Sukta 3

3.1

16 vamadevo gautamah, agnih, 1 rudrah, trishtup

आ वो॒ राजा॑नमध्व॒रस्य॑ रु॒द्रं होता॑रं सत्य॒यजं॒ रोद॑स्योः ।
अ॒ग्निं पु॒रा त॑नयि॒त्नोर॒चित्ता॒द्धिर॑ण्यरूप॒मव॑से कृणुध्वम् ॥१॥

A vo rajanamadhvarasya rudram hotaram satyayajam rodasyoh
Agnim pura tanayitnorachittaddhiranyarupamavase krinudhvam

3.2

अ॒यं योनि॑श्चकृ॒मा यं व॒यं ते॑ जा॒येव॒ पत्य॑ उश॒ती सु॒वासा॑ः ।
अ॒र्वा॒ची॒नः परि॑वीतो॒ नि षी॑दे॒मा उ॑ ते स्वपाक प्रती॒चीः ॥२॥

Ayam yonishchakrima yam vayam te jayeva patya ushati suvasah
Arvachinah parivito ni shidema u te svapaka pratichih

3.3

आ॒शृ॒ण्व॒ते अदृ॑पिताय॒ मन्म॑ नृ॒चक्ष॑से सुमृळी॒काय॑ वेधः ।
दे॒वाय॑ श॒स्तिम॒मृता॑य शंस॒ ग्रावे॑व॒ सोता॑ मधु॒षुद् यमी॒ळे ॥३॥

Ashrinvate adripitaya manma nrichakshase sumrilikaya vedhah
Devaya shastimamritaya shansa graveva sota madhushud yamile

3.4

त्वं चि॑न्न॒ः शम्या॑ अग्ने अ॒स्या ऋ॒तस्य॑ बोध्यृतचित् स्वा॒धीः ।
क॒दा त॑ उ॒क्था स॑ध॒माद्या॑नि क॒दा भ॑वन्ति स॒ख्या गृ॒हे ते॑ ॥४॥

Tvam chinnah shamya agne asya ritasya bodhyritachit svadhih
Kada ta uktha sadhamadyani kada bhavanti sakhya grihe te

3.5

क॒था ह॒ तद् वरु॑णाय॒ त्वम॑ग्ने क॒था दि॒वे ग॑र्हसे॒ कन्न॒ आग॑ः ।
क॒था मि॒त्राय॑ मी॒ळहुषे॑ पृथि॒व्यै ब्रव॒ः कद॑र्य॒म्णे कद् भगा॑य ॥५॥

Katha ha tad varunaya tvamagne katha dive garhase kanna agah
Katha mitraya milahushe prithivyai bravah kadaryamne kad bhagaya

3.6

कद्धिष्ण्या॑सु वृधसा॒नो अ॑ग्ने॒ कद् वाता॑य॒ प्रत॑वसे शुभं॒ये ।
परि॑ज्मने॒ नास॑त्याय॒ क्षे ब्रव॒ः कद॑ग्ने रु॒द्राय॑ नृ॒घ्ने ॥६॥

Kaddhishnyasu vridhasano agne kad vataya pratavase shubhanye
Parijmane nasatyaya kshe bravah kadagne rudraya nrighne

3.7

क॒था म॒हे पु॑ष्टिम्भ॒राय॑ पू॒ष्णे कद्रु॒द्राय॒ सुम॑खाय हवि॒र्दे ।
कद् विष्ण॑व उरुगा॒याय॒ रेतो॒ ब्रव॒ः कद॑ग्ने॒ शर॑वे बृह॒त्यै ॥७॥

Katha mahe pushtimbharaya pushne kadrudraya sumakhaya havirde
Kad vishnava urugayaya reto bravah kadagne sharave brihatyai

3.8

क॒था शर्धा॑य म॒रुता॑मृ॒ताय॑ क॒था सू॒रे बृ॑ह॒ते पृ॒च्छ्यमा॑नः ।
प्रति॑ ब्र॒वोऽदि॑तये तु॒राय॒ साधा॑ दि॒वो जा॑तवेदश्चिकि॒त्वान् ॥८॥

Katha shardhaya marutamritaya katha sure brihate prichchhyamanah
Prati bravoditaye turaya sadha divo jatavedashchikitvan

3.9

ऋ॒तेन॑ ऋ॒तं निय॑तमीळ॒ आ गोरा॒मा सचा॒ मधु॑मत् प॒क्वम॑ग्ने ।
कृ॒ष्णा स॒ती रुश॑ता धा॒सिनै॒षा जाम॑र्येण॒ पय॑सा पीपाय ॥९॥

Ritena ritam niyatamila a gorama sacha madhumat pakvamagne
Krishna sati rushata dhasinaisha jamaryena payasa pipaya

3.10

ऋ॒तेन॒ हि ष्मा॑ वृष॒भश्चि॑द॒क्तः पुमाँ॑ अ॒ग्निः पय॑सा पृ॒ष्ठ्ये॑न ।
अस्प॑न्दमानो अचरद् वयो॒धा वृषा॑ शु॒क्रं दु॑दुहे॒ पृश्नि॒रूध॑ः ॥१०॥

Ritena hi shma vrishabhashchidaktah pumam agnih payasa prishthyena
Aspandamano acharad vayodha vrisha shukram duduhe prishnirudhah

3.11

ऋ॒तेनाद्रिं॒ व्य॑सन् भि॒दन्त॒ः समङ्गि॑रसो नवन्त॒ गोभि॑ः ।
शु॒नं नर॒ः परि॑ षदन्नु॒षास॑मा॒विः स्व॑रभवज्जा॒ते अ॒ग्नौ ॥११॥

Ritenadrim vyasan bhidantah samangiraso navanta gobhih
Shunam narah pari shadannushasamavih svarabhavajjate agnau

3.12

ऋ॒तेन॑ दे॒वीर॒मृता॒ अमृ॑क्ता॒ अर्णो॑भि॒रापो॒ मधु॑मद्भिरग्ने ।
वा॒जी न सर्गे॑षु प्रस्तुभा॒नः प्र सद॒मित् स्रवि॑तवे दधन्युः ॥१२॥

Ritena deviramrita amrikta arnobhirapo madhumadbhiragne
Vaji na sargeshu prastubhanah pra sadamit sravitave dadhanyuh

3.13

मा कस्य॑ य॒क्षं सद॒मिद्धु॒रो गा॒ मा वे॒शस्य॑ प्रमिन॒तो मापेः ।
मा भ्रातु॑रग्ने॒ अनृ॑जोर्ऋणं वे॒र्मा सख्यु॒र्दक्षं॑ रि॒पोर्भु॑जेम ॥१३॥

Ma kasya yaksham sadamiddhuro ga ma veshasya praminato mapeh
Ma bhraturagne anrijorrinam verma sakhyurdaksham riporbhujema

3.14

रक्षा॑ णो अग्ने॒ तव॒ रक्ष॑णेभी रारक्षा॒णः सु॑मख प्रीणा॒नः ।
प्रति॑ ष्फुर॒ वि रु॑ज वी॒ड्वंहो॑ ज॒हि रक्षो॒ महि॑ चिद् वावृधा॒नम् ॥१४॥

Raksha no agne tava rakshanebhi rarakshanah sumakha prinanah
Prati shphura vi ruja vidvanho jahi raksho mahi chid vavridhanam

3.15

ए॒भिर्भ॑व सु॒मना॑ अग्ने अ॒र्कैरि॒मान् त्स्पृ॑श॒ मन्म॑भिः शूर॒ वाजा॑न् ।
उ॒त ब्रह्मा॑ण्यङ्गिरो जुषस्व॒ सं ते॑ श॒स्तिर्दे॒ववा॑ता जरेत ॥१५॥

Ebhirbhava sumana agne arkairiman tsprisha manmabhih shura vajan
Uta brahmanyangiro jushasva sam te shastirdevavata jareta

3.16

ए॒ता विश्वा॑ वि॒दुषे॒ तुभ्यं॑ वेधो नी॒थान्य॑ग्ने नि॒ण्या वचां॑सि ।
नि॒वच॑ना क॒वये॒ काव्या॒न्यशं॑सिषं म॒तिभि॒र्विप्र॑ उ॒क्थैः ॥१६॥

Eta vishva vidushe tubhyam vedho nithanyagne ninya vachansi
Nivachana kavaye kavyanyashansisham matibhirvipra ukthaih