Sukta 23

23.1

11 vamadevo gautamah, indrah, 8-10 ritam va, trishtup

क॒था म॒हाम॑वृध॒त् कस्य॒ होतु॑र्य॒ज्ञं जु॑षा॒णो अ॒भि सोम॒मूध॑ः ।
पिब॑न्नुशा॒नो जु॒षमा॑णो॒ अन्धो॑ वव॒क्ष ऋ॒ष्वः शु॑च॒ते धना॑य ॥१॥

Katha mahamavridhat kasya hoturyagyam jushano abhi somamudhah
Pibannushano jushamano andho vavaksha rishvah shuchate dhanaya

को अ॑स्य वी॒रः स॑ध॒माद॑माप॒ समा॑नंश सुम॒तिभि॒ः को अ॑स्य ।
कद॑स्य चि॒त्रं चि॑किते॒ कदू॒ती वृ॒धे भु॑वच्छशमा॒नस्य॒ यज्यो॑ः ॥२॥

Ko asya virah sadhamadamapa samanansha sumatibhih ko asya
Kadasya chitram chikite kaduti vridhe bhuvachchhashamanasya yajyoh

क॒था शृ॑णोति हू॒यमा॑न॒मिन्द्र॑ः क॒था शृ॒ण्वन्नव॑सामस्य वेद ।
का अ॑स्य पू॒र्वीरुप॑मातयो ह क॒थैन॑माहु॒ः पपु॑रिं जरि॒त्रे ॥३॥

Katha shrinoti huyamanamindrah katha shrinvannavasamasya veda
Ka asya purvirupamatayo ha kathainamahuh papurim jaritre

क॒था स॒बाध॑ः शशमा॒नो अ॑स्य॒ नश॑द॒भि द्रवि॑णं॒ दीध्या॑नः ।
दे॒वो भु॑व॒न्नवे॑दा म ऋ॒तानां॒ नमो॑ जगृ॒भ्वाँ अ॒भि यज्जुजो॑षत् ॥४॥

Katha sabadhah shashamano asya nashadabhi dravinam didhyanah
Devo bhuvannaveda ma ritanam namo jagribhvam abhi yajjujoshat

क॒था कद॒स्या उ॒षसो॒ व्यु॑ष्टौ दे॒वो मर्त॑स्य स॒ख्यं जु॑जोष ।
क॒था कद॑स्य स॒ख्यं सखि॑भ्यो॒ ये अ॑स्मि॒न् कामं॑ सु॒युजं॑ तत॒स्रे ॥५॥

Katha kadasya ushaso vyushtau devo martasya sakhyam jujosha
Katha kadasya sakhyam sakhibhyo ye asmin kamam suyujam tatasre

किमादम॑त्रं स॒ख्यं सखि॑भ्यः क॒दा नु ते॑ भ्रा॒त्रं प्र ब्र॑वाम ।
श्रि॒ये सु॒दृशो॒ वपु॑रस्य॒ सर्गा॒ः स्व१र्ण चि॒त्रत॑ममिष॒ आ गोः ॥६॥

Kimadamatram sakhyam sakhibhyah kada nu te bhratram pra bravama
Shriye sudrisho vapurasya sargah sva1rna chitratamamisha a goh

द्रुहं॒ जिघां॑सन् ध्व॒रस॑मनि॒न्द्रां तेति॑क्ते ति॒ग्मा तु॒जसे॒ अनी॑का ।
ऋ॒णा चि॒द् यत्र॑ ऋण॒या न॑ उ॒ग्रो दू॒रे अज्ञा॑ता उ॒षसो॑ बबा॒धे ॥७॥

Druham jighansan dhvarasamanindram tetikte tigma tujase anika
Rina chid yatra rinaya na ugro dure agyata ushaso babadhe

ऋ॒तस्य॒ हि शु॒रुध॒ः सन्ति॑ पू॒र्वीर्ऋ॒तस्य॑ धी॒तिर्वृ॑जि॒नानि॑ हन्ति ।
ऋ॒तस्य॒ श्लोको॑ बधि॒रा त॑तर्द॒ कर्णा॑ बुधा॒नः शु॒चमा॑न आ॒योः ॥८॥

Ritasya hi shurudhah santi purvirritasya dhitirvrijinani hanti
Ritasya shloko badhira tatarda karna budhanah shuchamana ayoh

ऋ॒तस्य॑ दृ॒ळहा ध॒रुणा॑नि सन्ति पु॒रूणि॑ च॒न्द्रा वपु॑षे॒ वपूं॑षि ।
ऋ॒तेन॑ दी॒र्घमि॑षणन्त॒ पृक्ष॑ ऋ॒तेन॒ गाव॑ ऋ॒तमा वि॑वेशुः ॥९॥

Ritasya drilaha dharunani santi puruni chandra vapushe vapunshi
Ritena dirghamishananta priksha ritena gava ritama viveshuh

ऋ॒तं ये॑मा॒न ऋ॒तमिद् व॑नोत्यृ॒तस्य॒ शुष्म॑स्तुर॒या उ॑ ग॒व्युः ।
ऋ॒ताय॑ पृ॒थ्वी ब॑हु॒ले ग॑भी॒रे ऋ॒ताय॑ धे॒नू प॑र॒मे दु॑हाते ॥१०॥

Ritam yemana ritamid vanotyritasya shushmasturaya u gavyuh
Ritaya prithvi bahule gabhire ritaya dhenu parame duhate

नू ष्टु॒त इ॑न्द्र॒ नू गृ॑णा॒न इषं॑ जरि॒त्रे न॒द्यो॒३ न पी॑पेः ।
अका॑रि ते हरिवो॒ ब्रह्म॒ नव्यं॑ धि॒या स्या॑म र॒थ्य॑ः सदा॒साः ॥११॥

Nu shtuta indra nu grinana isham jaritre nadyo3 na pipeh
Akari te harivo brahma navyam dhiya syama rathyah sadasah