সূক্ত 28

28.1

৬ বিশ্ববারাত্রেয়ী। অগ্নিঃ। ১, ৩ ত্রিষ্টুপ্, ২ জগতী, ৪ অনুষ্টুপ্, ৫-৬ গায়ত্রী।

সমিদ্ধো অগ্নির্দিবি শোচিরশ্রেৎ প্রত্যঙ্ঙুষসমুর্বিয়া বি ভাতি ।
এতি প্রাচী বিশ্ববারা নমোভির্দেবাঁ ঈলানা হবিষা ঘৃতাচী ॥১॥

28.2

সমিধ্যমানো অমৃতস্য রাজসি হবিষ্কৃণ্বন্তং সচসে স্বস্তয়ে ।
বিশ্বং স ধত্তে দ্রবিণং যমিন্বস্যাতিথ্যমগ্নে নি চ ধত্ত ইৎ পুরঃ ॥২॥

28.3

অগ্নে শর্ধ মহতে সৌভগায় তব দ্যুম্নান্যুত্তমানি সন্তু ।
সং জাস্পত্যং সুয়মমা কৃণুষ্ব শত্রূয়তামভি তিষ্ঠা মহাংসি ॥৩॥

28.4

সমিদ্ধস্য প্রমহসোঽগ্নে বন্দে তব শ্রিয়ম্ ।
বৃষভো দ্যুম্নবাঁ অসি সমধ্বরেষ্বিধ্যসে ॥৪॥

28.5

সমিদ্ধো অগ্ন আহুত দেবান্ যক্ষি স্বধ্বর । ত্বং হি হব্যবালসি ॥৫॥

28.6

আ জুহোতা দুবস্যতাঽগ্নিং প্রয়ত্যধ্বরে । বৃণীধ্বং হব্যবাহনম্ ॥৬॥