সূক্ত 36

36.1

৯ বামদেবো গৌতমঃ। ঋভবঃ।জগতী, ৯ ত্রিষ্টুপ্।

অনশ্বো জাতো অনভীশুরুক্থ্যো৩ রথস্ত্রিচক্রঃ পরি বর্ততে রজঃ ।
মহৎ তদ্বো দেব্যস্য প্রবাচনং দ্যামৃভবঃ পৃথিবীং যচ্চ পুষ্যথ ॥১॥

36.2

রথং যে চক্রুঃ সুবৃতং সুচেতসোঽবিহ্বরন্তং মনসস্পরি ধ্যয়া ।
তাঁ ঊ ন্ব১স্য সবনস্য পীতয় আ বো বাজা ঋভবো বেদয়ামসি ॥২॥

36.3

তদ্ বো বাজা ঋভবঃ সুপ্রবাচনং দেবেষু বিভ্বো অভবন্মহিত্বনম্ ।
জিব্রী যৎ সন্তা পিতরা সনাজুরা পুনর্যুবানা চরথায় তক্ষথ ॥৩॥

36.4

একং বি চক্র চমসং চতুর্বয়ং নিশ্চর্মণো গামরিণীত ধীতিভিঃ ।
অথা দেবেষ্বমৃতত্বমানশ শ্রুষ্টী বাজা ঋভবস্তদ্ ব উক্থ্যম্ ॥৪॥

36.5

ঋভুতো রয়িঃ প্রথমশ্রবস্তমো বাজশ্রুতাসো যমজীজনন্ নরঃ ।
বিভ্বতষ্টো বিদথেষু প্রবাচ্যো যং দেবাসোঽবথা স বিচর্ষণিঃ ॥৫॥

36.6

স বাজ্যর্বা স ঋষির্বচস্যয়া স শূরো অস্তা পৃতনাসু দুষ্টরঃ ।
স রায়স্পোষং স সুবীর্যং দধে যং বাজো বিভ্বাঁ ঋভবো যমাবিষুঃ ॥৬॥

36.7

শ্রেষ্ঠং বঃ পেশো অধি ধায়ি দর্শতং স্তোমো বাজা ঋভবস্তং জুজুষ্টন ।
ধীরাসো হি ষ্ঠা কবয়ো বিপশ্চিতস্তান্ ব এনা ব্রহ্মণা বেদয়ামসি ॥৭॥

36.8

যূয়মস্মভ্যং ধিষণাভ্যস্পরি বিদ্বাংসো বিশ্বা নর্যাণি ভোজনা ।
দ্যুমন্তং বাজং বৃষশুষ্মমুত্তমমা নো রয়িমৃভবস্তক্ষতা বয়ঃ ॥৮॥

36.9

ইহ প্রজামিহ রয়িং ররাণা ইহ শ্রবো বীরবৎ তক্ষতা নঃ ।
যেন বয়ং চিতয়েমাত্যন্যান্ তং বাজং চিত্রমৃভবো দদা নঃ ॥৯॥