সূক্ত 20

20.1

১১ বামদেবো গৌতমঃ। ইন্দ্রঃ। ত্রিষ্টুপ্।

আ ন ইন্দ্রো দূরাদা ন আসাদভিষ্টিকৃদবসে যাসদুগ্রঃ ।
ওজিষ্ঠেভির্নৃপতির্বজ্রবাহুঃ সংগে সমত্সু তুর্বণিঃ পৃতন্যূন্ ॥১॥

20.2

আ ন ইন্দ্রো হরিভির্যাত্বচ্ছাঽর্বাচীনোঽবসে রাধসে চ ।
তিষ্ঠাতি বজ্রী মঘবা বিরপ্শীমং যজ্ঞমনু নো বাজসাতৌ ॥২॥

20.3

ইমং যজ্ঞং ত্বমস্মাকমিন্দ্র পুরো দধৎ সনিষ্যসি ক্রতুং নঃ ।
শ্বঘ্নীব বজ্রিন্ ত্সনয়ে ধনানাং ত্বয়া বয়মর্য আজিং জয়েম ॥৩॥

20.4

উশন্নু ষু ণঃ সুমনা উপাকে সোমস্য নু সুষুতস্য স্বধাবঃ ।
পা ইন্দ্র প্রতিভৃতস্য মধ্বঃ সমন্ধসা মমদঃ পৃষ্ঠ্যেন ॥৪॥

20.5

বি যো ররপ্শ ঋষিভির্নবেভির্বৃক্ষো ন পক্বঃ সৃণ্যো ন জেতা ।
মর্যো ন যোষামভি মন্যমানোঽচ্ছা বিবক্মি পুরুহূতমিন্দ্রম্ ॥৫॥

20.6

গিরির্ন যঃ স্বতবাঁ ঋষ্ব ইন্দ্রঃ সনাদেব সহসে জাত উগ্রঃ ।
আদর্তা বজ্রং স্থবিরং ন ভীম উদ্নেব কোশং বসুনা ন্যৃষ্টম্ ॥৬॥

20.7

ন যস্য বর্তা জনুষা ন্বস্তি ন রাধস আমরীতা মঘস্য ।
উদ্বাবৃষাণস্তবিষীব উগ্রাস্মভ্যং দদ্ধি পুরুহূত রায়ঃ ॥৭॥

20.8

ঈক্ষে রায়ঃ ক্ষয়স্য চর্ষণীনামুত ব্রজমপবর্তাসি গোনাম্ ।
শিক্ষানরঃ সমিথেষু প্রহাবান্ বস্বো রাশিমভিনেতাসি ভূরিম্ ॥৮॥

20.9

কয়া তচ্ছৃণ্বে শচ্যা শচিষ্ঠো যয়া কৃণোতি মুহু কা চিদৃষ্বঃ ।
পুরু দাশুষে বিচয়িষ্ঠো অংহোঽথা দধাতি দ্রবিণং জরিত্রে ॥৯॥

20.10

মা নো মর্ধীরা ভরা দদ্ধি তন্নঃ প্র দাশুষে দাতবে ভূরি যত্তে ।
নব্যে দেষ্ণে শস্তে অস্মিন্ ত উক্থে প্র ব্রবাম বয়মিন্দ্র স্তুবন্তঃ ॥১০॥

20.11

নূ ষ্টুত ইন্দ্র নূ গৃণান ইষং জরিত্রে নদ্যো৩ ন পীপেঃ ।
অকারি তে হরিবো ব্রহ্ম নব্যং ধিয়া স্যাম রথ্যঃ সদাসাঃ ॥১১॥