Sukta 17

17.1

21 vamadevo gautamah, indrah, trishtup, 15 ekapada virat

त्वं म॒हाँ इ॑न्द्र॒ तुभ्यं॑ ह॒ क्षा अनु॑ क्ष॒त्रं मं॒हना॑ मन्यत॒ द्यौः ।
त्वं वृ॒त्रं शव॑सा जघ॒न्वान् त्सृ॒जः सिन्धूँ॒रहि॑ना जग्रसा॒नान् ॥१॥

Tvam maham indra tubhyam ha ksha anu kshatram manhana manyata dyauh
Tvam vritram shavasa jaghanvan tsrijah sindhunrahina jagrasanan

17.2

तव॑ त्वि॒षो जनि॑मन् रेजत॒ द्यौ रेज॒द् भूमि॑र्भि॒यसा॒ स्वस्य॑ म॒न्योः ।
ऋ॒घा॒यन्त॑ सु॒भ्व१ः पर्व॑तास॒ आर्द॒न् धन्वा॑नि स॒रय॑न्त॒ आप॑ः ॥२॥

Tava tvisho janiman rejata dyau rejad bhumirbhiyasa svasya manyoh
Righayanta subhva1h parvatasa ardan dhanvani sarayanta apah

17.3

भि॒नद् गि॒रिं शव॑सा॒ वज्र॑मि॒ष्णन्ना॑विष्कृण्वा॒नः स॑हसा॒न ओज॑ः ।
वधी॑द् वृ॒त्रं वज्रे॑ण मन्दसा॒नः सर॒न्नापो॒ जव॑सा ह॒तवृ॑ष्णीः ॥३॥

Bhinad girim shavasa vajramishnannavishkrinvanah sahasana ojah
Vadhid vritram vajrena mandasanah sarannapo javasa hatavrishnih

17.4

सु॒वीर॑स्ते जनि॒ता म॑न्यत॒ द्यौरिन्द्र॑स्य क॒र्ता स्वप॑स्तमो भूत् ।
य ईं॑ ज॒जान॑ स्व॒र्यं॑ सु॒वज्र॒मन॑पच्युतं॒ सद॑सो॒ न भूम॑ ॥४॥

Suviraste janita manyata dyaurindrasya karta svapastamo bhut
Ya im jajana svaryam suvajramanapachyutam sadaso na bhuma

17.5

य एक॑ इच्च्या॒वय॑ति॒ प्र भूमा॒ राजा॑ कृष्टी॒नां पु॑रुहू॒त इन्द्र॑ः ।
स॒त्यमे॑न॒मनु॒ विश्वे॑ मदन्ति रा॒तिं दे॒वस्य॑ गृण॒तो म॒घोन॑ः ॥५॥

Ya eka ichchyavayati pra bhuma raja krishtinam puruhuta indrah
Satyamenamanu vishve madanti ratim devasya grinato maghonah

17.6

स॒त्रा सोमा॑ अभवन्नस्य॒ विश्वे॑ स॒त्रा मदा॑सो बृह॒तो मदि॑ष्ठाः ।
स॒त्राभ॑वो॒ वसु॑पति॒र्वसू॑नां॒ दत्रे॒ विश्वा॑ अधिथा इन्द्र कृ॒ष्टीः ॥६॥

Satra soma abhavannasya vishve satra madaso brihato madishthah
Satrabhavo vasupatirvasunam datre vishva adhitha indra krishtih

17.7

त्वमध॑ प्रथ॒मं जाय॑मा॒नोऽमे॒ विश्वा॑ अधिथा इन्द्र कृ॒ष्टीः ।
त्वं प्रति॑ प्र॒वत॑ आ॒शया॑न॒महिं॒ वज्रे॑ण मघव॒न् वि वृ॑श्चः ॥७॥

Tvamadha prathamam jayamanome vishva adhitha indra krishtih
Tvam prati pravata ashayanamahim vajrena maghavan vi vrishchah

17.8

स॒त्रा॒हणं॒ दाधृ॑षिं॒ तुम्र॒मिन्द्रं॑ म॒हाम॑पा॒रं वृ॑ष॒भं सु॒वज्र॑म् ।
हन्ता॒ यो वृ॒त्रं सनि॑तो॒त वाजं॒ दाता॑ म॒घानि॑ म॒घवा॑ सु॒राधा॑ः ॥८॥

Satrahanam dadhrishim tumramindram mahamaparam vrishabham suvajram
Hanta yo vritram sanitota vajam data maghani maghava suradhah

17.9

अ॒यं वृत॑श्चातयते समी॒चीर्य आ॒जिषु॑ म॒घवा॑ शृ॒ण्व एक॑ः ।
अ॒यं वाजं॑ भरति॒ यं स॒नोत्य॒स्य प्रि॒यास॑ः स॒ख्ये स्या॑म ॥९॥

Ayam vritashchatayate samichirya ajishu maghava shrinva ekah
Ayam vajam bharati yam sanotyasya priyasah sakhye syama

17.10

अ॒यं शृ॑ण्वे॒ अध॒ जय॑न्नु॒त घ्नन्न॒यमु॒त प्र कृ॑णुते यु॒धा गाः ।
य॒दा स॒त्यं कृ॑णु॒ते म॒न्युमिन्द्रो॒ विश्वं॑ दृ॒ळहं भ॑यत॒ एज॑दस्मात् ॥१०॥

Ayam shrinve adha jayannuta ghnannayamuta pra krinute yudha gah
Yada satyam krinute manyumindro vishvam drilaham bhayata ejadasmat

17.11

समिन्द्रो॒ गा अ॑जय॒त् सं हिर॑ण्या॒ सम॑श्वि॒या म॒घवा॒ यो ह॑ पू॒र्वीः ।
ए॒भिर्नृभि॒र्नृत॑मो अस्य शा॒कै रा॒यो वि॑भ॒क्ता स॑म्भ॒रश्च॒ वस्व॑ः ॥११॥

Samindro ga ajayat sam hiranya samashviya maghava yo ha purvih
Ebhirnribhirnritamo asya shakai rayo vibhakta sambharashcha vasvah

17.12

किय॑त् स्वि॒दिन्द्रो॒ अध्ये॑ति मा॒तुः किय॑त् पि॒तुर्ज॑नि॒तुर्यो ज॒जान॑ ।
यो अ॑स्य॒ शुष्मं॑ मुहु॒कैरिय॑र्ति॒ वातो॒ न जू॒तः स्त॒नय॑द्भिर॒भ्रैः ॥१२॥

Kiyat svidindro adhyeti matuh kiyat piturjanituryo jajana
Yo asya shushmam muhukairiyarti vato na jutah stanayadbhirabhraih

17.13

क्षि॒यन्तं॑ त्व॒मक्षि॑यन्तं कृणो॒तीय॑र्ति रे॒णुं म॒घवा॑ स॒मोह॑म् ।
वि॒भ॒ञ्ज॒नुर॒शनि॑माँ इव॒ द्यौरु॒त स्तो॒तारं॑ म॒घवा॒ वसौ॑ धात् ॥१३॥

Kshiyantam tvamakshiyantam krinotiyarti renum maghava samoham
Vibhanjanurashanimam iva dyauruta stotaram maghava vasau dhat

17.14

अ॒यं च॒क्रमि॑षण॒त् सूर्य॑स्य॒ न्येत॑शं रीरमत् ससृमा॒णम् ।
आ कृ॒ष्ण ईं॑ जुहुरा॒णो जि॑घर्ति त्व॒चो बु॒ध्ने रज॑सो अ॒स्य योनौ॑ ॥१४॥

Ayam chakramishanat suryasya nyetasham riramat sasrimanam
A krishna im juhurano jigharti tvacho budhne rajaso asya yonau

17.15

असि॑क्न्यां॒ यज॑मानो॒ न होता॑ ॥१५॥

Asiknyam yajamano na hota

17.16

ग॒व्यन्त॒ इन्द्रं॑ स॒ख्याय॒ विप्रा॑ अश्वा॒यन्तो॒ वृष॑णं वा॒जय॑न्तः ।
ज॒नी॒यन्तो॑ जनि॒दामक्षि॑तोति॒मा च्या॑वयामोऽव॒ते न कोश॑म् ॥१६॥

Gavyanta indram sakhyaya vipra ashvayanto vrishanam vajayantah
Janiyanto janidamakshitotima chyavayamovate na kosham

17.17

त्रा॒ता नो॑ बोधि॒ ददृ॑शान आ॒पिर॑भिख्या॒ता म॑र्डि॒ता सो॒म्याना॑म् ।
सखा॑ पि॒ता पि॒तृत॑मः पितॄ॒णां कर्ते॑मु लो॒कमु॑श॒ते व॑यो॒धाः ॥१७॥

Trata no bodhi dadrishana apirabhikhyata mardita somyanam
Sakha pita pitritamah pitrinam kartemu lokamushate vayodhah

17.18

स॒खी॒य॒ताम॑वि॒ता बो॑धि॒ सखा॑ गृणा॒न इ॑न्द्र स्तुव॒ते वयो॑ धाः ।
व॒यं ह्या ते॑ चकृ॒मा स॒बाध॑ आ॒भिः शमी॑भिर्म॒हय॑न्त इन्द्र ॥१८॥

Sakhiyatamavita bodhi sakha grinana indra stuvate vayo dhah
Vayam hya te chakrima sabadha abhih shamibhirmahayanta indra

17.19

स्तु॒त इन्द्रो॑ म॒घवा॒ यद्ध॑ वृ॒त्रा भूरी॒ण्येको॑ अप्र॒तीनि॑ हन्ति ।
अ॒स्य प्रि॒यो ज॑रि॒ता यस्य॒ शर्म॒न्नकि॑र्दे॒वा वा॒रय॑न्ते॒ न मर्ता॑ः ॥१९॥

Stuta indro maghava yaddha vritra bhurinyeko apratini hanti
Asya priyo jarita yasya sharmannakirdeva varayante na martah

17.20

ए॒वा न॒ इन्द्रो॑ म॒घवा॑ विर॒प्शी कर॑त् स॒त्या च॑र्षणी॒धृद॑न॒र्वा ।
त्वं राजा॑ ज॒नुषां॑ धेह्य॒स्मे अधि॒ श्रवो॒ माहि॑नं॒ यज्ज॑रि॒त्रे ॥२०॥

Eva na indro maghava virapshi karat satya charshanidhridanarva
Tvam raja janusham dhehyasme adhi shravo mahinam yajjaritre

17.21

नू ष्टु॒त इ॑न्द्र॒ नू गृ॑णा॒न इषं॑ जरि॒त्रे न॒द्यो॒३न पी॑पेः ।
अका॑रि ते हरिवो॒ ब्रह्म॒ नव्यं॑ धि॒या स्या॑म र॒थ्य॑ः सदा॒साः ॥२१॥

Nu shtuta indra nu grinana isham jaritre nadyo3na pipeh
Akari te harivo brahma navyam dhiya syama rathyah sadasah