সূক্ত 29

29.1

১৫ গৌরিবীতিঃ শাক্ত্যঃ। ইন্দ্রঃ, ৯(প্রথমপাদস্য) উশনা বা। ত্রিষ্টুপ্।

ত্র্যর্যমা মনুষো দেবতাতা ত্রী রোচনা দিব্যা ধারয়ন্ত ।
অর্চন্তি ত্বা মরুতঃ পূতদক্ষাস্ত্বমেষামৃষিরিন্দ্রাসি ধীরঃ ॥১॥

অনু যদীং মরুতো মন্দসানমার্চন্নিন্দ্রং পপিবাংসং সুতস্য ।
আদত্ত বজ্রমভি যদহিং হন্নপো যহ্বীরসৃজৎ সর্তবা উ ॥২॥

উত ব্রহ্মাণো মরুতো মে অস্যেন্দ্রঃ সোমস্য সুষুতস্য পেয়াঃ ।
তদ্ধি হব্যং মনুষে গা অবিন্দদহন্নহিং পপিবাঁ ইন্দ্রো অস্য ॥৩॥

আদ্ রোদসী বিতরং বি ষ্কভায়ৎ সংবিব্যানশ্চিদ্ ভিয়সে মৃগং কঃ ।
জিগর্তিমিন্দ্রো অপজর্গুরাণঃ প্রতি শ্বসন্তমব দানবং হন্ ॥৪॥

অধ ক্রত্বা মঘবন্ তুভ্যং দেবা অনু বিশ্বে অদদুঃ সোমপেয়ম্ ।
যৎ সূর্যস্য হরিতঃ পতন্তীঃ পুরঃ সতীরুপরা এতশে কঃ ॥৫॥

নব যদস্য নবতিং চ ভোগান্ ত্সাকং বজ্রেণ মঘবা বিবৃশ্চৎ ।
অর্চন্তীন্দ্রং মরুতঃ সধস্থে ত্রৈষ্টুভেন বচসা বাধত দ্যাম্ ॥৬॥

সখা সখ্যে অপচৎ তূয়মগ্নিরস্য ক্রত্বা মহিষা ত্রী শতানি ।
ত্রী সাকমিন্দ্রো মনুষঃ সরাংসি সুতং পিবদ্ বৃত্রহত্যায় সোমম্ ॥৭॥

ত্রী যচ্ছতা মহিষাণামঘো মাস্ত্রী সরাংসি মঘবা সোম্যাপাঃ ।
কারং ন বিশ্বে অহ্বন্ত দেবা ভরমিন্দ্রায় যদহিং জঘান ॥৮॥

উশনা যৎ সহস্যৈ৩রয়াতং গৃহমিন্দ্র জূজুবানেভিরশ্বৈঃ ।
বন্বানো অত্র সরথং যয়াথ কুত্সেন দেবৈরবনোর্হ শুষ্ণম্ ॥৯॥

প্রান্যচ্চক্রমবৃহঃ সূর্যস্য কুত্সায়ান্যদ্ বরিবো যাতবেঽকঃ ।
অনাসো দস্যূঁরমৃণো বধেন নি দুর্যোণ আবৃণঙ্ মৃধ্রবাচঃ ॥১০॥

স্তোমাসস্ত্বা গৌরিবীতেরবর্ধন্নরন্ধয়ো বৈদথিনায় পিপ্রুম্ ।
আ ত্বামৃজিশ্বা সখ্যায় চক্রে পচন্ পক্তীরপিবঃ সোমমস্য ॥১১॥

নবগ্বাসঃ সুতসোমাস ইন্দ্রং দশগ্বাসো অভ্যর্চন্ত্যর্কৈঃ ।
গব্যং চিদূর্বমপিধানবন্তং তং চিন্নরঃ শশমানা অপ ব্রন্ ॥১২॥

কথো নু তে পরি চরাণি বিদ্বান্ বীর্যা মঘবন্ যা চকর্থ ।
যা চো নু নব্যা কৃণবঃ শবিষ্ঠ প্রেদু তা তে বিদথেষু ব্রবাম ॥১৩॥

এতা বিশ্বা চকৃবাঁ ইন্দ্র ভূর্যপরীতো জনুষা বীর্যেণ ।
যা চিন্নু বজ্রিন্ কৃণবো দধৃষ্বান্ ন তে বর্তা তবিষ্যা অস্তি তস্যাঃ ॥১৪॥

ইন্দ্র ব্রহ্ম ক্রিয়মাণা জুষস্ব যা তে শবিষ্ঠ নব্যা অকর্ম ।
বস্ত্রেব ভদ্রা সুকৃতা বসূয়ূ রথং ন ধীরঃ স্বপা অতক্ষম্ ॥১৫॥