সূক্ত 54

54.1

৬ বামদেবো গৌতমঃ। সবিতা।জগতী, ৬ ত্রিষ্টুপ্।

অভূদ্ দেবঃ সবিতা বন্দ্যো নু ন ইদানীমহ্ন উপবাচ্যো নৃভিঃ ।
বি যো রত্না ভজতি মানবেভ্যঃ শ্রেষ্ঠং নো অত্র দ্রবিণং যথা দধৎ ॥১॥

54.2

দেবেভ্যো হি প্রথমং যজ্ঞিয়েভ্যোঽমৃতত্বং সুবসি ভাগমুত্তমম্ ।
আদিদ্ দামানং সবিতর্ব্যূর্ণুষেঽনূচীনা জীবিতা মানুষেভ্যঃ ॥২॥

54.3

অচিত্তী যচ্চকৃমা দৈব্যে জনে দীনৈর্দক্ষৈঃ প্রভূতী পূরুষত্বতা ।
দেবেষু চ সবিতর্মানুষেষু চ ত্বং নো অত্র সুবতাদনাগসঃ ॥৩॥

54.4

ন প্রমিয়ে সবিতুর্দৈব্যস্য তদ্ যথা বিশ্বং ভুবনং ধারয়িষ্যতি ।
যৎ পৃথিব্যা বরিমন্না স্বঙ্গুরির্বর্ষ্মন্ দিবঃ সুবতি সত্যমস্য তৎ ॥৪॥

54.5

ইন্দ্রজ্যেষ্ঠান্ বৃহদ্ভ্যঃ পর্বতেভ্যঃ ক্ষয়াঁ এভ্যঃ সুবসি পস্ত্যাবতঃ ।
যথায়থা পতয়ন্তো বিয়েমির এবৈব তস্থুঃ সবিতঃ সবায় তে ॥৫॥

54.6

যে তে ত্রিরহন্ ত্সবিতঃ সবাসো দিবেদিবে সৌভগমাসুবন্তি ।
ইন্দ্রো দ্যাবাপৃথিবী সিন্ধুরদ্ভিরাদিত্যৈর্নো অদিতিঃ শর্ম যংসৎ ॥৬॥