সূক্ত 21

21.1

১১ বামদেবো গৌতমঃ। ইন্দ্রঃ। ত্রিষ্টুপ্।

আ যাত্বিন্দ্রোঽবস উপ ন ইহ স্তুতঃ সধমাদস্তু শূরঃ ।
বাবৃধানস্তবিষীর্যস্য পূর্বীর্দ্যৌর্ন ক্ষত্রমভিভূতি পুষ্যাৎ ॥১॥

তস্যেদিহ স্তবথ বৃষ্ণ্যানি তুবিদ্যুম্নস্য তুবিরাধসো নৄন্ ।
যস্য ক্রতুর্বিদথ্যো৩ ন সম্রাট্ সাহ্বান্তরুত্রো অভ্যস্তি কৃষ্টীঃ ॥২॥

আ যাত্বিন্দ্রো দিব আ পৃথিব্যা মক্ষূ সমুদ্রাদুত বা পুরীষাৎ ।
স্বর্ণরাদবসে নো মরুত্বান্ পরাবতো বা সদনাদৃতস্য ॥৩॥

স্থূরস্য রায়ো বৃহতো য ঈশে তমু ষ্টবাম বিদথেষ্বিন্দ্রম্ ।
যো বায়ুনা জয়তি গোমতীষু প্র ধৃষ্ণুয়া নয়তি বস্যো অচ্ছ ॥৪॥

উপ যো নমো নমসি স্তভায়ন্নিয়র্তি বাচং জনয়ন্ যজধ্যৈ ।
ঋঞ্জসানঃ পুরুবার উক্থৈরেন্দ্রং কৃণ্বীত সদনেষু হোতা ॥৫॥

ধিষা যদি ধিষণ্যন্তঃ সরণ্যান্ ত্সদন্তো অদ্রিমৌশিজস্য গোহে ।
আ দুরোষাঃ পাস্ত্যস্য হোতা যো নো মহান্ ত্সংবরণেষু বহ্নিঃ ॥৬॥

সত্রা যদীং ভার্বরস্য বৃষ্ণঃ সিষক্তি শুষ্মঃ স্তুবতে ভরায় ।
গুহা যদীমৌশিজস্য গোহে প্র যদ্ ধিয়ে প্রায়সে মদায় ॥৭॥

বি যদ্ বরাংসি পর্বতস্য বৃণ্বে পয়োভির্জিন্বে অপাং জবাংসি ।
বিদদ্ গৌরস্য গবয়স্য গোহে যদী বাজায় সুধ্যো৩ বহন্তি ॥৮॥

ভদ্রা তে হস্তা সুকৃতোত পাণী প্রয়ন্তারা স্তুবতে রাধ ইন্দ্র ।
কা তে নিষত্তিঃ কিমু নো মমত্সি কিং নোদুদু হর্ষসে দাতবা উ ॥৯॥

এবা বস্ব ইন্দ্রঃ সত্যঃ সম্রাড্ঢন্তা বৃত্রং বরিবঃ পূরবে কঃ ।
পুরুষ্টুত ক্রত্বা নঃ শগ্ধি রায়ো ভক্ষীয় তেঽবসো দৈব্যস্য ॥১০॥

নূ ষ্টুত ইন্দ্র নূ গৃণান ইষং জরিত্রে নদ্যো৩ ন পীপেঃ ।
অকারি তে হরিবো ব্রহ্ম নব্যং ধিয়া স্যাম রথ্যঃ সদাসাঃ ॥১১॥