Sukta 19

19.1

11 vamadevo gautamah, indrah, trishtup

ए॒वा त्वामि॑न्द्र वज्रि॒न्नत्र॒ विश्वे॑ दे॒वास॑ः सु॒हवा॑स॒ ऊमा॑ः ।
म॒हामु॒भे रोद॑सी वृ॒द्धमृ॒ष्वं निरेक॒मिद् वृ॑णते वृत्र॒हत्ये॑ ॥१॥

Eva tvamindra vajrinnatra vishve devasah suhavasa umah
Mahamubhe rodasi vriddhamrishvam nirekamid vrinate vritrahatye

अवा॑सृजन्त॒ जिव्र॑यो॒ न दे॒वा भुव॑ः स॒म्राळि॑न्द्र स॒त्ययो॑निः ।
अह॒न्नहिं॑ परि॒शया॑न॒मर्ण॒ः प्र व॑र्त॒नीर॑रदो वि॒श्वधे॑नाः ॥२॥

Avasrijanta jivrayo na deva bhuvah samralindra satyayonih
Ahannahim parishayanamarnah pra vartanirarado vishvadhenah

अतृ॑प्णुवन्तं॒ विय॑तमबु॒ध्यमबु॑ध्यमानं सुषुपा॒णमि॑न्द्र ।
स॒प्त प्रति॑ प्र॒वत॑ आ॒शया॑न॒महिं॒ वज्रे॑ण॒ वि रि॑णा अप॒र्वन् ॥३॥

Atripnuvantam viyatamabudhyamabudhyamanam sushupanamindra
Sapta prati pravata ashayanamahim vajrena vi rina aparvan

अक्षो॑दय॒च्छव॑सा॒ क्षाम॑ बु॒ध्नं वार्ण वात॒स्तवि॑षीभि॒रिन्द्र॑ः ।
दृ॒ळहान्यौ॑भ्नादु॒शमा॑न॒ ओजोऽवा॑भिनत् क॒कुभ॒ः पर्व॑तानाम् ॥४॥

Akshodayachchhavasa kshama budhnam varna vatastavishibhirindrah
Drilahanyaubhnadushamana ojovabhinat kakubhah parvatanam

अ॒भि प्र द॑द्रु॒र्जन॑यो॒ न गर्भं॒ रथा॑ इव॒ प्र य॑युः सा॒कमद्र॑यः ।
अत॑र्पयो वि॒सृत॑ उ॒ब्ज ऊ॒र्मीन् त्वं वृ॒ताँ अ॑रिणा इन्द्र॒ सिन्धू॑न् ॥५॥

Abhi pra dadrurjanayo na garbham ratha iva pra yayuh sakamadrayah
Atarpayo visrita ubja urmin tvam vritam arina indra sindhun

त्वं म॒हीम॒वनिं॑ वि॒श्वधे॑नां तु॒र्वीत॑ये व॒य्या॑य॒ क्षर॑न्तीम् ।
अर॑मयो॒ नम॒सैज॒दर्ण॑ः सुतर॒णाँ अ॑कृणोरिन्द्र॒ सिन्धू॑न् ॥६॥

Tvam mahimavanim vishvadhenam turvitaye vayyaya ksharantim
Aramayo namasaijadarnah sutaranam akrinorindra sindhun

प्राग्रुवो॑ नभ॒न्वो॒३ न वक्वा॑ ध्व॒स्रा अ॑पिन्वद् युव॒तीर्ऋ॑त॒ज्ञाः ।
धन्वा॒न्यज्राँ॑ अपृणक् तृषा॒णाँ अधो॒गिन्द्र॑ः स्त॒र्यो॒३ दंसु॑पत्नीः ॥७॥

Pragruvo nabhanvo3 na vakva dhvasra apinvad yuvatirritagyah
Dhanvanyajram aprinak trishanam adhogindrah staryo3 dansupatnih

पू॒र्वीरु॒षस॑ः श॒रद॑श्च गू॒र्ता वृ॒त्रं ज॑घ॒न्वाँ अ॑सृज॒द् वि सिन्धू॑न् ।
परि॑ष्ठिता अतृणद् बद्बधा॒नाः सी॒रा इन्द्र॒ः स्रवि॑तवे पृथि॒व्या ॥८॥

Purvirushasah sharadashcha gurta vritram jaghanvam asrijad vi sindhun
Parishthita atrinad badbadhanah sira indrah sravitave prithivya

व॒म्रीभि॑ः पु॒त्रम॒ग्रुवो॑ अदा॒नं नि॒वेश॑नाद्धरिव॒ आ ज॑भर्थ ।
व्य१न्धो अ॑ख्य॒दहि॑माददा॒नो निर्भू॑दुख॒च्छित्सम॑रन्त॒ पर्व॑ ॥९॥

Vamribhih putramagruvo adanam niveshanaddhariva a jabhartha
Vya1ndho akhyadahimadadano nirbhudukhachchhitsamaranta parva

प्र ते॒ पूर्वा॑णि॒ कर॑णानि विप्राऽऽवि॒द्वाँ आ॑ह वि॒दुषे॒ करां॑सि ।
यथा॑यथा॒ वृष्ण्या॑नि॒ स्वगू॒र्ता ऽपां॑सि राज॒न् नर्यावि॑वेषीः ॥१०॥

Pra te purvani karanani vipravidvam aha vidushe karansi
Yathayatha vrishnyani svagurta pansi rajan naryaviveshih

नू ष्टु॒त इ॑न्द्र॒ नू गृ॑णा॒न इषं॑ जरि॒त्रे न॒द्यो॒३ न पी॑पेः ।
अका॑रि ते हरिवो॒ ब्रह्म॒ नव्यं॑ धि॒या स्या॑म र॒थ्य॑ः सदा॒साः ॥११॥

Nu shtuta indra nu grinana isham jaritre nadyo3 na pipeh
Akari te harivo brahma navyam dhiya syama rathyah sadasah