Sukta 56

56.1

7 vamadevo gautamah, dyavaprithivi, trishtup, 5-7 gayatri

म॒ही द्यावा॑पृथि॒वी इ॒ह ज्येष्ठे॑ रु॒चा भ॑वतां शु॒चय॑द्भिर॒र्कैः ।
यत् सीं॑ वरि॑ष्ठे बृह॒ती वि॑मि॒न्वन् रु॒वद्धो॒क्षा प॑प्रथा॒नेभि॒रेवै॑ः ॥१॥

Mahi dyavaprithivi iha jyeshthe rucha bhavatam shuchayadbhirarkaih
Yat sim varishthe brihati viminvan ruvaddhoksha paprathanebhirevaih

56.2

दे॒वी दे॒वेभि॑र्यज॒ते यज॑त्रै॒रमि॑नती तस्थतुरु॒क्षमा॑णे ।
ऋ॒ताव॑री अ॒द्रुहा॑ दे॒वपु॑त्रे य॒ज्ञस्य॑ ने॒त्री शु॒चय॑द्भिर॒र्कैः ॥२॥

Devi devebhiryajate yajatrairaminati tasthaturukshamane
Ritavari adruha devaputre yagyasya netri shuchayadbhirarkaih

56.3

स इत् स्वपा॒ भुव॑नेष्वास॒ य इ॒मे द्यावा॑पृथि॒वी ज॒जान॑ ।
उ॒र्वी ग॑भी॒रे रज॑सी सु॒मेके॑ अवं॒शे धीर॒ः शच्या॒ समै॑रत् ॥३॥

Sa it svapa bhuvaneshvasa ya ime dyavaprithivi jajana
Urvi gabhire rajasi sumeke avanshe dhirah shachya samairat

56.4

नू रो॑दसी बृ॒हद्भि॑र्नो॒ वरू॑थै॒ः पत्नी॑वद्भिरि॒षय॑न्ती स॒जोषा॑ः ।
उ॒रू॒ची विश्वे॑ यज॒ते नि पा॑तं धि॒या स्या॑म र॒थ्य॑ः सदा॒साः ॥४॥

Nu rodasi brihadbhirno varuthaih patnivadbhirishayanti sajoshah
Uruchi vishve yajate ni patam dhiya syama rathyah sadasah

56.5

प्र वां॒ महि॒ द्यवी॑ अ॒भ्युप॑स्तुतिं भरामहे । शुची॒ उप॒ प्रश॑स्तये ॥५॥

Pra vam mahi dyavi abhyupastutim bharamahe, shuchi upa prashastaye

56.6

पु॒ना॒ने त॒न्वा॑ मि॒थः स्वेन॒ दक्षे॑ण राजथः । ऊ॒ह्याथे॑ स॒नादृ॒तम् ॥६॥

Punane tanva mithah svena dakshena rajathah, uhyathe sanadritam

56.7

म॒ही मि॒त्रस्य॑ साधथ॒स्तर॑न्ती॒ पिप्र॑ती ऋ॒तम् । परि॑ य॒ज्ञं नि षे॑दथुः ॥७॥

Mahi mitrasya sadhathastaranti piprati ritam, pari yagyam ni shedathuh