সূক্ত 19

19.1

১১ বামদেবো গৌতমঃ। ইন্দ্রঃ। ত্রিষ্টুপ্।

এবা ত্বামিন্দ্র বজ্রিন্নত্র বিশ্বে দেবাসঃ সুহবাস ঊমাঃ ।
মহামুভে রোদসী বৃদ্ধমৃষ্বং নিরেকমিদ্ বৃণতে বৃত্রহত্যে ॥১॥

19.2

অবাসৃজন্ত জিব্রয়ো ন দেবা ভুবঃ সম্রালিন্দ্র সত্যয়োনিঃ ।
অহন্নহিং পরিশয়ানমর্ণঃ প্র বর্তনীররদো বিশ্বধেনাঃ ॥২॥

19.3

অতৃপ্ণুবন্তং বিয়তমবুধ্যমবুধ্যমানং সুষুপাণমিন্দ্র ।
সপ্ত প্রতি প্রবত আশয়ানমহিং বজ্রেণ বি রিণা অপর্বন্ ॥৩॥

19.4

অক্ষোদয়চ্ছবসা ক্ষাম বুধ্নং বার্ণ বাতস্তবিষীভিরিন্দ্রঃ ।
দৃলহান্যৌভ্নাদুশমান ওজোঽবাভিনৎ ককুভঃ পর্বতানাম্ ॥৪॥

19.5

অভি প্র দদ্রুর্জনয়ো ন গর্ভং রথা ইব প্র যয়ুঃ সাকমদ্রয়ঃ ।
অতর্পয়ো বিসৃত উব্জ ঊর্মীন্ ত্বং বৃতাঁ অরিণা ইন্দ্র সিন্ধূন্ ॥৫॥

19.6

ত্বং মহীমবনিং বিশ্বধেনাং তুর্বীতয়ে বয্যায় ক্ষরন্তীম্ ।
অরময়ো নমসৈজদর্ণঃ সুতরণাঁ অকৃণোরিন্দ্র সিন্ধূন্ ॥৬॥

19.7

প্রাগ্রুবো নভন্বো৩ ন বক্বা ধ্বস্রা অপিন্বদ্ যুবতীর্ঋতজ্ঞাঃ ।
ধন্বান্যজ্রাঁ অপৃণক্ তৃষাণাঁ অধোগিন্দ্রঃ স্তর্যো৩ দংসুপত্নীঃ ॥৭॥

19.8

পূর্বীরুষসঃ শরদশ্চ গূর্তা বৃত্রং জঘন্বাঁ অসৃজদ্ বি সিন্ধূন্ ।
পরিষ্ঠিতা অতৃণদ্ বদ্বধানাঃ সীরা ইন্দ্রঃ স্রবিতবে পৃথিব্যা ॥৮॥

19.9

বম্রীভিঃ পুত্রমগ্রুবো অদানং নিবেশনাদ্ধরিব আ জভর্থ ।
ব্য১ন্ধো অখ্যদহিমাদদানো নির্ভূদুখচ্ছিত্সমরন্ত পর্ব ॥৯॥

19.10

প্র তে পূর্বাণি করণানি বিপ্রাঽঽবিদ্বাঁ আহ বিদুষে করাংসি ।
যথায়থা বৃষ্ণ্যানি স্বগূর্তা ঽপাংসি রাজন্ নর্যাবিবেষীঃ ॥১০॥

19.11

নূ ষ্টুত ইন্দ্র নূ গৃণান ইষং জরিত্রে নদ্যো৩ ন পীপেঃ ।
অকারি তে হরিবো ব্রহ্ম নব্যং ধিয়া স্যাম রথ্যঃ সদাসাঃ ॥১১॥