সূক্ত 33

33.1

১১ বামদেবো গৌতমঃ। ঋভবঃ। ত্রিষ্টুপ্।

প্র ঋভুভ্যো দূতমিব বাচমিষ্য উপস্তিরে শ্বৈতরীং ধেনুমীলে ।
যে বাতজূতাস্তরণিভিরেবৈঃ পরি দ্যাং সদ্যো অপসো বভূবুঃ ॥১॥

যদারমক্রন্নৃভবঃ পিতৃভ্যাং পরিবিষ্টী বেষণা দংসনাভিঃ ।
আদিদ্ দেবানামুপ সখ্যমায়ন্ ধীরাসঃ পুষ্টিমবহন্ মনায়ৈ ॥২॥

পুনর্যে চক্রুঃ পিতরা যুবানা সনা যূপেব জরণা শয়ানা ।
তে বাজো বিভ্বাঁ ঋভুরিন্দ্রবন্তো মধুপ্সরসো নোঽবন্তু যজ্ঞম্ ॥৩॥

যৎ সংবত্সমৃভবো গামরক্ষন্ যৎ সংবত্সমৃভবো মা অপিংশন্ ।
যৎ সংবত্সমভরন্ ভাসো অস্যাস্তাভিঃ শমীভিরমৃতত্বমাশুঃ ॥৪॥

জ্যেষ্ঠ আহ চমসা দ্বা করেতি কনীয়ান্ ত্রীন্ কৃণবামেত্যাহ ।
কনিষ্ঠ আহ চতুরস্করেতি ত্বষ্ট ঋভবস্তৎ পনয়দ্ বচো বঃ ॥৫॥

সত্যমূচুর্নর এবা হি চক্রুরনু স্বধামৃভবো জগ্মুরেতাম্ ।
বিভ্রাজমানাঁশ্চমসাঁ অহেবাঽবেনৎ ত্বষ্টা চতুরো দদৃশ্বান্ ॥৬॥

দ্বাদশ দ্যূন্ যদগোহ্যস্যাঽঽতিথ্যে রণন্নৃভবঃ সসন্তঃ ।
সুক্ষেত্রাকৃণ্বন্ননয়ন্ত সিন্ধূন্ ধন্বাতিষ্ঠন্নোষধীর্নিম্নমাপঃ ॥৭॥

রথং যে চক্রুঃ সুবৃতং নরেষ্ঠাং যে ধেনুং বিশ্বজুবং বিশ্বরূপাম্ ।
ত আ তক্ষন্ত্বৃভবো রয়িং নঃ স্ববসঃ স্বপসঃ সুহস্তাঃ ॥৮॥

অপো হ্যেষামজুষন্ত দেবা অভি ক্রত্বা মনসা দীধ্যানাঃ ।
বাজো দেবানামভবৎ সুকর্মেন্দ্রস্য ঋভুক্ষা বরুণস্য বিভ্বা ॥৯॥

যে হরী মেধয়োক্থা মদন্ত ইন্দ্রায় চক্রুঃ সুয়ুজা যে অশ্বা ।
তে রায়স্পোষং দ্রবিণান্যস্মে ধত্ত ঋভবঃ ক্ষেময়ন্তো ন মিত্রম্ ॥১০॥

ইদাহ্নঃ পীতিমুত বো মদং ধুর্ন ঋতে শ্রান্তস্য সখ্যায় দেবাঃ ।
তে নূনমস্মে ঋভবো বসূনি তৃতীয়ে অস্মিন্ ত্সবনে দধাত ॥১১॥