Sukta 50

50.1

11 vamadevo gautamah, brihaspatih, 10-11 indrabrihaspati, trishtup, 10 jagati

यस्त॒स्तम्भ॒ सह॑सा॒ वि ज्मो अन्ता॒न् बृह॒स्पति॑स्त्रिषध॒स्थो रवे॑ण ।
तं प्र॒त्नास॒ ऋष॑यो॒ दीध्या॑नाः पु॒रो विप्रा॑ दधिरे म॒न्द्रजि॑ह्वम् ॥१॥

Yastastambha sahasa vi jmo antan brihaspatistrishadhastho ravena
Tam pratnasa rishayo didhyanah puro vipra dadhire mandrajihvam

50.2

धु॒नेत॑यः सुप्रके॒तं मद॑न्तो॒ बृह॑स्पते अ॒भि ये न॑स्तत॒स्रे ।
पृष॑न्तं सृ॒प्रमद॑ब्धमू॒र्वं बृह॑स्पते॒ रक्ष॑तादस्य॒ योनि॑म् ॥२॥

Dhunetayah supraketam madanto brihaspate abhi ye nastatasre
Prishantam sripramadabdhamurvam brihaspate rakshatadasya yonim

50.3

बृह॑स्पते॒ या प॑र॒मा प॑रा॒वदत॒ आ त॑ ऋत॒स्पृशो॒ नि षे॑दुः ।
तुभ्यं॑ खा॒ता अ॑व॒ता अद्रि॑दुग्धा॒ मध्व॑ः श्चोतन्त्य॒भितो॑ विर॒प्शम् ॥३॥

Brihaspate ya parama paravadata a ta ritasprisho ni sheduh
Tubhyam khata avata adridugdha madhvah shchotantyabhito virapsham

50.4

बृह॒स्पति॑ः प्रथ॒मं जाय॑मानो म॒हो ज्योति॑षः पर॒मे व्यो॑मन् ।
स॒प्तास्य॑स्तुविजा॒तो रवे॑ण॒ वि स॒प्तर॑श्मिरधम॒त् तमां॑सि ॥४॥

Brihaspatih prathamam jayamano maho jyotishah parame vyoman
Saptasyastuvijato ravena vi saptarashmiradhamat tamansi

50.5

स सु॒ष्टुभा॒ स ऋक्व॑ता ग॒णेन॑ व॒लं रु॑रोज फलि॒गं रवे॑ण ।
बृह॒स्पति॑रु॒स्रिया॑ हव्य॒सूद॒ः कनि॑क्रद॒द् वाव॑शती॒रुदा॑जत् ॥५॥

Sa sushtubha sa rikvata ganena valam ruroja phaligam ravena
Brihaspatirusriya havyasudah kanikradad vavashatirudajat

50.6

ए॒वा पि॒त्रे वि॒श्वदे॑वाय॒ वृष्णे॑ य॒ज्ञैर्वि॑धेम॒ नम॑सा ह॒विर्भि॑ः ।
बृह॑स्पते सुप्र॒जा वी॒रव॑न्तो व॒यं स्या॑म॒ पत॑यो रयी॒णाम् ॥६॥

Eva pitre vishvadevaya vrishne yagyairvidhema namasa havirbhih
Brihaspate supraja viravanto vayam syama patayo rayinam

50.7

स इद् राजा॒ प्रति॑जन्यानि॒ विश्वा॒ शुष्मे॑ण तस्थाव॒भि वी॒र्ये॑ण ।
बृह॒स्पतिं॒ यः सुभृ॑तं बि॒भर्ति॑ वल्गू॒यति॒ वन्द॑ते पूर्व॒भाज॑म् ॥७॥

Sa id raja pratijanyani vishva shushmena tasthavabhi viryena
Brihaspatim yah subhritam bibharti valguyati vandate purvabhajam

50.8

स इत् क्षे॑ति॒ सुधि॑त॒ ओक॑सि॒ स्वे तस्मा॒ इळा॑ पिन्वते विश्व॒दानी॑म् ।
तस्मै॒ विश॑ः स्व॒यमे॒वा न॑मन्ते॒ यस्मि॑न् ब्र॒ह्मा राज॑नि॒ पूर्व॒ एति॑ ॥८॥

Sa it ksheti sudhita okasi sve tasma ila pinvate vishvadanim
Tasmai vishah svayameva namante yasmin brahma rajani purva eti

50.9

अप्र॑तीतो जयति॒ सं धना॑नि॒ प्रति॑जन्यान्यु॒त या सज॑न्या ।
अ॒व॒स्यवे॒ यो वरि॑वः कृ॒णोति॑ ब्र॒ह्मणे॒ राजा॒ तम॑वन्ति दे॒वाः ॥९॥

Apratito jayati sam dhanani pratijanyanyuta ya sajanya
Avasyave yo varivah krinoti brahmane raja tamavanti devah

50.10

इन्द्र॑श्च॒ सोमं॑ पिबतं बृहस्पते॒ऽस्मिन् य॒ज्ञे म॑न्दसा॒ना वृ॑षण्वसू ।
आ वां॑ विश॒न्त्विन्द॑वः स्वा॒भुवो॒ऽस्मे र॒यिं सर्व॑वीरं॒ नि य॑च्छतम् ॥१०॥

Indrashcha somam pibatam brihaspatesmin yagye mandasana vrishanvasu
A vam vishantvindavah svabhuvosme rayim sarvaviram ni yachchhatam

50.11

बृह॑स्पत इन्द्र॒ वर्ध॑तं न॒ः सचा॒ सा वां॑ सुम॒तिर्भू॑त्व॒स्मे ।
अ॒वि॒ष्टं धियो॑ जिगृ॒तं पुरं॑धीर्जज॒स्तम॒र्यो व॒नुषा॒मरा॑तीः ॥११॥

Brihaspata indra vardhatam nah sacha sa vam sumatirbhutvasme
Avishtam dhiyo jigritam purandhirjajastamaryo vanushamaratih