Sukta 28

28.1

6 vishvavaratreyi, agnih, 1, 3 trishtup, 2 jagati, 4 anushtup, 5-6 gayatri

समि॑द्धो अ॒ग्निर्दि॒वि शो॒चिर॑श्रेत् प्र॒त्यङ्ङु॒षस॑मुर्वि॒या वि भा॑ति ।
एति॒ प्राची॑ वि॒श्ववा॑रा॒ नमो॑भिर्दे॒वाँ ईळा॑ना ह॒विषा॑ घृ॒ताची॑ ॥१॥

Samiddho agnirdivi shochirashret pratyanngushasamurviya vi bhati
Eti prachi vishvavara namobhirdevam ilana havisha ghritachi

28.2

स॒मि॒ध्यमा॑नो अ॒मृत॑स्य राजसि ह॒विष्कृ॒ण्वन्तं॑ सचसे स्व॒स्तये॑ ।
विश्वं॒ स ध॑त्ते॒ द्रवि॑णं॒ यमिन्व॑स्याति॒थ्यम॑ग्ने॒ नि च॑ धत्त॒ इत् पु॒रः ॥२॥

Samidhyamano amritasya rajasi havishkrinvantam sachase svastaye
Vishvam sa dhatte dravinam yaminvasyatithyamagne ni cha dhatta it purah

28.3

अग्ने॒ शर्ध॑ मह॒ते सौभ॑गाय॒ तव॑ द्यु॒म्नान्यु॑त्त॒मानि॑ सन्तु ।
सं जा॑स्प॒त्यं सु॒यम॒मा कृ॑णुष्व शत्रूय॒ताम॒भि ति॑ष्ठा॒ महां॑सि ॥३॥

Agne shardha mahate saubhagaya tava dyumnanyuttamani santu
Sam jaspatyam suyamama krinushva shatruyatamabhi tishtha mahansi

28.4

समि॑द्धस्य॒ प्रम॑ह॒सोऽग्ने॒ वन्दे॒ तव॒ श्रिय॑म् ।
वृ॒ष॒भो द्यु॒म्नवाँ॑ असि॒ सम॑ध्व॒रेष्वि॑ध्यसे ॥४॥

Samiddhasya pramahasogne vande tava shriyam
Vrishabho dyumnavam asi samadhvareshvidhyase

28.5

समि॑द्धो अग्न आहुत दे॒वान् य॑क्षि स्वध्वर । त्वं हि ह॑व्य॒वाळसि॑ ॥५॥

Samiddho agna ahuta devan yakshi svadhvara, tvam hi havyavalasi

28.6

आ जु॑होता दुव॒स्यता॒ऽग्निं प्र॑य॒त्य॑ध्व॒रे । वृ॒णी॒ध्वं ह॑व्य॒वाह॑नम् ॥६॥

A juhota duvasyatagnim prayatyadhvare, vrinidhvam havyavahanam