সূক্ত 50

50.1

১১ বামদেবো গৌতমঃ। বৃহস্পতিঃ, ১০-১১ ইন্দ্রাবৃহস্পতী । ত্রিষ্টুপ্, ১০ জগতী।

যস্তস্তম্ভ সহসা বি জ্মো অন্তান্ বৃহস্পতিস্ত্রিষধস্থো রবেণ ।
তং প্রত্নাস ঋষয়ো দীধ্যানাঃ পুরো বিপ্রা দধিরে মন্দ্রজিহ্বম্ ॥১॥

50.2

ধুনেতয়ঃ সুপ্রকেতং মদন্তো বৃহস্পতে অভি যে নস্ততস্রে ।
পৃষন্তং সৃপ্রমদব্ধমূর্বং বৃহস্পতে রক্ষতাদস্য যোনিম্ ॥২॥

50.3

বৃহস্পতে যা পরমা পরাবদত আ ত ঋতস্পৃশো নি ষেদুঃ ।
তুভ্যং খাতা অবতা অদ্রিদুগ্ধা মধ্বঃ শ্চোতন্ত্যভিতো বিরপ্শম্ ॥৩॥

50.4

বৃহস্পতিঃ প্রথমং জায়মানো মহো জ্যোতিষঃ পরমে ব্যোমন্ ।
সপ্তাস্যস্তুবিজাতো রবেণ বি সপ্তরশ্মিরধমৎ তমাংসি ॥৪॥

50.5

স সুষ্টুভা স ঋক্বতা গণেন বলং রুরোজ ফলিগং রবেণ ।
বৃহস্পতিরুস্রিয়া হব্যসূদঃ কনিক্রদদ্ বাবশতীরুদাজৎ ॥৫॥

50.6

এবা পিত্রে বিশ্বদেবায় বৃষ্ণে যজ্ঞৈর্বিধেম নমসা হবির্ভিঃ ।
বৃহস্পতে সুপ্রজা বীরবন্তো বয়ং স্যাম পতয়ো রয়ীণাম্ ॥৬॥

50.7

স ইদ্ রাজা প্রতিজন্যানি বিশ্বা শুষ্মেণ তস্থাবভি বীর্যেণ ।
বৃহস্পতিং যঃ সুভৃতং বিভর্তি বল্গূয়তি বন্দতে পূর্বভাজম্ ॥৭॥

50.8

স ইৎ ক্ষেতি সুধিত ওকসি স্বে তস্মা ইলা পিন্বতে বিশ্বদানীম্ ।
তস্মৈ বিশঃ স্বয়মেবা নমন্তে যস্মিন্ ব্রহ্মা রাজনি পূর্ব এতি ॥৮॥

50.9

অপ্রতীতো জয়তি সং ধনানি প্রতিজন্যান্যুত যা সজন্যা ।
অবস্যবে যো বরিবঃ কৃণোতি ব্রহ্মণে রাজা তমবন্তি দেবাঃ ॥৯॥

50.10

ইন্দ্রশ্চ সোমং পিবতং বৃহস্পতেঽস্মিন্ যজ্ঞে মন্দসানা বৃষণ্বসূ ।
আ বাং বিশন্ত্বিন্দবঃ স্বাভুবোঽস্মে রয়িং সর্ববীরং নি যচ্ছতম্ ॥১০॥

50.11

বৃহস্পত ইন্দ্র বর্ধতং নঃ সচা সা বাং সুমতির্ভূত্বস্মে ।
অবিষ্টং ধিয়ো জিগৃতং পুরংধীর্জজস্তমর্যো বনুষামরাতীঃ ॥১১॥