সূক্ত 22

22.1

১১ বামদেবো গৌতমঃ। ইন্দ্রঃ। ত্রিষ্টুপ্।

যন্ন ইন্দ্রো জুজুষে যচ্চ বষ্টি তন্নো মহান্ করতি শুষ্ম্যা চিৎ ।
ব্রহ্ম স্তোমং মঘবা সোমমুক্থা যো অশ্মানং শবসা বিভ্রদেতি ॥১॥

22.2

বৃষা বৃষন্ধিং চতুরশ্রিমস্যন্নুগ্রো বাহুভ্যাং নৃতমঃ শচীবান্ ।
শ্রিয়ে পরুষ্ণীমুষমাণ ঊর্ণাং যস্যাঃ পর্বাণি সখ্যায় বিব্যে ॥২॥

22.3

যো দেবো দেবতমো জায়মানো মহো বাজেভির্মহদ্ভিশ্চ শুষ্মৈঃ ।
দধানো বজ্রং বাহ্বোরুশন্তং দ্যামমেন রেজয়ৎ প্র ভূম ॥৩॥

22.4

বিশ্বা রোধাংসি প্রবতশ্চ পূর্বীর্দ্যৌর্ঋষ্বাজ্জনিমন্ রেজত ক্ষাঃ ।
আ মাতরা ভরতি শুষ্ম্যা গোর্নৃবৎ পরিজ্মন্ নোনুবন্ত বাতাঃ ॥৪॥

22.5

তা তূ ত ইন্দ্র মহতো মহানি বিশ্বেষ্বিৎ সবনেষু প্রবাচ্যা ।
যচ্ছূর ধৃষ্ণো ধৃষতা দধৃষ্বানহিং বজ্রেণ শবসাবিবেষীঃ ॥৫॥

22.6

তা তূ তে সত্যা তুবিনৃম্ণ বিশ্বা প্র ধেনবঃ সিস্রতে বৃষ্ণ ঊধ্নঃ ।
অধা হ ত্বদ্ বৃষমণো ভিয়ানাঃ প্র সিন্ধবো জবসা চক্রমন্ত ॥৬॥

22.7

অত্রাহ তে হরিবস্তা উ দেবীরবোভিরিন্দ্র স্তবন্ত স্বসারঃ ।
যৎ সীমনু প্র মুচো বদ্বধানা দীর্ঘামনু প্রসিতিং স্যন্দয়ধ্যৈ ॥৭॥

22.8

পিপীলে অংশুর্মদ্যো ন সিন্ধুরা ত্বা শমী শশমানস্য শক্তিঃ ।
অস্মদ্র্যক্ শুশুচানস্য যম্যা আশুর্ন রশ্মিং তুব্যোজসং গোঃ ॥৮॥

22.9

অস্মে বর্ষিষ্ঠা কৃণুহি জ্যেষ্ঠা নৃম্ণানি সত্রা সহুরে সহাংসি ।
অস্মভ্যং বৃত্রা সুহনানি রন্ধি জহি বধর্বনুষো মর্ত্যস্য ॥৯॥

22.10

অস্মাকমিৎ সু শৃণুহি ত্বমিন্দ্রাঽস্মভ্যং চিত্রাঁ উপ মাহি বাজান্ ।
অস্মভ্যং বিশ্বা ইষণঃ পুরংধীরস্মাকং সু মঘবন্ বোধি গোদাঃ ॥১০॥

22.11

নূ ষ্টুত ইন্দ্র নূ গৃণান ইষং জরিত্রে নদ্যো৩ ন পীপেঃ ।
অকারি তে হরিবো ব্রহ্ম নব্যং ধিয়া স্যাম রথ্যঃ সদাসাঃ ॥১১॥