Sukta 57

57.1

8 vamadevo gautamah, 1-3 kshetrapatih, 4 shunah, 5, 8 shunasirau, 6-7 sita, anushtup, 5 pura ushnik, 2, 3, 8 trishtup

क्षेत्र॑स्य॒ पति॑ना व॒यं हि॒तेने॑व जयामसि ।
गामश्वं॑ पोषयि॒त्न्वा स नो॑ मृळाती॒दृशे॑ ॥१॥

Kshetrasya patina vayam hiteneva jayamasi
Gamashvam poshayitnva sa no mrilatidrishe

क्षेत्र॑स्य पते॒ मधु॑मन्तमू॒र्मिं धे॒नुरि॑व॒ पयो॑ अ॒स्मासु॑ धुक्ष्व ।
म॒धु॒श्चुतं॑ घृ॒तमि॑व॒ सुपू॑तमृ॒तस्य॑ न॒ः पत॑यो मृळयन्तु ॥२॥

Kshetrasya pate madhumantamurmim dhenuriva payo asmasu dhukshva
Madhushchutam ghritamiva suputamritasya nah patayo mrilayantu

मधु॑मती॒रोष॑धी॒र्द्याव॒ आपो॒ मधु॑मन्नो भवत्व॒न्तरि॑क्षम् ।
क्षेत्र॑स्य॒ पति॒र्मधु॑मान् नो अ॒स्त्वरि॑ष्यन्तो॒ अन्वे॑नं चरेम ॥३॥

Madhumatiroshadhirdyava apo madhumanno bhavatvantariksham
Kshetrasya patirmadhuman no astvarishyanto anvenam charema

शु॒नं वा॒हाः शु॒नं नर॑ः शु॒नं कृ॑षतु॒ लाङ्ग॑लम् ।
शु॒नं व॑र॒त्रा ब॑ध्यन्तां शु॒नमष्ट्रा॒मुदि॑ङ्गय ॥४॥

Shunam vahah shunam narah shunam krishatu langalam
Shunam varatra badhyantam shunamashtramudingaya

शुना॑सीरावि॒मां वाचं॑ जुषेथां॒ यद् दि॒वि च॒क्रथु॒ः पय॑ः । तेने॒मामुप॑ सिञ्चतम् ॥५॥

Shunasiravimam vacham jushetham yad divi chakrathuh payah, tenemamupa sinchatam

अ॒र्वाची॑ सुभगे भव॒ सीते॒ वन्दा॑महे त्वा । यथा॑ नः सु॒भगास॑सि॒ यथा॑ नः सु॒फलास॑सि ॥६॥

Arvachi subhage bhava site vandamahe tva, yatha nah subhagasasi yatha nah suphalasasi

इन्द्र॒ः सीतां॒ नि गृ॑ह्णातु॒ तां पू॒षानु॑ यच्छतु । सा न॒ः पय॑स्वती दुहा॒मुत्त॑रामुत्तरां॒ समा॑म् ॥७॥

Indrah sitam ni grihnatu tam pushanu yachchhatu, sa nah payasvati duhamuttaramuttaram samam

शु॒नं न॒ः फाला॒ वि कृ॑षन्तु॒ भूमिं॑ शु॒नं की॒नाशा॑ अ॒भि य॑न्तु वा॒हैः ।
शु॒नं प॒र्जन्यो॒ मधु॑ना॒ पयो॑भि॒ः शुना॑सीरा शु॒नम॒स्मासु॑ धत्तम् ॥८॥

Shunam nah phala vi krishantu bhumim shunam kinasha abhi yantu vahaih
Shunam parjanyo madhuna payobhih shunasira shunamasmasu dhattam