यो॒ न वा॒जी र॒घुर॒ज्यमा॑नो ब॒भ्रुश्च॒त्वार्य॑सनत् स॒हस्रा॑ ॥१४॥

Auchchhat sa ratri paritakmya yam rinanchaye rajani rushamanam
Atyo na vaji raghurajyamano babhrushchatvaryasanat sahasra

चतु॑ःसहस्रं॒ गव्य॑स्य प॒श्वः प्रत्य॑ग्रभीष्म रु॒शमे॑ष्वग्ने ।
घ॒र्मश्चि॑त् त॒प्तः प्र॒वृजे॒ य आसी॑दय॒स्मय॒स्तम्वादा॑म॒ विप्रा॑ः ॥१५॥

Chatuhsahasram gavyasya pashvah pratyagrabhishma rushameshvagne
Gharmashchit taptah pravrije ya asidayasmayastamvadama viprah