সূক্ত 53

53.1

৭ বামদেবো গৌতমঃ। সবিতা। জগতী।

তদ্ দেবস্য সবিতুর্বার্যং মহদ্ বৃণীমহে অসুরস্য প্রচেতসঃ ।
ছর্দির্যেন দাশুষে যচ্ছতি ত্মনা তন্নো মহাঁ উদয়ান্ দেবো অক্তুভিঃ ॥১॥

53.2

দিবো ধর্তা ভুবনস্য প্রজাপতিঃ পিশঙ্গং দ্রাপিং প্রতি মুঞ্চতে কবিঃ ।
বিচক্ষণঃ প্রথয়ন্নাপৃণন্নুর্বজীজনৎ সবিতা সুম্নমুক্থ্যম্ ॥২॥

53.3

আপ্রা রজাংসি দিব্যানি পার্থিবা শ্লোকং দেবঃ কৃণুতে স্বায় ধর্মণে ।
প্র বাহূ অস্রাক্ সবিতা সবীমনি নিবেশয়ন্প্রসুবন্নক্তুভির্জগৎ ॥৩॥

53.4

অদাভ্যো ভুবনানি প্রচাকশদ্ ব্রতানি দেবঃ সবিতাভি রক্ষতে ।
প্রাস্রাগ্বাহূ ভুবনস্য প্রজাভ্যো ধৃতব্রতো মহো অজ্মস্য রাজতি ॥৪॥

53.5

ত্রিরন্তরিক্ষং সবিতা মহিত্বনা ত্রী রজাংসি পরিভুস্ত্রীণি রোচনা ।
তিস্রো দিবঃ পৃথিবীস্তিস্র ইন্বতি ত্রিভির্ব্রতৈরভি নো রক্ষতি ত্মনা ॥৫॥

53.6

বৃহত্সুম্নঃ প্রসবীতা নিবেশনো জগতঃ স্থাতুরুভয়স্য যো বশী ।
স নো দেবঃ সবিতা শর্ম যচ্ছত্বস্মে ক্ষয়ায় ত্রিবরূথমংহসঃ ॥৬॥

53.7

আগন্ দেব ঋতুভির্বর্ধতু ক্ষয়ং দধাতু নঃ সবিতা সুপ্রজামিষম্ ।
স নঃ ক্ষপাভিরহভিশ্চ জিন্বতু প্রজাবন্তং রয়িমস্মে সমিন্বতু ॥৭॥