সূক্ত 16

16.1

২১ বামদেবো গৌতমঃ। ইন্দ্রঃ। ত্রিষ্টুপ্।

আ সত্যো যাতু মঘবাঁ ঋজীষী দ্রবন্ত্বস্য হরয় উপ নঃ ।
তস্মা ইদন্ধঃ সুষুমা সুদক্ষমিহাভিপিত্বং করতে গৃণানঃ ॥১॥

অব স্য শূরাধ্বনো নান্তেঽস্মিন্ নো অদ্য সবনে মন্দধ্যৈ ।
শংসাত্যুক্থমুশনেব বেধাশ্চিকিতুষে অসুর্যায় মন্ম ॥২॥

কবির্ন নিণ্যং বিদথানি সাধন্বৃ বৃষা যৎ সেকং বিপিপানো অর্চাৎ ।
দিব ইত্থা জীজনৎ সপ্ত কারূনহ্না চিচ্চক্রুর্বয়ুনা গৃণন্তঃ ॥৩॥

স্ব১র্যদ্ বেদি সুদৃশীকমর্কৈর্মহি জ্যোতী রুরুচুর্যদ্ধ বস্তোঃ ।
অন্ধা তমাংসি দুধিতা বিচক্ষে নৃভ্যশ্চকার নৃতমো অভিষ্টৌ ॥৪॥

ববক্ষ ইন্দ্রো অমিতমৃজীষ্যু১ভে আ পপ্রৌ রোদসী মহিত্বা ।
অতশ্চিদস্য মহিমা বি রেচ্যভি যো বিশ্বা ভুবনা বভূব ॥৫॥

বিশ্বানি শক্রো নর্যাণি বিদ্বানপো রিরেচ সখিভির্নিকামৈঃ ।
অশ্মানং চিদ্ যে বিভিদুর্বচোভির্ব্রজং গোমন্তমুশিজো বি বব্রুঃ ॥৬॥

অপো বৃত্রং বব্রিবাংসং পরাহন্ প্রাবৎ তে বজ্রং পৃথিবী সচেতাঃ ।
প্রার্ণাংসি সমুদ্রিয়াণ্যৈনোঃ পতির্ভবঞ্ছবসা শূর ধৃষ্ণো ॥৭॥

অপো যদদ্রিং পুরুহূত দর্দরাবির্ভুবত্সরমা পূর্ব্যং তে ।
স নো নেতা বাজমা দর্ষি ভূরিং গোত্রা রুজন্নঙ্গিরোভির্গৃণানঃ ॥৮॥

অচ্ছা কবিং নৃমণো গা অভিষ্টৌ স্বর্ষাতা মঘবন্নাধমানম্ ।
ঊতিভিস্তমিষণো দ্যুম্নহূতৌ নি মায়াবানব্রহ্মা দস্যুরর্ত ॥৯॥

আ দস্যুঘ্না মনসা যাহ্যস্তং ভুবৎ তে কুত্সঃ সখ্যে নিকামঃ ।
স্বে যোনৌ নি ষদতং সরূপা বি বাং চিকিত্সদৃতচিদ্ধ নারী ॥১০॥

যাসি কুত্সেন সরথমবস্যুস্তোদো বাতস্য হর্যোরীশানঃ ।
ঋজ্রা বাজং ন গধ্যং যুয়ূষন্ কবির্যদহন্ পার্যায় ভূষাৎ ॥১১॥

কুত্সায় শুষ্ণমশুষং নি বর্হীঃ প্রপিত্বে অহ্নঃ কুয়বং সহস্রা ।
সদ্যো দস্যূন্ প্র মৃণ কুত্স্যেন প্র সূরশ্চক্রং বৃহতাদভীকে ॥১২॥

ত্বং পিপ্রুং মৃগয়ং শূশুবাংসমৃজিশ্বনে বৈদথিনায় রন্ধীঃ ।
পঞ্চাশৎ কৃষ্ণা নি বপঃ সহস্রা ঽত্কং ন পুরো জরিমা বি দর্দঃ ॥১৩॥

সূর উপাকে তন্বং১ দধানো বি যত্তে চেত্যমৃতস্য বর্পঃ ।
মৃগো ন হস্তী তবিষীমুষাণঃ সিংহো ন ভীম আয়ুধানি বিভ্রৎ ॥১৪॥

ইন্দ্রং কামা বসূয়ন্তো অগ্মন্ ত্স্বর্মীলহে ন সবনে চকানাঃ ।
শ্রবস্যবঃ শশমানাস উক্থৈরোকো ন রণ্বা সুদৃশীব পুষ্টিঃ ॥১৫॥

তমিদ্ব ইন্দ্রং সুহবং হুবেম যস্তা চকার নর্যা পুরূণি ।
যো মাবতে জরিত্রে গধ্যং চিন্মক্ষূ বাজং ভরতি স্পার্হরাধাঃ ॥১৬॥

তিগ্মা যদন্তরশনিঃ পতাতি কস্মিঞ্চিচ্ছূর মুহুকে জনানাম্ ।
ঘোরা যদর্য সমৃতির্ভবাত্যধ স্মা নস্তন্বো বোধি গোপাঃ ॥১৭॥

ভুবোঽবিতা বামদেবস্য ধীনাং ভুবঃ সখাবৃকো বাজসাতৌ ।
ত্বামনু প্রমতিমা জগন্মোরুশংসো জরিত্রে বিশ্বধ স্যাঃ ॥১৮॥

এভির্নৃভিরিন্দ্র ত্বায়ুভিষ্ট্বা মঘবদ্ভির্মঘবন্ বিশ্ব আজৌ ।
দ্যাবো ন দ্যুম্নৈরভি সন্তো অর্যঃ ক্ষপো মদেম শরদশ্চ পূর্বীঃ ॥১৯॥

এবেদিন্দ্রায় বৃষভায় বৃষ্ণে ব্রহ্মাকর্ম ভৃগবো ন রথম্ ।
নূ চিদ্ যথা নঃ সখ্যা বিয়োষদসন্ন উগ্রোঽবিতা তনূপাঃ ॥২০॥

নূ ষ্টুত ইন্দ্র নূ গৃণান ইষং জরিত্রে নদ্যো৩ ন পীপেঃ ।
অকারি তে হরিবো ব্রহ্ম নব্যং ধিয়া স্যাম রথ্যঃ সদাসাঃ ॥২১॥