Sukta 53

53.1

7 vamadevo gautamah, savita, jagati

तद् दे॒वस्य॑ सवि॒तुर्वार्यं॑ म॒हद् वृ॑णी॒महे॒ असु॑रस्य॒ प्रचे॑तसः ।
छ॒र्दिर्येन॑ दा॒शुषे॒ यच्छ॑ति॒ त्मना॒ तन्नो॑ म॒हाँ उद॑यान् दे॒वो अ॒क्तुभि॑ः ॥१॥

Tad devasya saviturvaryam mahad vrinimahe asurasya prachetasah
Chhardiryena dashushe yachchhati tmana tanno maham udayan devo aktubhih

53.2

दि॒वो ध॒र्ता भुव॑नस्य प्र॒जाप॑तिः पि॒शङ्गं॑ द्रा॒पिं प्रति॑ मुञ्चते क॒विः ।
वि॒च॒क्ष॒णः प्र॒थय॑न्नापृ॒णन्नु॒र्वजी॑जनत् सवि॒ता सु॒म्नमु॒क्थ्य॑म् ॥२॥

Divo dharta bhuvanasya prajapatih pishangam drapim prati munchate kavih
Vichakshanah prathayannaprinannurvajijanat savita sumnamukthyam

53.3

आप्रा॒ रजां॑सि दि॒व्यानि॒ पार्थि॑वा॒ श्लोकं॑ दे॒वः कृ॑णुते॒ स्वाय॒ धर्म॑णे ।
प्र बा॒हू अ॑स्राक् सवि॒ता सवी॑मनि निवे॒शय॑न्प्रसु॒वन्न॒क्तुभि॒र्जग॑त् ॥३॥

Apra rajansi divyani parthiva shlokam devah krinute svaya dharmane
Pra bahu asrak savita savimani niveshayanprasuvannaktubhirjagat

53.4

अदा॑भ्यो॒ भुव॑नानि प्र॒चाक॑शद् व्र॒तानि॑ दे॒वः स॑वि॒ताभि र॑क्षते ।
प्रास्रा॑ग्बा॒हू भुव॑नस्य प्र॒जाभ्यो॑ धृ॒तव्र॑तो म॒हो अज्म॑स्य राजति ॥४॥

Adabhyo bhuvanani prachakashad vratani devah savitabhi rakshate
Prasragbahu bhuvanasya prajabhyo dhritavrato maho ajmasya rajati

53.5

त्रिर॒न्तरि॑क्षं सवि॒ता म॑हित्व॒ना त्री रजां॑सि परि॒भुस्त्रीणि॑ रोच॒ना ।
ति॒स्रो दिव॑ः पृथि॒वीस्ति॒स्र इ॑न्वति त्रि॒भिर्व्र॒तैर॒भि नो॑ रक्षति॒ त्मना॑ ॥५॥

Trirantariksham savita mahitvana tri rajansi paribhustrini rochana
Tisro divah prithivistisra invati tribhirvratairabhi no rakshati tmana

53.6

बृ॒हत्सु॑म्नः प्रसवी॒ता नि॒वेश॑नो॒ जग॑तः स्था॒तुरु॒भय॑स्य॒ यो व॒शी ।
स नो॑ दे॒वः स॑वि॒ता शर्म॑ यच्छत्व॒स्मे क्षया॑य त्रि॒वरू॑थ॒मंह॑सः ॥६॥

Brihatsumnah prasavita niveshano jagatah sthaturubhayasya yo vashi
Sa no devah savita sharma yachchhatvasme kshayaya trivaruthamanhasah

53.7

आग॑न् दे॒व ऋ॒तुभि॒र्वर्ध॑तु॒ क्षयं॒ दधा॑तु नः सवि॒ता सु॑प्र॒जामिष॑म् ।
स न॑ः क्ष॒पाभि॒रह॑भिश्च जिन्वतु प्र॒जाव॑न्तं र॒यिम॒स्मे समि॑न्वतु ॥७॥

Agan deva ritubhirvardhatu kshayam dadhatu nah savita suprajamisham
Sa nah kshapabhirahabhishcha jinvatu prajavantam rayimasme saminvatu