সূক্ত 34

34.1

১১ বামদেবো গৌতমঃ। ঋভবঃ। ত্রিষ্টুপ্।

ঋভুর্বিভ্বা বাজ ইন্দ্রো নো অচ্ছেমং যজ্ঞং রত্নধেয়োপ যাত ।
ইদা হি বো ধিষণা দেব্যহ্নামধাৎ পীতিং সং মদা অগ্মতা বঃ ॥১॥

34.2

বিদানাসো জন্মনো বাজরত্না উত ঋতুভির্ঋভবো মাদয়ধ্বম্ ।
সং বো মদা অগ্মত সং পুরংধিঃ সুবীরামস্মে রয়িমেরয়ধ্বম্ ॥২॥

34.3

অয়ং বো যজ্ঞ ঋভবোঽকারি যমা মনুষ্বৎ প্রদিবো দধিধ্বে ।
প্র বোঽচ্ছা জুজুষাণাসো অস্থুরভূত বিশ্বে অগ্রিয়োত বাজাঃ ॥৩॥

34.4

অভূদু বো বিধতে রত্নধেয়মিদা নরো দাশুষে মর্ত্যায় ।
পিবত বাজা ঋভবো দদে বো মহি তৃতীয়ং সবনং মদায় ॥৪॥

34.5

আ বাজা যাতোপ ন ঋভুক্ষা মহো নরো দ্রবিণসো গৃণানাঃ ।
আ বঃ পীতয়োঽভিপিত্বে অহ্নামিমা অস্তং নবস্ব ইব গ্মন্ ॥৫॥

34.6

আ নপাতঃ শবসো যাতনোপেমং যজ্ঞং নমসা হূয়মানাঃ ।
সজোষসঃ সূরয়ো যস্য চ স্থ মধ্বঃ পাত রত্নধা ইন্দ্রবন্তঃ ॥৬॥

34.7

সজোষা ইন্দ্র বরুণেন সোমং সজোষাঃ পাহি গির্বণো মরুদ্ভিঃ ।
অগ্রেপাভির্ঋতুপাভিঃ সজোষা গ্নাস্পত্নীভী রত্নধাভিঃ সজোষাঃ ॥৭॥

34.8

সজোষস আদিত্যৈর্মাদয়ধ্বং সজোষস ঋভবঃ পর্বতেভিঃ ।
সজোষসো দৈব্যেনা সবিত্রা সজোষসঃ সিন্ধুভী রত্নধেভিঃ ॥৮॥

34.9

যে অশ্বিনা যে পিতরা য ঊতী ধেনুং ততক্ষুর্ঋভবো যে অশ্বা ।
যে অংসত্রা য ঋধগ্রোদসী যে বিভ্বো নরঃ স্বপত্যানি চক্রুঃ ॥৯॥

34.10

যে গোমন্তং বাজবন্তং সুবীরং রয়িং ধত্থ বসুমন্তং পুরুক্ষুম্ ।
তে অগ্রেপা ঋভবো মন্দসানা অস্মে ধত্ত যে চ রাতিং গৃণন্তি ॥১০॥

34.11

নাপাভূত ন বোঽতীতৃষামাঽনিঃশস্তা ঋভবো যজ্ঞে অস্মিন্ ।
সমিন্দ্রেণ মদথ সং মরুদ্ভিঃ সং রাজভী রত্নধেয়ায় দেবাঃ ॥১১॥