Sukta 29

29.1

15 gaurivitih shaktyah, indrah, 9(prathamapadasya) ushana va, trishtup

त्र्य॑र्य॒मा मनु॑षो दे॒वता॑ता॒ त्री रो॑च॒ना दि॒व्या धा॑रयन्त ।
अर्च॑न्ति त्वा म॒रुत॑ः पू॒तद॑क्षा॒स्त्वमे॑षा॒मृषि॑रिन्द्रासि॒ धीर॑ः ॥१॥

Tryaryama manusho devatata tri rochana divya dharayanta
Archanti tva marutah putadakshastvameshamrishirindrasi dhirah

अनु॒ यदीं॑ म॒रुतो॑ मन्दसा॒नमार्च॒न्निन्द्रं॑ पपि॒वांसं॑ सु॒तस्य॑ ।
आद॑त्त॒ वज्र॑म॒भि यदहिं॒ हन्न॒पो य॒ह्वीर॑सृज॒त् सर्त॒वा उ॑ ॥२॥

Anu yadim maruto mandasanamarchannindram papivansam sutasya
Adatta vajramabhi yadahim hannapo yahvirasrijat sartava u

उ॒त ब्र॑ह्माणो मरुतो मे अ॒स्येन्द्र॒ः सोम॑स्य॒ सुषु॑तस्य पेयाः ।
तद्धि ह॒व्यं मनु॑षे॒ गा अवि॑न्द॒दह॒न्नहिं॑ पपि॒वाँ इन्द्रो॑ अस्य ॥३॥

Uta brahmano maruto me asyendrah somasya sushutasya peyah
Taddhi havyam manushe ga avindadahannahim papivam indro asya

आद् रोद॑सी वित॒रं वि ष्क॑भायत् संविव्या॒नश्चि॑द् भि॒यसे॑ मृ॒गं क॑ः ।
जिग॑र्ति॒मिन्द्रो॑ अप॒जर्गु॑राण॒ः प्रति॑ श्व॒सन्त॒मव॑ दान॒वं ह॑न् ॥४॥

Ad rodasi vitaram vi shkabhayat sanvivyanashchid bhiyase mrigam kah
Jigartimindro apajarguranah prati shvasantamava danavam han

अध॒ क्रत्वा॑ मघव॒न् तुभ्यं॑ दे॒वा अनु॒ विश्वे॑ अददुः सोम॒पेय॑म् ।
यत् सूर्य॑स्य ह॒रित॒ः पत॑न्तीः पु॒रः स॒तीरुप॑रा॒ एत॑शे॒ कः ॥५॥

Adha kratva maghavan tubhyam deva anu vishve adaduh somapeyam
Yat suryasya haritah patantih purah satirupara etashe kah

नव॒ यद॑स्य नव॒तिं च॑ भो॒गान् त्सा॒कं वज्रे॑ण म॒घवा॑ विवृ॒श्चत् ।
अर्च॒न्तीन्द्रं॑ म॒रुत॑ः स॒धस्थे॒ त्रैष्टु॑भेन॒ वच॑सा बाधत॒ द्याम् ॥६॥

Nava yadasya navatim cha bhogan tsakam vajrena maghava vivrishchat
Archantindram marutah sadhasthe traishtubhena vachasa badhata dyam

सखा॒ सख्ये॑ अपच॒त् तूय॑म॒ग्निर॒स्य क्रत्वा॑ महि॒षा त्री श॒तानि॑ ।
त्री सा॒कमिन्द्रो॒ मनु॑ष॒ः सरां॑सि सु॒तं पि॑बद् वृत्र॒हत्या॑य॒ सोम॑म् ॥७॥

Sakha sakhye apachat tuyamagnirasya kratva mahisha tri shatani
Tri sakamindro manushah saransi sutam pibad vritrahatyaya somam

त्री यच्छ॒ता म॑हि॒षाणा॒मघो॒ मास्त्री सरां॑सि म॒घवा॑ सो॒म्यापा॑ः ।
का॒रं न विश्वे॑ अह्वन्त दे॒वा भर॒मिन्द्रा॑य॒ यदहिं॑ ज॒घान॑ ॥८॥

Tri yachchhata mahishanamagho mastri saransi maghava somyapah
Karam na vishve ahvanta deva bharamindraya yadahim jaghana

उ॒शना॒ यत् स॑ह॒स्यै॒३रया॑तं गृ॒हमि॑न्द्र जूजुवा॒नेभि॒रश्वै॑ः ।
व॒न्वा॒नो अत्र॑ स॒रथं॑ ययाथ॒ कुत्से॑न दे॒वैरव॑नोर्ह॒ शुष्ण॑म् ॥९॥

Ushana yat sahasyai3rayatam grihamindra jujuvanebhirashvaih
Vanvano atra saratham yayatha kutsena devairavanorha shushnam

प्रान्यच्च॒क्रम॑वृह॒ः सूर्य॑स्य॒ कुत्सा॑या॒न्यद् वरि॑वो॒ यात॑वेऽकः ।
अ॒नासो॒ दस्यूँ॑रमृणो व॒धेन॒ नि दु॑र्यो॒ण आ॑वृणङ् मृ॒ध्रवा॑चः ॥१०॥

Pranyachchakramavrihah suryasya kutsayanyad varivo yatavekah
Anaso dasyunramrino vadhena ni duryona avrinang mridhravachah

स्तोमा॑सस्त्वा॒ गौरि॑वीतेरवर्ध॒न्नर॑न्धयो वैदथि॒नाय॒ पिप्रु॑म् ।
आ त्वामृ॒जिश्वा॑ स॒ख्याय॑ चक्रे॒ पच॑न् प॒क्तीरपि॑ब॒ः सोम॑मस्य ॥११॥

Stomasastva gauriviteravardhannarandhayo vaidathinaya piprum
A tvamrijishva sakhyaya chakre pachan paktirapibah somamasya

नव॑ग्वासः सु॒तसो॑मास॒ इन्द्रं॒ दश॑ग्वासो अ॒भ्य॑र्चन्त्य॒र्कैः ।
गव्यं॑ चिदू॒र्वम॑पि॒धान॑वन्तं॒ तं चि॒न्नर॑ः शशमा॒ना अप॑ व्रन् ॥१२॥

Navagvasah sutasomasa indram dashagvaso abhyarchantyarkaih
Gavyam chidurvamapidhanavantam tam chinnarah shashamana apa vran

क॒थो नु ते॒ परि॑ चराणि वि॒द्वान् वी॒र्या॑ मघव॒न् या च॒कर्थ॑ ।
या चो॒ नु नव्या॑ कृ॒णव॑ः शविष्ठ॒ प्रेदु॒ ता ते॑ वि॒दथे॑षु ब्रवाम ॥१३॥

Katho nu te pari charani vidvan virya maghavan ya chakartha
Ya cho nu navya krinavah shavishtha predu ta te vidatheshu bravama

ए॒ता विश्वा॑ चकृ॒वाँ इ॑न्द्र॒ भूर्यप॑रीतो ज॒नुषा॑ वी॒र्ये॑ण ।
या चि॒न्नु व॑ज्रिन् कृ॒णवो॑ दधृ॒ष्वान् न ते॑ व॒र्ता तवि॑ष्या अस्ति॒ तस्या॑ः ॥१४॥

Eta vishva chakrivam indra bhuryaparito janusha viryena
Ya chinnu vajrin krinavo dadhrishvan na te varta tavishya asti tasyah

इन्द्र॒ ब्रह्म॑ क्रि॒यमा॑णा जुषस्व॒ या ते॑ शविष्ठ॒ नव्या॒ अक॑र्म ।
वस्त्रे॑व भ॒द्रा सुकृ॑ता वसू॒यू रथं॒ न धीर॒ः स्वपा॑ अतक्षम् ॥१५॥

Indra brahma kriyamana jushasva ya te shavishtha navya akarma
Vastreva bhadra sukrita vasuyu ratham na dhirah svapa ataksham