Sukta 18

18.1

13 vamadevo gautamah, 1 indrah, 4 (uttarardharchasya), 7 aditih, 1 vamadevah, 2-4 (purvardharchasya), 8-13 indrah, (uttarardharchasya), 7 vamadevah, trishtup

अ॒यं पन्था॒ अनु॑वित्तः पुरा॒णो यतो॑ दे॒वा उ॒दजा॑यन्त॒ विश्वे॑ ।
अत॑श्चि॒दा ज॑निषीष्ट॒ प्रवृ॑द्धो॒ मा मा॒तर॑ममु॒या पत्त॑वे कः ॥१॥

Ayam pantha anuvittah purano yato deva udajayanta vishve
Atashchida janishishta pravriddho ma mataramamuya pattave kah

18.2

नाहमतो॒ निर॑या दु॒र्गहै॒तत् ति॑र॒श्चता॑ पा॒र्श्वान्निर्ग॑माणि ।
ब॒हूनि॑ मे॒ अकृ॑ता॒ कर्त्वा॑नि॒ युध्यै॑ त्वेन॒ सं त्वे॑न पृच्छै ॥२॥

Nahamato niraya durgahaitat tirashchata parshvannirgamani
Bahuni me akrita kartvani yudhyai tvena sam tvena prichchhai

18.3

प॒रा॒य॒तीं मा॒तर॒मन्व॑चष्ट॒ न नानु॑ गा॒न्यनु॒ नू ग॑मानि ।
त्वष्टु॑र्गृ॒हे अ॑पिब॒त् सोम॒मिन्द्र॑ः शतध॒न्यं॑ च॒म्वो॑ः सु॒तस्य॑ ॥३॥

Parayatim mataramanvachashta na nanu ganyanu nu gamani
Tvashturgrihe apibat somamindrah shatadhanyam chamvoh sutasya

18.4

किं स ऋध॑क् कृणव॒द् यं स॒हस्रं॑ मा॒सो ज॒भार॑ श॒रद॑श्च पू॒र्वीः ।
न॒ही न्व॑स्य प्रति॒मान॒मस्त्य॒न्तर्जा॒तेषू॒त ये जनि॑त्वाः ॥४॥

Kim sa ridhak krinavad yam sahasram maso jabhara sharadashcha purvih
Nahi nvasya pratimanamastyantarjateshuta ye janitvah

18.5

अ॒व॒द्यमि॑व॒ मन्य॑माना॒ गुहा॑क॒रिन्द्रं॑ मा॒ता वी॒र्ये॑णा॒ न्यृ॑ष्टम् ।
अथोद॑स्थात् स्व॒यमत्कं॒ वसा॑न॒ आ रोद॑सी अपृणा॒ज्जाय॑मानः ॥५॥

Avadyamiva manyamana guhakarindram mata viryena nyrishtam
Athodasthat svayamatkam vasana a rodasi aprinajjayamanah

18.6

ए॒ता अ॑र्षन्त्यलला॒भव॑न्तीर्ऋताव॑रीरिव सं॒क्रोश॑मानाः ।
ए॒ता वि पृ॑च्छ॒ किमि॒दं भ॑नन्ति॒ कमापो॒ अद्रिं॑ परि॒धिं रु॑जन्ति ॥६॥

Eta arshantyalalabhavantirritavaririva sankroshamanah
Eta vi prichchha kimidam bhananti kamapo adrim paridhim rujanti

18.7

किमु॑ ष्विदस्मै नि॒विदो॑ भन॒न्तेन्द्र॑स्याव॒द्यं दि॑धिषन्त॒ आप॑ः ।
ममै॒तान् पु॒त्रो म॑ह॒ता व॒धेन॑ वृ॒त्रं ज॑घ॒न्वाँ अ॑सृज॒द् वि सिन्धू॑न् ॥७॥

Kimu shvidasmai nivido bhanantendrasyavadyam didhishanta apah
Mamaitan putro mahata vadhena vritram jaghanvam asrijad vi sindhun

18.8

मम॑च्च॒न त्वा॑ युव॒तिः प॒रास॒ मम॑च्च॒न त्वा॑ कु॒षवा॑ ज॒गार॑ ।
मम॑च्चि॒दाप॒ः शिश॑वे ममृड्यु॒र्मम॑च्चि॒दिन्द्र॒ः सह॒सोद॑तिष्ठत् ॥८॥

Mamachchana tva yuvatih parasa mamachchana tva kushava jagara
Mamachchidapah shishave mamridyurmamachchidindrah sahasodatishthat

18.9

मम॑च्च॒न ते॑ मघव॒न् व्यं॑सो निविवि॒ध्वाँ अप॒ हनू॑ ज॒घान॑ ।
अधा॒ निवि॑द्ध॒ उत्त॑रो बभू॒वाञ्छिरो॑ दा॒सस्य॒ सं पि॑णग्व॒धेन॑ ॥९॥

Mamachchana te maghavan vyanso nivividhvam apa hanu jaghana
Adha nividdha uttaro babhuvanchhiro dasasya sam pinagvadhena

18.10

गृ॒ष्टिः स॑सूव॒ स्थवि॑रं तवा॒गाम॑नाधृ॒ष्यं वृ॑ष॒भं तुम्र॒मिन्द्र॑म् ।
अरी॑ळहं व॒त्सं च॒रथा॑य मा॒ता स्व॒यं गा॒तुं त॒न्व॑ इ॒च्छमा॑नम् ॥१०॥

Grishtih sasuva sthaviram tavagamanadhrishyam vrishabham tumramindram
Arilaham vatsam charathaya mata svayam gatum tanva ichchhamanam

18.11

उ॒त मा॒ता म॑हि॒षमन्व॑वेनद॒मी त्वा॑ जहति पुत्र दे॒वाः ।
अथा॑ब्रवीद् वृ॒त्रमिन्द्रो॑ हनि॒ष्यन् त्सखे॑ विष्णो वित॒रं वि क्र॑मस्व ॥११॥

Uta mata mahishamanvavenadami tva jahati putra devah
Athabravid vritramindro hanishyan tsakhe vishno vitaram vi kramasva

18.12

कस्ते॑ मा॒तरं॑ वि॒धवा॑मचक्रच्छ॒युं कस्त्वाम॑जिघांस॒च्चर॑न्तम् ।
कस्ते॑ दे॒वो अधि॑ मार्डी॒क आ॑सी॒द् यत् प्राक्षि॑णाः पि॒तरं॑ पाद॒गृह्य॑ ॥१२॥

Kaste mataram vidhavamachakrachchhayum kastvamajighansachcharantam
Kaste devo adhi mardika asid yat prakshinah pitaram padagrihya

18.13

अव॑र्त्या॒ शुन॑ आ॒न्त्राणि॑ पेचे॒ न दे॒वेषु॑ विविदे मर्डि॒तार॑म् ।
अप॑श्यं जा॒यामम॑हीयमाना॒मधा॑ मे श्ये॒नो मध्वा ज॑भार ॥१३॥

Avartya shuna antrani peche na deveshu vivide marditaram
Apashyam jayamamahiyamanamadha me shyeno madhva jabhara