Sukta 35

35.1

9 vamadevo gautamah, ribhavah, trishtup

इ॒होप॑ यात शवसो नपात॒ः सौध॑न्वना ऋभवो॒ माप॑ भूत ।
अ॒स्मिन् हि व॒ः सव॑ने रत्न॒धेयं॒ गम॒न्त्विन्द्र॒मनु॑ वो॒ मदा॑सः ॥१॥

Ihopa yata shavaso napatah saudhanvana ribhavo mapa bhuta
Asmin hi vah savane ratnadheyam gamantvindramanu vo madasah

आग॑न्नृभू॒णामि॒ह र॑त्न॒धेय॒मभू॒त् सोम॑स्य॒ सुषु॑तस्य पी॒तिः ।
सु॒कृ॒त्यया॒ यत् स्व॑प॒स्यया॑ चँ॒ एकं॑ विच॒क्र च॑म॒सं च॑तु॒र्धा ॥२॥

Agannribhunamiha ratnadheyamabhut somasya sushutasya pitih
Sukrityaya yat svapasyaya cham ekam vichakra chamasam chaturdha

व्य॑कृणोत चम॒सं च॑तु॒र्धा सखे॒ वि शि॒क्षेत्य॑ब्रवीत ।
अथै॑त वाजा अ॒मृत॑स्य॒ पन्थां॑ ग॒णं दे॒वाना॑मृभवः सुहस्ताः ॥३॥

Vyakrinota chamasam chaturdha sakhe vi shikshetyabravita
Athaita vaja amritasya pantham ganam devanamribhavah suhastah

कि॒मय॑ः स्विच्चम॒स ए॒ष आ॑स॒ यं काव्ये॑न च॒तुरो॑ विच॒क्र ।
अथा॑ सुनुध्वं॒ सव॑नं॒ मदा॑य पा॒त ऋ॑भवो॒ मधु॑नः सो॒म्यस्य॑ ॥४॥

Kimayah svichchamasa esha asa yam kavyena chaturo vichakra
Atha sunudhvam savanam madaya pata ribhavo madhunah somyasya

शच्या॑कर्त पि॒तरा॒ युवा॑ना॒ शच्या॑कर्त चम॒सं दे॑व॒पान॑म् ।
शच्या॒ हरी॒ धनु॑तरावतष्टेन्द्र॒वाहा॑वृभवो वाजरत्नाः ॥५॥

Shachyakarta pitara yuvana shachyakarta chamasam devapanam
Shachya hari dhanutaravatashtendravahavribhavo vajaratnah

यो व॑ः सु॒नोत्य॑भिपि॒त्वे अह्नां॑ ती॒व्रं वा॑जास॒ः सव॑नं॒ मदा॑य ।
तस्मै॑ र॒यिमृ॑भव॒ः सर्व॑वीर॒मा त॑क्षत वृषणो मन्दसा॒नाः ॥६॥

Yo vah sunotyabhipitve ahnam tivram vajasah savanam madaya
Tasmai rayimribhavah sarvavirama takshata vrishano mandasanah

प्रा॒तः सु॒तम॑पिबो हर्यश्व॒ माध्यं॑दिनं॒ सव॑नं॒ केव॑लं ते ।
समृ॒भुभि॑ः पिबस्व रत्न॒धेभि॒ः सखीँ॒र्याँ इ॑न्द्र चकृ॒षे सु॑कृ॒त्या ॥७॥

Pratah sutamapibo haryashva madhyandinam savanam kevalam te
Samribhubhih pibasva ratnadhebhih sakhinryam indra chakrishe sukritya

ये दे॒वासो॒ अभ॑वता सुकृ॒त्या श्ये॒ना इ॒वेदधि॑ दि॒वि नि॑षे॒द ।
ते रत्नं॑ धात शवसो नपात॒ः सौध॑न्वना॒ अभ॑वता॒मृता॑सः ॥८॥

Ye devaso abhavata sukritya shyena ivedadhi divi nisheda
Te ratnam dhata shavaso napatah saudhanvana abhavatamritasah

यत्तृ॒तीयं॒ सव॑नं रत्न॒धेय॒मकृ॑णुध्वं स्वप॒स्या सु॑हस्ताः ।
तदृ॑भव॒ः परि॑षिक्तं व ए॒तत् सं मदे॑भिरिन्द्रि॒येभि॑ः पिबध्वम् ॥९॥

Yattritiyam savanam ratnadheyamakrinudhvam svapasya suhastah
Tadribhavah parishiktam va etat sam madebhirindriyebhih pibadhvam