সূক্ত 51

51.1

১১ বামদেবো গৌতমঃ। উষাঃ। গায়ত্রী।

ইদমু ত্যৎ পুরুতমং পুরস্তাজ্জ্যোতিস্তমসো বয়ুনাবদস্থাৎ ।
নূনং দিবো দুহিতরো বিভাতীর্গাতুং কৃণবন্নুষসো জনায় ॥১॥

অস্থুরু চিত্রা উষসঃ পুরস্তান্মিতা ইব স্বরবোঽধ্বরেষু ।
ব্যূ ব্রজস্য তমসো দ্বারোচ্ছন্তীরব্রঞ্ছুচয়ঃ পাবকাঃ ॥২॥

উচ্ছন্তীরদ্য চিতয়ন্ত ভোজান্ রাধোদেয়ায়োষসো মঘোনীঃ ।
অচিত্রে অন্তঃ পণয়ঃ সসন্ত্ববুধ্যমানাস্তমসো বিমধ্যে ॥৩॥

কুবিৎ স দেবীঃ সনয়ো নবো বা যামো বভূয়াদুষসো বো অদ্য ।
যেনা নবগ্বে অঙ্গিরে দশগ্বে সপ্তাস্যে রেবতী রেবদূষ ॥৪॥

যূয়ং হি দেবীর্ঋতয়ুগ্ভিরশ্বৈঃ পরিপ্রয়াথ ভুবনানি সদ্যঃ ।
প্রবোধয়ন্তীরুষসঃ সসন্তং দ্বিপাচ্চতুষ্পাচ্চরথায় জীবম্ ॥৫॥

ক্ব স্বিদাসাং কতমা পুরাণী যয়া বিধানা বিদধুর্ঋভূণাম্ ।
শুভং যচ্ছুভ্রা উষসশ্চরন্তি ন বি জ্ঞায়ন্তে সদৃশীরজুর্যাঃ ॥৬॥

তা ঘা তা ভদ্রা উষসঃ পুরাসুরভিষ্টিদ্যুম্না ঋতজাতসত্যাঃ ।
যাস্বীজানঃ শশমান উক্থৈঃ স্তুবঞ্ছংসন্ দ্রবিণং সদ্য আপ ॥৭॥

তা আ চরন্তি সমনা পুরস্তাৎ সমানতঃ সমনা পপ্রথানাঃ ।
ঋতস্য দেবীঃ সদসো বুধানা গবাং ন সর্গা উষসো জরন্তে ॥৮॥

তা ইন্ন্বে৩ব সমনা সমানীরমীতবর্ণা উষসশ্চরন্তি ।
গূহন্তীরভ্বমসিতং রুশদ্ভিঃ শুক্রাস্তনূভিঃ শুচয়ো রুচানাঃ ॥৯॥

রয়িং দিবো দুহিতরো বিভাতীঃ প্রজাবন্তং যচ্ছতাস্মাসু দেবীঃ ।
স্যোনাদা বঃ প্রতিবুধ্যমানাঃ সুবীর্যস্য পতয়ঃ স্যাম ॥১০॥

তদ্ বো দিবো দুহিতরো বিভাতীরুপ ব্রুব উষসো যজ্ঞকেতুঃ ।
বয়ং স্যাম যশসো জনেষু তদ্ দ্যৌশ্চ ধত্তাং পৃথিবী চ দেবী ॥১১॥