সূক্ত 17

17.1

২১ বামদেবো গৌতমঃ। ইন্দ্রঃ। ত্রিষ্টুপ্, ১৫ একপদা বিরাট্।

ত্বং মহাঁ ইন্দ্র তুভ্যং হ ক্ষা অনু ক্ষত্রং মংহনা মন্যত দ্যৌঃ ।
ত্বং বৃত্রং শবসা জঘন্বান্ ত্সৃজঃ সিন্ধূঁরহিনা জগ্রসানান্ ॥১॥

তব ত্বিষো জনিমন্ রেজত দ্যৌ রেজদ্ ভূমির্ভিয়সা স্বস্য মন্যোঃ ।
ঋঘায়ন্ত সুভ্ব১ঃ পর্বতাস আর্দন্ ধন্বানি সরয়ন্ত আপঃ ॥২॥

ভিনদ্ গিরিং শবসা বজ্রমিষ্ণন্নাবিষ্কৃণ্বানঃ সহসান ওজঃ ।
বধীদ্ বৃত্রং বজ্রেণ মন্দসানঃ সরন্নাপো জবসা হতবৃষ্ণীঃ ॥৩॥

সুবীরস্তে জনিতা মন্যত দ্যৌরিন্দ্রস্য কর্তা স্বপস্তমো ভূৎ ।
য ঈং জজান স্বর্যং সুবজ্রমনপচ্যুতং সদসো ন ভূম ॥৪॥

য এক ইচ্চ্যাবয়তি প্র ভূমা রাজা কৃষ্টীনাং পুরুহূত ইন্দ্রঃ ।
সত্যমেনমনু বিশ্বে মদন্তি রাতিং দেবস্য গৃণতো মঘোনঃ ॥৫॥

সত্রা সোমা অভবন্নস্য বিশ্বে সত্রা মদাসো বৃহতো মদিষ্ঠাঃ ।
সত্রাভবো বসুপতির্বসূনাং দত্রে বিশ্বা অধিথা ইন্দ্র কৃষ্টীঃ ॥৬॥

ত্বমধ প্রথমং জায়মানোঽমে বিশ্বা অধিথা ইন্দ্র কৃষ্টীঃ ।
ত্বং প্রতি প্রবত আশয়ানমহিং বজ্রেণ মঘবন্ বি বৃশ্চঃ ॥৭॥

সত্রাহণং দাধৃষিং তুম্রমিন্দ্রং মহামপারং বৃষভং সুবজ্রম্ ।
হন্তা যো বৃত্রং সনিতোত বাজং দাতা মঘানি মঘবা সুরাধাঃ ॥৮॥

অয়ং বৃতশ্চাতয়তে সমীচীর্য আজিষু মঘবা শৃণ্ব একঃ ।
অয়ং বাজং ভরতি যং সনোত্যস্য প্রিয়াসঃ সখ্যে স্যাম ॥৯॥

অয়ং শৃণ্বে অধ জয়ন্নুত ঘ্নন্নয়মুত প্র কৃণুতে যুধা গাঃ ।
যদা সত্যং কৃণুতে মন্যুমিন্দ্রো বিশ্বং দৃলহং ভয়ত এজদস্মাৎ ॥১০॥

সমিন্দ্রো গা অজয়ৎ সং হিরণ্যা সমশ্বিয়া মঘবা যো হ পূর্বীঃ ।
এভির্নৃভির্নৃতমো অস্য শাকৈ রায়ো বিভক্তা সম্ভরশ্চ বস্বঃ ॥১১॥

কিয়ৎ স্বিদিন্দ্রো অধ্যেতি মাতুঃ কিয়ৎ পিতুর্জনিতুর্যো জজান ।
যো অস্য শুষ্মং মুহুকৈরিয়র্তি বাতো ন জূতঃ স্তনয়দ্ভিরভ্রৈঃ ॥১২॥

ক্ষিয়ন্তং ত্বমক্ষিয়ন্তং কৃণোতীয়র্তি রেণুং মঘবা সমোহম্ ।
বিভঞ্জনুরশনিমাঁ ইব দ্যৌরুত স্তোতারং মঘবা বসৌ ধাৎ ॥১৩॥

অয়ং চক্রমিষণৎ সূর্যস্য ন্যেতশং রীরমৎ সসৃমাণম্ ।
আ কৃষ্ণ ঈং জুহুরাণো জিঘর্তি ত্বচো বুধ্নে রজসো অস্য যোনৌ ॥১৪॥

অসিক্ন্যাং যজমানো ন হোতা ॥১৫॥

গব্যন্ত ইন্দ্রং সখ্যায় বিপ্রা অশ্বায়ন্তো বৃষণং বাজয়ন্তঃ ।
জনীয়ন্তো জনিদামক্ষিতোতিমা চ্যাবয়ামোঽবতে ন কোশম্ ॥১৬॥

ত্রাতা নো বোধি দদৃশান আপিরভিখ্যাতা মর্ডিতা সোম্যানাম্ ।
সখা পিতা পিতৃতমঃ পিতৄণাং কর্তেমু লোকমুশতে বয়োধাঃ ॥১৭॥

সখীয়তামবিতা বোধি সখা গৃণান ইন্দ্র স্তুবতে বয়ো ধাঃ ।
বয়ং হ্যা তে চকৃমা সবাধ আভিঃ শমীভির্মহয়ন্ত ইন্দ্র ॥১৮॥

স্তুত ইন্দ্রো মঘবা যদ্ধ বৃত্রা ভূরীণ্যেকো অপ্রতীনি হন্তি ।
অস্য প্রিয়ো জরিতা যস্য শর্মন্নকির্দেবা বারয়ন্তে ন মর্তাঃ ॥১৯॥

এবা ন ইন্দ্রো মঘবা বিরপ্শী করৎ সত্যা চর্ষণীধৃদনর্বা ।
ত্বং রাজা জনুষাং ধেহ্যস্মে অধি শ্রবো মাহিনং যজ্জরিত্রে ॥২০॥

নূ ষ্টুত ইন্দ্র নূ গৃণান ইষং জরিত্রে নদ্যো৩ন পীপেঃ ।
অকারি তে হরিবো ব্রহ্ম নব্যং ধিয়া স্যাম রথ্যঃ সদাসাঃ ॥২১॥