সূক্ত 23

23.1

১১ বামদেবো গৌতমঃ। ইন্দ্রঃ, ৮-১০ ঋতং বা। ত্রিষ্টুপ্।

কথা মহামবৃধৎ কস্য হোতুর্যজ্ঞং জুষাণো অভি সোমমূধঃ ।
পিবন্নুশানো জুষমাণো অন্ধো ববক্ষ ঋষ্বঃ শুচতে ধনায় ॥১॥

কো অস্য বীরঃ সধমাদমাপ সমানংশ সুমতিভিঃ কো অস্য ।
কদস্য চিত্রং চিকিতে কদূতী বৃধে ভুবচ্ছশমানস্য যজ্যোঃ ॥২॥

কথা শৃণোতি হূয়মানমিন্দ্রঃ কথা শৃণ্বন্নবসামস্য বেদ ।
কা অস্য পূর্বীরুপমাতয়ো হ কথৈনমাহুঃ পপুরিং জরিত্রে ॥৩॥

কথা সবাধঃ শশমানো অস্য নশদভি দ্রবিণং দীধ্যানঃ ।
দেবো ভুবন্নবেদা ম ঋতানাং নমো জগৃভ্বাঁ অভি যজ্জুজোষৎ ॥৪॥

কথা কদস্যা উষসো ব্যুষ্টৌ দেবো মর্তস্য সখ্যং জুজোষ ।
কথা কদস্য সখ্যং সখিভ্যো যে অস্মিন্ কামং সুয়ুজং ততস্রে ॥৫॥

কিমাদমত্রং সখ্যং সখিভ্যঃ কদা নু তে ভ্রাত্রং প্র ব্রবাম ।
শ্রিয়ে সুদৃশো বপুরস্য সর্গাঃ স্ব১র্ণ চিত্রতমমিষ আ গোঃ ॥৬॥

দ্রুহং জিঘাংসন্ ধ্বরসমনিন্দ্রাং তেতিক্তে তিগ্মা তুজসে অনীকা ।
ঋণা চিদ্ যত্র ঋণয়া ন উগ্রো দূরে অজ্ঞাতা উষসো ববাধে ॥৭॥

ঋতস্য হি শুরুধঃ সন্তি পূর্বীর্ঋতস্য ধীতির্বৃজিনানি হন্তি ।
ঋতস্য শ্লোকো বধিরা ততর্দ কর্ণা বুধানঃ শুচমান আয়োঃ ॥৮॥

ঋতস্য দৃলহা ধরুণানি সন্তি পুরূণি চন্দ্রা বপুষে বপূংষি ।
ঋতেন দীর্ঘমিষণন্ত পৃক্ষ ঋতেন গাব ঋতমা বিবেশুঃ ॥৯॥

ঋতং যেমান ঋতমিদ্ বনোত্যৃতস্য শুষ্মস্তুরয়া উ গব্যুঃ ।
ঋতায় পৃথ্বী বহুলে গভীরে ঋতায় ধেনূ পরমে দুহাতে ॥১০॥

নূ ষ্টুত ইন্দ্র নূ গৃণান ইষং জরিত্রে নদ্যো৩ ন পীপেঃ ।
অকারি তে হরিবো ব্রহ্ম নব্যং ধিয়া স্যাম রথ্যঃ সদাসাঃ ॥১১॥