Sukta 55

55.1

10 vamadevo gautamah, vishve devah, trishtup 8-10 gayatri

को व॑स्त्रा॒ता व॑सव॒ः को व॑रू॒ता द्यावा॑भूमी अदिते॒ त्रासी॑थां नः ।
सही॑यसो वरुण मित्र॒ मर्ता॒त् को वो॑ऽध्व॒रे वरि॑वो धाति देवाः ॥१॥

Ko vastrata vasavah ko varuta dyavabhumi adite trasitham nah
Sahiyaso varuna mitra martat ko vodhvare varivo dhati devah

प्र ये धामा॑नि पू॒र्व्याण्यर्चा॒न् वि यदु॒च्छान् वि॑यो॒तारो॒ अमू॑राः ।
वि॒धा॒तारो॒ वि ते द॑धु॒रज॑स्रा ऋ॒तधी॑तयो रुरुचन्त द॒स्माः ॥२॥

Pra ye dhamani purvyanyarchan vi yaduchchhan viyotaro amurah
Vidhataro vi te dadhurajasra ritadhitayo ruruchanta dasmah

प्र प॒स्त्या॒३मदि॑तिं॒ सिन्धु॑म॒र्कैः स्व॒स्तिमी॑ळे स॒ख्याय॑ दे॒वीम् ।
उ॒भे यथा॑ नो॒ अह॑नी नि॒पात॑ उ॒षासा॒नक्ता॑ करता॒मद॑ब्धे ॥३॥

Pra pastya3maditim sindhumarkaih svastimile sakhyaya devim
Ubhe yatha no ahani nipata ushasanakta karatamadabdhe

व्य॑र्य॒मा वरु॑णश्चेति॒ पन्था॑मि॒षस्पति॑ः सुवि॒तं गा॒तुम॒ग्निः ।
इन्द्रा॑विष्णू नृ॒वदु॒ षु स्तवा॑ना॒ शर्म॑ नो यन्त॒मम॑व॒द् वरू॑थम् ॥४॥

Vyaryama varunashcheti panthamishaspatih suvitam gatumagnih
Indravishnu nrivadu shu stavana sharma no yantamamavad varutham

आ पर्व॑तस्य म॒रुता॒मवां॑सि दे॒वस्य॑ त्रा॒तुर॑व्रि॒ भग॑स्य ।
पात् पति॒र्जन्या॒दंह॑सो नो मि॒त्रो मि॒त्रिया॑दु॒त न॑ उरुष्येत् ॥५॥

A parvatasya marutamavansi devasya traturavri bhagasya
Pat patirjanyadanhaso no mitro mitriyaduta na urushyet

नू रो॑दसी॒ अहि॑ना बु॒ध्न्ये॑न स्तुवी॒त दे॑वी॒ अप्ये॑भिरि॒ष्टैः ।
स॒मु॒द्रं न सं॒चर॑णे सनि॒ष्यवो॑ घ॒र्मस्व॑रसो न॒द्यो॒३ अप॑ व्रन् ॥६॥

Nu rodasi ahina budhnyena stuvita devi apyebhirishtaih
Samudram na sancharane sanishyavo gharmasvaraso nadyo3 apa vran

दे॒वैर्नो॑ दे॒व्यदि॑ति॒र्नि पा॑तु दे॒वस्त्रा॒ता त्रा॑यता॒मप्र॑युच्छन् ।
न॒हि मि॒त्रस्य॒ वरु॑णस्य धा॒सिमर्हा॑मसि प्र॒मियं॒ सान्व॒ग्नेः ॥७॥

Devairno devyaditirni patu devastrata trayatamaprayuchchhan
Nahi mitrasya varunasya dhasimarhamasi pramiyam sanvagneh

अ॒ग्निरी॑शे वस॒व्य॑स्या॒ग्निर्म॒हः सौभ॑गस्य । तान्य॒स्मभ्यं॑ रासते ॥८॥

Agnirishe vasavyasyagnirmahah saubhagasya, tanyasmabhyam rasate

उषो॑ मघो॒न्या व॑ह॒ सूनृ॑ते॒ वार्या॑ पु॒रु । अ॒स्मभ्यं॑ वाजिनीवति ॥९॥

Usho maghonya vaha sunrite varya puru, asmabhyam vajinivati

तत् सु न॑ः सवि॒ता भगो॒ वरु॑णो मि॒त्रो अ॑र्य॒मा । इन्द्रो॑ नो॒ राध॒सा ग॑मत् ॥१०॥

Tat su nah savita bhago varuno mitro aryama, indro no radhasa gamat