Sukta 54

54.1

6 vamadevo gautamah, savita, jagati, 6 trishtup

अभू॑द् दे॒वः स॑वि॒ता वन्द्यो॒ नु न॑ इ॒दानी॒मह्न॑ उप॒वाच्यो॒ नृभि॑ः ।
वि यो रत्ना॒ भज॑ति मान॒वेभ्य॒ः श्रेष्ठं॑ नो॒ अत्र॒ द्रवि॑णं॒ यथा॒ दध॑त् ॥१॥

Abhud devah savita vandyo nu na idanimahna upavachyo nribhih
Vi yo ratna bhajati manavebhyah shreshtham no atra dravinam yatha dadhat

54.2

दे॒वेभ्यो॒ हि प्र॑थ॒मं य॒ज्ञिये॑भ्योऽमृत॒त्वं सु॒वसि॑ भा॒गमु॑त्त॒मम् ।
आदिद् दा॒मानं॑ सवित॒र्व्यू॑र्णुषेऽनूची॒ना जी॑वि॒ता मानु॑षेभ्यः ॥२॥

Devebhyo hi prathamam yagyiyebhyomritatvam suvasi bhagamuttamam
Adid damanam savitarvyurnushenuchina jivita manushebhyah

54.3

अचि॑त्ती॒ यच्च॑कृ॒मा दैव्ये॒ जने॑ दी॒नैर्दक्षै॒ः प्रभू॑ती पूरुष॒त्वता॑ ।
दे॒वेषु॑ च सवित॒र्मानु॑षेषु च॒ त्वं नो॒ अत्र॑ सुवता॒दना॑गसः ॥३॥

Achitti yachchakrima daivye jane dinairdakshaih prabhuti purushatvata
Deveshu cha savitarmanusheshu cha tvam no atra suvatadanagasah

54.4

न प्र॒मिये॑ सवि॒तुर्दैव्य॑स्य॒ तद् यथा॒ विश्वं॒ भुव॑नं धारयि॒ष्यति॑ ।
यत् पृ॑थि॒व्या वरि॑म॒न्ना स्व॑ङ्गु॒रिर्वर्ष्म॑न् दि॒वः सु॒वति॑ स॒त्यम॑स्य॒ तत् ॥४॥

Na pramiye saviturdaivyasya tad yatha vishvam bhuvanam dharayishyati
Yat prithivya varimanna svangurirvarshman divah suvati satyamasya tat

54.5

इन्द्र॑ज्येष्ठान् बृ॒हद्भ्य॒ः पर्व॑तेभ्य॒ः क्षयाँ॑ एभ्यः सुवसि प॒स्त्या॑वतः ।
यथा॑यथा प॒तय॑न्तो वियेमि॒र ए॒वैव त॑स्थुः सवितः स॒वाय॑ ते ॥५॥

Indrajyeshthan brihadbhyah parvatebhyah kshayam ebhyah suvasi pastyavatah
Yathayatha patayanto viyemira evaiva tasthuh savitah savaya te

54.6

ये ते॒ त्रिरह॑न् त्सवितः स॒वासो॑ दि॒वेदि॑वे॒ सौभ॑गमासु॒वन्ति॑ ।
इन्द्रो॒ द्यावा॑पृथि॒वी सिन्धु॑र॒द्भिरा॑दि॒त्यैर्नो॒ अदि॑ति॒ः शर्म॑ यंसत् ॥६॥

Ye te trirahan tsavitah savaso divedive saubhagamasuvanti
Indro dyavaprithivi sindhuradbhiradityairno aditih sharma yansat