Sukta 36

36.1

9 vamadevo gautamah, ribhavah, jagati, 9 trishtup

अ॒न॒श्वो जा॒तो अ॑नभी॒शुरु॒क्थ्यो॒३ रथ॑स्त्रिच॒क्रः परि॑ वर्तते॒ रज॑ः ।
म॒हत् तद्वो॑ दे॒व्य॑स्य प्र॒वाच॑नं॒ द्यामृ॑भवः पृथि॒वीं यच्च॒ पुष्य॑थ ॥१॥

Anashvo jato anabhishurukthyo3 rathastrichakrah pari vartate rajah
Mahat tadvo devyasya pravachanam dyamribhavah prithivim yachcha pushyatha

36.2

रथं॒ ये च॒क्रुः सु॒वृतं॑ सु॒चेत॒सोऽवि॑ह्वरन्तं॒ मन॑स॒स्परि॒ ध्यया॑ ।
ताँ ऊ॒ न्व१स्य सव॑नस्य पी॒तय॒ आ वो॑ वाजा ऋभवो वेदयामसि ॥२॥

Ratham ye chakruh suvritam suchetasovihvarantam manasaspari dhyaya
Tam u nva1sya savanasya pitaya a vo vaja ribhavo vedayamasi

36.3

तद् वो॑ वाजा ऋभवः सुप्रवाच॒नं दे॒वेषु॑ विभ्वो अभवन्महित्व॒नम् ।
जिव्री॒ यत् सन्ता॑ पि॒तरा॑ सना॒जुरा॒ पुन॒र्युवा॑ना च॒रथा॑य॒ तक्ष॑थ ॥३॥

Tad vo vaja ribhavah supravachanam deveshu vibhvo abhavanmahitvanam
Jivri yat santa pitara sanajura punaryuvana charathaya takshatha

36.4

एकं॒ वि च॑क्र चम॒सं चतु॑र्वयं॒ निश्चर्म॑णो॒ गाम॑रिणीत धी॒तिभि॑ः ।
अथा॑ दे॒वेष्व॑मृत॒त्वमा॑नश श्रु॒ष्टी वा॑जा ऋभव॒स्तद् व॑ उ॒क्थ्य॑म् ॥४॥

Ekam vi chakra chamasam chaturvayam nishcharmano gamarinita dhitibhih
Atha deveshvamritatvamanasha shrushti vaja ribhavastad va ukthyam

36.5

ऋ॒भु॒तो र॒यिः प्र॑थ॒मश्र॑वस्तमो॒ वाज॑श्रुतासो॒ यमजी॑जन॒न् नर॑ः ।
वि॒भ्व॒त॒ष्टो वि॒दथे॑षु प्र॒वाच्यो॒ यं दे॑वा॒सोऽव॑था॒ स विच॑र्षणिः ॥५॥

Ribhuto rayih prathamashravastamo vajashrutaso yamajijanan narah
Vibhvatashto vidatheshu pravachyo yam devasovatha sa vicharshanih

36.6

स वा॒ज्यर्वा॒ स ऋषि॑र्वच॒स्यया॒ स शूरो॒ अस्ता॒ पृत॑नासु दु॒ष्टर॑ः ।
स रा॒यस्पोषं॒ स सु॒वीर्यं॑ दधे॒ यं वाजो॒ विभ्वाँ॑ ऋ॒भवो॒ यमावि॑षुः ॥६॥

Sa vajyarva sa rishirvachasyaya sa shuro asta pritanasu dushtarah
Sa rayasposham sa suviryam dadhe yam vajo vibhvam ribhavo yamavishuh

36.7

श्रेष्ठं॑ व॒ः पेशो॒ अधि॑ धायि दर्श॒तं स्तोमो॑ वाजा ऋभव॒स्तं जु॑जुष्टन ।
धीरा॑सो॒ हि ष्ठा क॒वयो॑ विप॒श्चित॒स्तान् व॑ ए॒ना ब्रह्म॒णा वे॑दयामसि ॥७॥

Shreshtham vah pesho adhi dhayi darshatam stomo vaja ribhavastam jujushtana
Dhiraso hi shtha kavayo vipashchitastan va ena brahmana vedayamasi

36.8

यू॒यम॒स्मभ्यं॑ धि॒षणा॑भ्य॒स्परि॑ वि॒द्वांसो॒ विश्वा॒ नर्या॑णि॒ भोज॑ना ।
द्यु॒मन्तं॒ वाजं॒ वृष॑शुष्ममुत्त॒ममा नो॑ र॒यिमृ॑भवस्तक्ष॒ता वय॑ः ॥८॥

Yuyamasmabhyam dhishanabhyaspari vidvanso vishva naryani bhojana
Dyumantam vajam vrishashushmamuttamama no rayimribhavastakshata vayah

36.9

इ॒ह प्र॒जामि॒ह र॒यिं ररा॑णा इ॒ह श्रवो॑ वी॒रव॑त् तक्षता नः ।
येन॑ व॒यं चि॒तये॒मात्य॒न्यान् तं वाजं॑ चि॒त्रमृ॑भवो ददा नः ॥९॥

Iha prajamiha rayim rarana iha shravo viravat takshata nah
Yena vayam chitayematyanyan tam vajam chitramribhavo dada nah