সূক্ত 32

32.1

২৪ বামদেবো গৌতমঃ। ইন্দ্রঃ, ২৩-২৪ ইন্দ্রাশ্বৌ। গায়ত্রী।

আ তূ ন ইন্দ্র বৃত্রহন্নস্মাকমর্ধমা গহি । মহান্মহীভিরূতিভিঃ ॥১॥

32.2

ভৃমিশ্চিদ্ ঘাসি তূতুজিরা চিত্র চিত্রিণীষ্বা । চিত্রং কৃণোষ্যূতয়ে ॥২॥

32.3

দভ্রেভিশ্চিচ্ছশীয়াংসং হংসি ব্রাধন্তমোজসা । সখিভির্যে ত্বে সচা ॥৩॥

32.4

বয়মিন্দ্র ত্বে সচা বয়ং ত্বাভি নোনুমঃ । অস্মাঁঅস্মাঁ ইদুদব ॥৪॥

32.5

স নশ্চিত্রাভিরদ্রিবোঽনবদ্যাভিরূতিভিঃ । অনাধৃষ্টাভিরা গহি ॥৫॥

32.6

ভূয়ামো ষু ত্বাবতঃ সখায় ইন্দ্র গোমতঃ । যুজো বাজায় ঘৃষ্বয়ে ॥৬॥

32.7

ত্বং হ্যেক ঈশিষ ইন্দ্র বাজস্য গোমতঃ । স নো যন্ধি মহীমিষম্ ॥৭॥

32.8

ন ত্বা বরন্তে অন্যথা যদ্ দিত্সসি স্তুতো মঘম্ । স্তোতৃভ্য ইন্দ্র গির্বণঃ ॥৮॥

32.9

অভি ত্বা গোতমা গিরানূষত প্র দাবনে । ইন্দ্র বাজায় ঘৃষ্বয়ে ॥৯॥

32.10

প্র তে বোচাম বীর্যা৩ যা মন্দসান আরুজঃ । পুরো দাসীরভীত্য ॥১০॥

32.11

তা তে গৃণন্তি বেধসো যানি চকর্থ পৌংস্যা । সুতেষ্বিন্দ্র গির্বণঃ ॥১১॥

32.12

অবীবৃধন্ত গোতমা ইন্দ্র ত্বে স্তোমবাহসঃ । ঐষু ধা বীরবদ্ যশঃ ॥১২॥

32.13

যচ্চিদ্ধি শশ্বতামসীন্দ্র সাধারণস্ত্বম্ । তং ত্বা বয়ং হবামহে ॥১৩॥

32.14

অর্বাচীনো বসো ভবাঽস্মে সু মত্স্বান্ধসঃ । সোমানামিন্দ্র সোমপাঃ ॥১৪॥

32.15

অস্মাকং ত্বা মতীনামা স্তোম ইন্দ্র যচ্ছতু । অর্বাগা বর্তয়া হরী ॥১৫॥

32.16

পুরোলাশং চ নো ঘসো জোষয়াসে গিরশ্চ নঃ । বধূয়ুরিব যোষণাম্ ॥১৬॥

32.17

সহস্রং ব্যতীনাং যুক্তানামিন্দ্রমীমহে । শতং সোমস্য খার্যঃ ॥১৭॥

32.18

সহস্রা তে শতা বয়ং গবামা চ্যাবয়ামসি । অস্মত্রা রাধ এতু তে ॥১৮॥

32.19

দশ তে কলশানাং হিরণ্যানামধীমহি । ভূরিদা অসি বৃত্রহন্ ॥১৯॥

32.20

ভূরিদা ভূরি দেহি নো মা দভ্রং ভূর্যা ভর । ভূরি ঘেদিন্দ্র দিত্সসি ॥২০॥

32.21

ভূরিদা হ্যসি শ্রুতঃ পুরুত্রা শূর বৃত্রহন্ । আ নো ভজস্ব রাধসি ॥২১॥

32.22

প্র তে বভ্রূ বিচক্ষণ শংসামি গোষণো নপাৎ । মাভ্যাং গা অনু শিশ্রথঃ ॥২২॥

32.23

কনীনকেব বিদ্রধে নবে দ্রুপদে অর্ভকে । বভ্রূ যামেষু শোভেতে ॥২৩॥

32.24

অরং ম উস্রয়াম্ণেঽরমনুস্রয়াম্ণে । বভ্রূ যামেষ্বস্রিধা ॥২৪॥