Sukta 37

37.1

8 vamadevo gautamah, ribhavah, trishtup, 5-8 anushtup

उप॑ नो वाजा अध्व॒रमृ॑भुक्षा॒ देवा॑ या॒त प॒थिभि॑र्देव॒यानै॑ः ।
यथा॑ य॒ज्ञं मनु॑षो वि॒क्ष्वा॒३सु द॑धि॒ध्वे र॑ण्वाः सु॒दिने॒ष्वह्ना॑म् ॥१॥

Upa no vaja adhvaramribhuksha deva yata pathibhirdevayanaih
Yatha yagyam manusho vikshva3su dadhidhve ranvah sudineshvahnam

ते वो॑ हृ॒दे मन॑से सन्तु य॒ज्ञा जुष्टा॑सो अ॒द्य घृ॒तनि॑र्णिजो गुः ।
प्र व॑ः सु॒तासो॑ हरयन्त पू॒र्णाः क्रत्वे॒ दक्षा॑य हर्षयन्त पी॒ताः ॥२॥

Te vo hride manase santu yagya jushtaso adya ghritanirnijo guh
Pra vah sutaso harayanta purnah kratve dakshaya harshayanta pitah

त्र्यु॒दा॒यं दे॒वहि॑तं॒ यथा॑ व॒ः स्तोमो॑ वाजा ऋभुक्षणो द॒दे व॑ः ।
जु॒ह्वे म॑नु॒ष्वदुप॑रासु वि॒क्षु यु॒ष्मे सचा॑ बृ॒हद्दि॑वेषु॒ सोम॑म् ॥३॥

Tryudayam devahitam yatha vah stomo vaja ribhukshano dade vah
Juhve manushvaduparasu vikshu yushme sacha brihaddiveshu somam

पीवो॑अश्वाः शु॒चद्र॑था॒ हि भू॒ताऽय॑ःशिप्रा वाजिनः सुनि॒ष्काः ।
इन्द्र॑स्य सूनो शवसो नपा॒तोऽनु॑ वश्चेत्यग्रि॒यं मदा॑य ॥४॥

Pivoashvah shuchadratha hi bhutayahshipra vajinah sunishkah
Indrasya suno shavaso napatonu vashchetyagriyam madaya

ऋ॒भुमृ॑भुक्षणो र॒यिं वाजे॑ वा॒जिन्त॑मं॒ युज॑म् ।
इन्द्र॑स्वन्तं हवामहे सदा॒सात॑मम॒श्विन॑म् ॥५॥

Ribhumribhukshano rayim vaje vajintamam yujam
Indrasvantam havamahe sadasatamamashvinam

सेदृ॑भवो॒ यमव॑थ यू॒यमिन्द्र॑श्च॒ मर्त्य॑म् ।
स धी॒भिर॑स्तु॒ सनि॑ता मे॒धसा॑ता॒ सो अर्व॑ता ॥६॥

Sedribhavo yamavatha yuyamindrashcha martyam
Sa dhibhirastu sanita medhasata so arvata

वि नो॑ वाजा ऋभुक्षणः प॒थश्चि॑तन॒ यष्ट॑वे ।
अ॒स्मभ्यं॑ सूरयः स्तु॒ता विश्वा॒ आशा॑स्तरी॒षणि॑ ॥७॥

Vi no vaja ribhukshanah pathashchitana yashtave
Asmabhyam surayah stuta vishva ashastarishani

तं नो॑ वाजा ऋभुक्षण॒ इन्द्र॒ नास॑त्या र॒यिम् ।
समश्वं॑ चर्ष॒णिभ्य॒ आ पु॒रु श॑स्त म॒घत्त॑ये ॥८॥

Tam no vaja ribhukshana indra nasatya rayim
Samashvam charshanibhya a puru shasta maghattaye