সূক্ত 55

55.1

১০ বামদেবো গৌতমঃ। বিশ্বে দেবাঃ। ত্রিষ্টুপ্ ৮-১০ গায়ত্রী ।

কো বস্ত্রাতা বসবঃ কো বরূতা দ্যাবাভূমী অদিতে ত্রাসীথাং নঃ ।
সহীয়সো বরুণ মিত্র মর্তাৎ কো বোঽধ্বরে বরিবো ধাতি দেবাঃ ॥১॥

প্র যে ধামানি পূর্ব্যাণ্যর্চান্ বি যদুচ্ছান্ বিয়োতারো অমূরাঃ ।
বিধাতারো বি তে দধুরজস্রা ঋতধীতয়ো রুরুচন্ত দস্মাঃ ॥২॥

প্র পস্ত্যা৩মদিতিং সিন্ধুমর্কৈঃ স্বস্তিমীলে সখ্যায় দেবীম্ ।
উভে যথা নো অহনী নিপাত উষাসানক্তা করতামদব্ধে ॥৩॥

ব্যর্যমা বরুণশ্চেতি পন্থামিষস্পতিঃ সুবিতং গাতুমগ্নিঃ ।
ইন্দ্রাবিষ্ণূ নৃবদু ষু স্তবানা শর্ম নো যন্তমমবদ্ বরূথম্ ॥৪॥

আ পর্বতস্য মরুতামবাংসি দেবস্য ত্রাতুরব্রি ভগস্য ।
পাৎ পতির্জন্যাদংহসো নো মিত্রো মিত্রিয়াদুত ন উরুষ্যেৎ ॥৫॥

নূ রোদসী অহিনা বুধ্ন্যেন স্তুবীত দেবী অপ্যেভিরিষ্টৈঃ ।
সমুদ্রং ন সংচরণে সনিষ্যবো ঘর্মস্বরসো নদ্যো৩ অপ ব্রন্ ॥৬॥

দেবৈর্নো দেব্যদিতির্নি পাতু দেবস্ত্রাতা ত্রায়তামপ্রয়ুচ্ছন্ ।
নহি মিত্রস্য বরুণস্য ধাসিমর্হামসি প্রমিয়ং সান্বগ্নেঃ ॥৭॥

অগ্নিরীশে বসব্যস্যাগ্নির্মহঃ সৌভগস্য । তান্যস্মভ্যং রাসতে ॥৮॥

উষো মঘোন্যা বহ সূনৃতে বার্যা পুরু । অস্মভ্যং বাজিনীবতি ॥৯॥

তৎ সু নঃ সবিতা ভগো বরুণো মিত্রো অর্যমা । ইন্দ্রো নো রাধসা গমৎ ॥১০॥