সূক্ত 18

18.1

১৩ বামদেবো গৌতমঃ, ১ ইন্দ্রঃ,৪ (উত্তরার্ধর্চস্য), ৭ অদিতিঃ। ১ বামদেবঃ, ২-৪ (পূর্বার্ধর্চস্য), ৮-১৩ ইন্দ্রঃ,(উত্তরার্ধর্চস্য), ৭ বামদেবঃ। ত্রিষ্টুপ্।

অয়ং পন্থা অনুবিত্তঃ পুরাণো যতো দেবা উদজায়ন্ত বিশ্বে ।
অতশ্চিদা জনিষীষ্ট প্রবৃদ্ধো মা মাতরমমুয়া পত্তবে কঃ ॥১॥

নাহমতো নিরয়া দুর্গহৈতৎ তিরশ্চতা পার্শ্বান্নির্গমাণি ।
বহূনি মে অকৃতা কর্ত্বানি যুধ্যৈ ত্বেন সং ত্বেন পৃচ্ছৈ ॥২॥

পরায়তীং মাতরমন্বচষ্ট ন নানু গান্যনু নূ গমানি ।
ত্বষ্টুর্গৃহে অপিবৎ সোমমিন্দ্রঃ শতধন্যং চম্বোঃ সুতস্য ॥৩॥

কিং স ঋধক্ কৃণবদ্ যং সহস্রং মাসো জভার শরদশ্চ পূর্বীঃ ।
নহী ন্বস্য প্রতিমানমস্ত্যন্তর্জাতেষূত যে জনিত্বাঃ ॥৪॥

অবদ্যমিব মন্যমানা গুহাকরিন্দ্রং মাতা বীর্যেণা ন্যৃষ্টম্ ।
অথোদস্থাৎ স্বয়মত্কং বসান আ রোদসী অপৃণাজ্জায়মানঃ ॥৫॥

এতা অর্ষন্ত্যললাভবন্তীর্ঋতাবরীরিব সংক্রোশমানাঃ ।
এতা বি পৃচ্ছ কিমিদং ভনন্তি কমাপো অদ্রিং পরিধিং রুজন্তি ॥৬॥

কিমু ষ্বিদস্মৈ নিবিদো ভনন্তেন্দ্রস্যাবদ্যং দিধিষন্ত আপঃ ।
মমৈতান্ পুত্রো মহতা বধেন বৃত্রং জঘন্বাঁ অসৃজদ্ বি সিন্ধূন্ ॥৭॥

মমচ্চন ত্বা যুবতিঃ পরাস মমচ্চন ত্বা কুষবা জগার ।
মমচ্চিদাপঃ শিশবে মমৃড্যুর্মমচ্চিদিন্দ্রঃ সহসোদতিষ্ঠৎ ॥৮॥

মমচ্চন তে মঘবন্ ব্যংসো নিবিবিধ্বাঁ অপ হনূ জঘান ।
অধা নিবিদ্ধ উত্তরো বভূবাঞ্ছিরো দাসস্য সং পিণগ্বধেন ॥৯॥

গৃষ্টিঃ সসূব স্থবিরং তবাগামনাধৃষ্যং বৃষভং তুম্রমিন্দ্রম্ ।
অরীলহং বত্সং চরথায় মাতা স্বয়ং গাতুং তন্ব ইচ্ছমানম্ ॥১০॥

উত মাতা মহিষমন্ববেনদমী ত্বা জহতি পুত্র দেবাঃ ।
অথাব্রবীদ্ বৃত্রমিন্দ্রো হনিষ্যন্ ত্সখে বিষ্ণো বিতরং বি ক্রমস্ব ॥১১॥

কস্তে মাতরং বিধবামচক্রচ্ছয়ুং কস্ত্বামজিঘাংসচ্চরন্তম্ ।
কস্তে দেবো অধি মার্ডীক আসীদ্ যৎ প্রাক্ষিণাঃ পিতরং পাদগৃহ্য ॥১২॥

অবর্ত্যা শুন আন্ত্রাণি পেচে ন দেবেষু বিবিদে মর্ডিতারম্ ।
অপশ্যং জায়ামমহীয়মানামধা মে শ্যেনো মধ্বা জভার ॥১৩॥