সূক্ত 2

2.1

২০ বামদেবো গৌতমঃ। অগ্নিঃ। ত্রিষ্টুপ্।

যো মর্ত্যেষ্বমৃত ঋতাবা দেবো দেবেষ্বরতির্নিধায়ি ।
হোতা যজিষ্ঠো মহ্না শুচধ্যৈ হব্যৈরগ্নির্মনুষ ঈরয়ধ্যৈ ॥১॥

ইহ ত্বং সূনো সহসো নো অদ্য জাতো জাতাঁ উভয়াঁ অন্তরগ্নে ।
দূত ঈয়সে যুয়ুজান ঋষ্ব ঋজুমুষ্কান্ বৃষণঃ শুক্রাঁশ্চ ॥২॥

অত্যা বৃধস্নূ রোহিতা ঘৃতস্নূ ঋতস্য মন্যে মনসা জবিষ্ঠা ।
অন্তরীয়সে অরুষা যুজানো যুষ্মাঁশ্চ দেবান্ বিশ আ চ মর্তান্ ॥৩॥

অর্যমণং বরুণং মিত্রমেষামিন্দ্রাবিষ্ণূ মরুতো অশ্বিনোত ।
স্বশ্বো অগ্নে সুরথঃ সুরাধা এদু বহ সুহবিষে জনায় ॥৪॥

গোমাঁ অগ্নেঽবিমাঁ অশ্বী যজ্ঞো নৃবত্সখা সদমিদপ্রমৃষ্যঃ ।
ইলাবাঁ এষো অসুর প্রজাবান্দীর্ঘো রয়িঃ পৃথুবুধ্নঃ সভাবান্ ॥৫॥

যস্ত ইধ্মং জভরৎ সিষ্বিদানো মূর্ধানং বা ততপতে ত্বায়া ।
ভুবস্তস্য স্বতবাঁঃ পায়ুরগ্নে বিশ্বস্মাত্সী সীমঘায়ত উরুষ্য ॥৬॥

যস্তে ভরাদন্নিয়তে চিদন্নং নিশিষন্মন্দ্রমতিথিমুদীরৎ ।
আ দেবয়ুরিনধতে দুরোণে তস্মিন্ রয়ির্ধ্রুবো অস্তু দাস্বান্ ॥৭॥

যস্ত্বা দোষা য উষসি প্রশংসাৎ প্রিয়ং বা ত্বা কৃণবতে হবিষ্মান্ ।
অশ্বো ন স্বে দম আ হেম্যাবান্ তমংহসঃ পীপরো দাশ্বাংসম্ ॥৮॥

যস্তুভ্যমগ্নে অমৃতায় দাশদ্ দুবস্ত্বে কৃণবতে যতস্রুক্ ।
ন স রায়া শশমানো বি যোষন্নৈনমংহঃ পরি বরদঘায়োঃ ॥৯॥

যস্য ত্বমগ্নে অধ্বরং জুজোষো দেবো মর্তস্য সুধিতং ররাণঃ ।
প্রীতেদসদ্ধোত্রা সা যবিষ্ঠাঽসাম যস্য বিধতো বৃধাসঃ ॥১০॥

চিত্তিমচিত্তিং চিনবদ্ বি বিদ্বান্ পৃষ্ঠেব বীতা বৃজিনা চ মর্তান্ ।
রায়ে চ নঃ স্বপত্যায় দেব দিতিং চ রাস্বাদিতিমুরুষ্য ॥১১॥

কবিং শশাসুঃ কবয়োঽদব্ধা নিধারয়ন্তো দুর্যাস্বায়োঃ ।
অতস্ত্বং দৃশ্যাঁ অগ্ন এতান্ পড্ভিঃ পশ্যেরদ্ভুতাঁ অর্য এবৈঃ ॥১২॥

ত্বমগ্নে বাঘতে সুপ্রণীতিঃ সুতসোমায় বিধতে যবিষ্ঠ ।
রত্নং ভর শশমানায় ঘৃষ্বে পৃথু শ্চন্দ্রমবসে চর্ষণিপ্রাঃ ॥১৩॥

অধা হ যদ্ বয়মগ্নে ত্বায়া পড্ভির্হস্তেভিশ্চকৃমা তনূভিঃ ।
রথং ন ক্রন্তো অপসা ভুরিজোর্ঋতং যেমুঃ সুধ্য আশুষাণাঃ ॥১৪॥

অধা মাতুরুষসঃ সপ্ত বিপ্রা জায়েমহি প্রথমা বেধসো নৄন্ ।
দিবস্পুত্রা অঙ্গিরসো ভবেমাদ্রিং রুজেম ধনিনং শুচন্তঃ ॥১৫॥

অধা যথা নঃ পিতরঃ পরাসঃ প্রত্নাসো অগ্ন ঋতমাশুষাণাঃ ।
শুচীদয়ন্ দীধিতিমুক্থশাসঃ ক্ষামা ভিন্দন্তো অরুণীরপ ব্রন্ ॥১৬॥

সুকর্মাণঃ সুরুচো দেবয়ন্তোঽয়ো ন দেবা জনিমা ধমন্তঃ ।
শুচন্তো অগ্নিং ববৃধন্ত ইন্দ্রমূর্বং গব্যং পরিষদন্তো অগ্মন্ ॥১৭॥

আ যূথেব ক্ষুমতি পশ্বো অখ্যদ্ দেবানাং যজ্জনিমান্ত্যুগ্র ।
মর্তানাং চিদুর্বশীরকৃপ্রন্ বৃধে চিদর্য উপরস্যায়োঃ ॥১৮॥

অকর্ম তে স্বপসো অভূম ঋতমবস্রন্নুষসো বিভাতীঃ ।
অনূনমগ্নিং পুরুধা সুশ্চন্দ্রং দেবস্য মর্মৃজতশ্চারু চক্ষুঃ ॥১৯॥

এতা তে অগ্ন উচথানি বেধোঽবোচাম কবয়ে তা জুষস্ব ।
উচ্ছোচস্ব কৃণুহি বস্যসো নো মহো রায়ঃ পুরুবার প্র যন্ধি ॥২০॥