সূক্ত 3

3.1

১৬ বামদেবো গৌতমঃ। অগ্নিঃ, ১ রুদ্রঃ। ত্রিষ্টুপ্।

আ বো রাজানমধ্বরস্য রুদ্রং হোতারং সত্যয়জং রোদস্যোঃ ।
অগ্নিং পুরা তনয়িত্নোরচিত্তাদ্ধিরণ্যরূপমবসে কৃণুধ্বম্ ॥১॥

3.2

অয়ং যোনিশ্চকৃমা যং বয়ং তে জায়েব পত্য উশতী সুবাসাঃ ।
অর্বাচীনঃ পরিবীতো নি ষীদেমা উ তে স্বপাক প্রতীচীঃ ॥২॥

3.3

আশৃণ্বতে অদৃপিতায় মন্ম নৃচক্ষসে সুমৃলীকায় বেধঃ ।
দেবায় শস্তিমমৃতায় শংস গ্রাবেব সোতা মধুষুদ্ যমীলে ॥৩॥

3.4

ত্বং চিন্নঃ শম্যা অগ্নে অস্যা ঋতস্য বোধ্যৃতচিৎ স্বাধীঃ ।
কদা ত উক্থা সধমাদ্যানি কদা ভবন্তি সখ্যা গৃহে তে ॥৪॥

3.5

কথা হ তদ্ বরুণায় ত্বমগ্নে কথা দিবে গর্হসে কন্ন আগঃ ।
কথা মিত্রায় মীলহুষে পৃথিব্যৈ ব্রবঃ কদর্যম্ণে কদ্ ভগায় ॥৫॥

3.6

কদ্ধিষ্ণ্যাসু বৃধসানো অগ্নে কদ্ বাতায় প্রতবসে শুভংয়ে ।
পরিজ্মনে নাসত্যায় ক্ষে ব্রবঃ কদগ্নে রুদ্রায় নৃঘ্নে ॥৬॥

3.7

কথা মহে পুষ্টিম্ভরায় পূষ্ণে কদ্রুদ্রায় সুমখায় হবির্দে ।
কদ্ বিষ্ণব উরুগায়ায় রেতো ব্রবঃ কদগ্নে শরবে বৃহত্যৈ ॥৭॥

3.8

কথা শর্ধায় মরুতামৃতায় কথা সূরে বৃহতে পৃচ্ছ্যমানঃ ।
প্রতি ব্রবোঽদিতয়ে তুরায় সাধা দিবো জাতবেদশ্চিকিত্বান্ ॥৮॥

3.9

ঋতেন ঋতং নিয়তমীল আ গোরামা সচা মধুমৎ পক্বমগ্নে ।
কৃষ্ণা সতী রুশতা ধাসিনৈষা জামর্যেণ পয়সা পীপায় ॥৯॥

3.10

ঋতেন হি ষ্মা বৃষভশ্চিদক্তঃ পুমাঁ অগ্নিঃ পয়সা পৃষ্ঠ্যেন ।
অস্পন্দমানো অচরদ্ বয়োধা বৃষা শুক্রং দুদুহে পৃশ্নিরূধঃ ॥১০॥

3.11

ঋতেনাদ্রিং ব্যসন্ ভিদন্তঃ সমঙ্গিরসো নবন্ত গোভিঃ ।
শুনং নরঃ পরি ষদন্নুষাসমাবিঃ স্বরভবজ্জাতে অগ্নৌ ॥১১॥

3.12

ঋতেন দেবীরমৃতা অমৃক্তা অর্ণোভিরাপো মধুমদ্ভিরগ্নে ।
বাজী ন সর্গেষু প্রস্তুভানঃ প্র সদমিৎ স্রবিতবে দধন্যুঃ ॥১২॥

3.13

মা কস্য যক্ষং সদমিদ্ধুরো গা মা বেশস্য প্রমিনতো মাপেঃ ।
মা ভ্রাতুরগ্নে অনৃজোর্ঋণং বের্মা সখ্যুর্দক্ষং রিপোর্ভুজেম ॥১৩॥

3.14

রক্ষা ণো অগ্নে তব রক্ষণেভী রারক্ষাণঃ সুমখ প্রীণানঃ ।
প্রতি ষ্ফুর বি রুজ বীড্বংহো জহি রক্ষো মহি চিদ্ বাবৃধানম্ ॥১৪॥

3.15

এভির্ভব সুমনা অগ্নে অর্কৈরিমান্ ত্স্পৃশ মন্মভিঃ শূর বাজান্ ।
উত ব্রহ্মাণ্যঙ্গিরো জুষস্ব সং তে শস্তির্দেববাতা জরেত ॥১৫॥

3.16

এতা বিশ্বা বিদুষে তুভ্যং বেধো নীথান্যগ্নে নিণ্যা বচাংসি ।
নিবচনা কবয়ে কাব্যান্যশংসিষং মতিভির্বিপ্র উক্থৈঃ ॥১৬॥