Sukta 21

21.1

11 vamadevo gautamah, indrah, trishtup

आ या॒त्विन्द्रोऽव॑स॒ उप॑ न इ॒ह स्तु॒तः स॑ध॒माद॑स्तु॒ शूर॑ः ।
वा॒वृ॒धा॒नस्तवि॑षी॒र्यस्य॑ पू॒र्वीर्द्यौर्न क्ष॒त्रम॒भिभू॑ति॒ पुष्या॑त् ॥१॥

A yatvindrovasa upa na iha stutah sadhamadastu shurah
Vavridhanastavishiryasya purvirdyaurna kshatramabhibhuti pushyat

21.2

तस्येदि॒ह स्त॑वथ॒ वृष्ण्या॑नि तुविद्यु॒म्नस्य॑ तुवि॒राध॑सो॒ नॄन् ।
यस्य॒ क्रतु॑र्विद॒थ्यो॒३ न स॒म्राट् सा॒ह्वान्तरु॑त्रो अ॒भ्यस्ति॑ कृ॒ष्टीः ॥२॥

Tasyediha stavatha vrishnyani tuvidyumnasya tuviradhaso nrin
Yasya kraturvidathyo3 na samrat sahvantarutro abhyasti krishtih

21.3

आ या॒त्विन्द्रो॑ दि॒व आ पृ॑थि॒व्या म॒क्षू स॑मु॒द्रादु॒त वा॒ पुरी॑षात् ।
स्व॑र्णरा॒दव॑से नो म॒रुत्वा॑न् परा॒वतो॑ वा॒ सद॑नादृ॒तस्य॑ ॥३॥

A yatvindro diva a prithivya makshu samudraduta va purishat
Svarnaradavase no marutvan paravato va sadanadritasya

21.4

स्थू॒रस्य॑ रा॒यो बृ॑ह॒तो य ईशे॒ तमु॑ ष्टवाम वि॒दथे॒ष्विन्द्र॑म् ।
यो वा॒युना॒ जय॑ति॒ गोम॑तीषु॒ प्र धृ॑ष्णु॒या नय॑ति॒ वस्यो॒ अच्छ॑ ॥४॥

Sthurasya rayo brihato ya ishe tamu shtavama vidatheshvindram
Yo vayuna jayati gomatishu pra dhrishnuya nayati vasyo achchha

21.5

उप॒ यो नमो॒ नम॑सि स्तभा॒यन्निय॑र्ति॒ वाचं॑ ज॒नय॒न् यज॑ध्यै ।
ऋ॒ञ्ज॒सा॒नः पु॑रु॒वार॑ उ॒क्थैरेन्द्रं॑ कृण्वीत॒ सद॑नेषु॒ होता॑ ॥५॥

Upa yo namo namasi stabhayanniyarti vacham janayan yajadhyai
Rinjasanah puruvara ukthairendram krinvita sadaneshu hota

21.6

धि॒षा यदि॑ धिष॒ण्यन्त॑ः सर॒ण्यान् त्सद॑न्तो॒ अद्रि॑मौशि॒जस्य॒ गोहे॑ ।
आ दु॒रोषा॑ः पा॒स्त्यस्य॒ होता॒ यो नो॑ म॒हान् त्सं॒वर॑णेषु॒ वह्नि॑ः ॥६॥

Dhisha yadi dhishanyantah saranyan tsadanto adrimaushijasya gohe
A duroshah pastyasya hota yo no mahan tsanvaraneshu vahnih

21.7

स॒त्रा यदीं॑ भार्व॒रस्य॒ वृष्ण॒ः सिष॑क्ति॒ शुष्म॑ः स्तुव॒ते भरा॑य ।
गुहा॒ यदी॑मौशि॒जस्य॒ गोहे॒ प्र यद् धि॒ये प्राय॑से॒ मदा॑य ॥७॥

Satra yadim bharvarasya vrishnah sishakti shushmah stuvate bharaya
Guha yadimaushijasya gohe pra yad dhiye prayase madaya

21.8

वि यद् वरां॑सि॒ पर्व॑तस्य वृ॒ण्वे पयो॑भिर्जि॒न्वे अ॒पां जवां॑सि ।
वि॒दद् गौ॒रस्य॑ गव॒यस्य॒ गोहे॒ यदी॒ वाजा॑य सु॒ध्यो॒३ वह॑न्ति ॥८॥

Vi yad varansi parvatasya vrinve payobhirjinve apam javansi
Vidad gaurasya gavayasya gohe yadi vajaya sudhyo3 vahanti

21.9

भ॒द्रा ते॒ हस्ता॒ सुकृ॑तो॒त पा॒णी प्र॑य॒न्तारा॑ स्तुव॒ते राध॑ इन्द्र ।
का ते॒ निष॑त्ति॒ः किमु॒ नो म॑मत्सि॒ किं नोदु॑दु हर्षसे॒ दात॒वा उ॑ ॥९॥

Bhadra te hasta sukritota pani prayantara stuvate radha indra
Ka te nishattih kimu no mamatsi kim nodudu harshase datava u

21.10

ए॒वा वस्व॒ इन्द्र॑ः स॒त्यः स॒म्राड्ढन्ता॑ वृ॒त्रं वरि॑वः पू॒रवे॑ कः ।
पुरु॑ष्टुत॒ क्रत्वा॑ नः शग्धि रा॒यो भ॑क्षी॒य तेऽव॑सो॒ दैव्य॑स्य ॥१०॥

Eva vasva indrah satyah samraddhanta vritram varivah purave kah
Purushtuta kratva nah shagdhi rayo bhakshiya tevaso daivyasya

21.11

नू ष्टु॒त इ॑न्द्र॒ नू गृ॑णा॒न इषं॑ जरि॒त्रे न॒द्यो॒३ न पी॑पेः ।
अका॑रि ते हरिवो॒ ब्रह्म॒ नव्यं॑ धि॒या स्या॑म र॒थ्य॑ः सदा॒साः ॥११॥

Nu shtuta indra nu grinana isham jaritre nadyo3 na pipeh
Akari te harivo brahma navyam dhiya syama rathyah sadasah